Read Sukuma Bible 2015 – Bibilia Ilagano Lya Kale 2015 Isaya 61 Bible Online

Isaya 61 - Sukuma Bible 2015 – Bibilia Ilagano Lya Kale 2015 bible

Isaya 61

¹Ū Moyo o ng'wa Seeba MULUNGU alī hamò na nene, nguno ū SEEBA wanibilile maguta nabalomeele Ng'hūlū Jawiza a bahabī. Wanitūmile kūbahandīkīīja abo bakūgwaga ng'holò, abo balī mu būding'wa kūbakumūkīja mhola ja wiyaabī, na kūbataligūlīla a batungwa.

²Kūkumūcha ng'waka go ng'wa SEEBA ūyo gūzunījiwe, na lūshikū lwa ng'wa Mulungu wise kūmala shiilī, kūbalūngūja pye abo bakūlīlaga ng'hūngū,

³kūlagīja kūlwa banhū abo bakūlīlaga ng'hūngū mu Sayuni; bapandīke ngikili ya būlabo a ha ng'wanya gwa mabu, maguta ga būyegi a ha ng'wanya gwa kūlīla ng'hūngū, na shizwalo sh'ikūjo a ha ng'wanya gwa moyo gūchongomeelile. Hūna bakwitanwa gīkī Mitūndū ya būtūngīlīja, shihamvwa sha ng'wa SEEBA kūlwa kūkumūcha ikūjo lyakwe we ng'wenekīlī.

⁴Bakūgazenga būpya a makambūkīle ga kale, na a mapandī ayo gaakenaagūlwa myaka ya kale bakūgagūngūmūla; bakwīzenga būpya ī mizengo īyo yakambagūlwa shikū ja kale, īyo yikala mu būkenaagūku makanza ga shibyalīlwe na shibyalīlwe.

⁵Balobeji bakūbiza badīīmi ba madaale ga mitugo jing'we; banhū abo ūtabamanile bakūbiza batūmami mu malaale ging'we nū mu migunda ying'we ya mizabibu.

⁶Hūna a bing'we mukwitanwa gīkī mulī bagabīji ba ng'wa SEEBA, mukwinhwa lina lya batūmami ba ng'wa Mulungu wise. Mukūyūlya sabo ja mahanga, nīyo ī sabo jenījo jikūmudoosha.

⁷A ha ng'wanya gwa minala ying'we, ū ngabo gwing'we gūkūbiza ng'hangala ibīlī, na a ha ng'wanya gwa kūgooka mukūbūyegela ū wingīji wing'we; hūna lūūlū ū mu sī ying'we mukūbiza na būsugi būsoga no kūtinda ūmo kūlī kwiganika kwing'we, ū būyegi wing'we būkūbiza bo welelo na welelo.

⁸“Nguno ū nene SEEBA natogilwe kalamulīle ka wīmà, būnyeecha na wiboneeji nashikolilwe. Nakūbinha mheela kūlenganīla na ng'hana yane, hūna nakūbeeja nabo būlagane wa welelo na welelo.

⁹Ū būbyīle wabo būkūkūmūūka ū mu mahanga, na a babyalwa babo ū mu ng'anda ja banhū; bose pye abo bakūbabona bakūbitegeleja gīkī balī banhū abo SEEBA abīīlūkīlile mbango.”

¹⁰Nakūnyegelaga no no no ū SEEBA, nīyo ū būpanga wane būkūnyegela Mulungu wane; nguno wanizwīkile shizwalo sha būpīji, hama ūnigumīīla ng'handa ya būtūngīlīja, gīt'ūmo ntooji akigalilīlaga watūūla n'ihima ly'ikūjo kū ntwe gwakwe, nūūlū gīt'ūmo ntoolwa akiyaalūlīlaga wazwalīla būlenji wa sīīlī ja zahabu.

¹¹Nguno gīt'ūmo sī īkazwishaga shikolo sha kūzwa, nū mumo ngunda gūkazwishaga īsho shikahambagwa mo; h'ūmo ū Seeba MULUNGU akūbūzwisīja ū būtūngīlīja nū būgongooji hose pyī ū mu mahanga.