Read Sukuma Bible 2015 – Bibilia Ilagano Lya Kale 2015 Isaya 62 Bible Online

Isaya 62 - Sukuma Bible 2015 – Bibilia Ilagano Lya Kale 2015 bible

Isaya 62

¹Ū nene natūhuumūla nīlekanīje gīko dūhū ī Sayuni, natūlembeela kūshisha ū būtūngīlīja wa Yelusalemu wele gīt'ikīngo lya dilū; ū būpīji wamo būng'weke gītī chenge shikūligimaga moto.

²Hūna a mahanga gakwībona Ī ng'hana yako, pye a batemi bakūlībona Ī līkūjo lyako. Hūna ūkwitanwa lina ipya, Īlo SEEBA akūlīhaya na nomo gwakwe wei ng'wenekīlī.

³Ū mu nkono go ng'wa SEEBA ūkūbiza ngikili y'ikūjo, n'isaki lya būlabo lya būbeeleji ū mu nkono go ng'wa Mulungu wako.

⁴Ūtikala ūkwitanagwa “Nshimbe,” nūūlū ī sī yako ītūhayiwa hangī gīkī Īlekanījiwe. Alīyo ūkūyitanwa gīkī, “Ayegelilwe”[26] ī sī yako nayo īkwitanwa gīkī Atoolilwe.[27] Nguno ū SEEBA akūkūyegela, nī sī yako īkūbiza gītī nkīma atoolilwe.

⁵Nguno ūmo shilī shīmīle sha nsūmba kūtoola munhya, nū bebe ūkūtoolwa gīko.[28] Ūmo nsūmba akanyegelaga nke wakwe ha wandījo wa kwitoola kwabo, nū bebe ū Mulungu wako akūkūyegela gīko.

⁶Ee Yelusalemu, naatūūlile balang'hani ū kwigūlya ya ndugu jako, batūhuumūla na hado yaya līīmi na būjikū. Bing'we abo mung'wizūkilwe ū SEEBA, lekagi ū kūlembeela.

⁷Nū wei yaya ū kūng'winha ng'wanya gwa kwifuula, kūshisha agūhandīkīīje ū nzengo gwa Yelusalemu; agwīte gūbize ikūjo lya sī jose pye.

⁸Ū SEEBA wilahīlile mu būdūla wa nkono gwakwe gwa būlyo, ū nkono gwa nguzu jakwe; wahayile gīkī, “Ī shilīwa shako natūbinha hangī banishi bako bashilye boi, nī divai yako īyo wīnoganogela bebe batalīng'wa hangī banhū abo batīkoyelile.

⁹Alīyo a bagesi basho h'abo bakūshilya bankumīlīje SEEBA; a bayobi ba mizabibu bakwīng'wa Ī divai balī mu mabīndo ga h'ipandī lyane lyeela.”

¹⁰Ingīlagi, ng'ūbītīla mu mibita; babeegejagi ī nzīla a banhū, līpalagutagi ī likūūwa, lībejagi! Gīnjagi mo a mawe, ganungījagi lūbembeela a mahanga.

¹¹Ū SEEBA akūkumūchaga hose hose, kūshisha kū ngelelo ya sī; akūhayaga, “Ng'wīlagi ū nshīke ū Sayuni: Managa gīkī ū Mpīja wako washikaga, Managa nī linong'ho lyakwe alī nalyo, nī mheela yakwe ayītongegije.”

¹²A benabo bakūyitanwa gīkī Banhū Beela, Bakomoolwa ba ng'wa SEEBA; hūna ū bebe ī lina lyako ūkūyitanwa Nkoowa, Nzengo ūyo gūtī gwa Nyashimbe hangī.