Read Sukuma Bible 2015 – Bibilia Ilagano Lya Kale 2015 Isaya 7 Bible Online

Isaya 7 - Sukuma Bible 2015 – Bibilia Ilagano Lya Kale 2015 bible

Isaya 7

¹Mu shikū jene Ahazi ng'witūnja o ng'wa Yotamu, ng'witūnja o ng'wa Uzia, alī ntemi wa Yuda, ntemi Lezini wa Alaamu, na ntemi wa Isilaeli, Peka ng'witūnja o ng'wa Lemalia, bakabūūka kūjūgūdumīla ū nzengo gwa Yelusalemu, gīkī balwe nago būlūgū; alīyo bakalemeelwa ū kūgūpyena.

²Ī numba ya ng'wa Daūdi yūwīlwa, “Ī sī ya Alaamu nī ya Efulaimu jabizile na būsangī”; ī ng'holò yakwe ū Ahazi īkogoha no, hamò nī ng'holò ja banhū bakwe, būyūtingina gītī mitī ya ng'wipoolu īkūtinginyiagwa nyaga.

³Hūna ū SEEBA ūng'wīla ū Isaya gīkī, “Ū bebe jaga nū ng'witūnja wako ū Sheali-yashubu, ūkibone nū Ahazi. Ūkūmanhīja nang'hwe kū nzīla ya kūja kwilaale lya mfuji wa myenda, aho gūgelelile ngoka gwa kūfuma kwilambo lya kū ngūngūli.”

⁴Kang'wīlage gīkī, “Ilang'hanage gete, ūlembeele; yaya ū kogoha. Yaya nūūlū kūfung'wa ng'holò kūlwa nguno ya tūshītinde tūbīlī ūto tūkūdundumūlaga lyochi twenūtū; kūlwa būpelanu būtaale ūbo alīnabo Lezini nī sī ya Alaamu, hamò nū ng'witūnja o ng'wa Lemalia.

⁵Nguno ī Alaamu nī Efulaimu nū ng'witūnja o ng'wa Lemalia balī na ng'hūmbū ja kūkwītīla mibi; bakwiwīlaga gīkī,

⁶Tūjagi tūkīdumīle ī Yuda twītūle, twībbalasanye twīgabanhe ībize yise, hama tūntūūle ng'witūnja o ng'wa Tabeeli abize ntemi wayo.”

⁷Alīyo ū Seeba MULUNGU alīhaya gīkī, “Ū mhayo gwenūyū gūtūshikana, nūūlū gūtilonga na hado yaya!

⁸Nguno ī Alaamu īsugilwe na Damasiko, hama ū nsugi wa Damasiko Lezini. Ng'wikanza lya myaka makūmi atandatū n'itanò, ī Efulaimu īkūsangwa yakenaagūlilwe kībi kībi no; lītūbiza ihanga lya banhū hangī.

⁹Ū būsugi wa Efulaimu būlī Samalia, hama ū ntaale ū mu Samalia ng'wene ng'witūnja o ng'wa Lemalia. Ūlū mutahandatīlile ū mu kūzunya, mutūdūla ū kwīmīīla na hado yaya.”

¹⁰Ū SEEBA ūlūngalūnga hangī nū Ahazi; ūng'wīla gīkī,

¹¹“Nombage ū SEEBA ū Mulungu wako, akwinhe shimanīkījo; ū bebe lombaga dūhū nūūlū shikabiza shilī kū shimu gītī kūlimu, nūūlū kwigūlya no gīt'igūlū.”

¹²Alīyo ū Ahazi ūhaya, “Ū nene natūlomba, natīko kūngema ū SEEBA.”

¹³Hūna ū Isaya ūhaya, “Ee bing'we ba numba ya ng'wa Daūdi! Ū gwa kūbaseedeecha banhū mulīgūbona gīkī gūlī mhayo ndo no, nose nū Mulungu wane mutogilwe kūnkoya?

¹⁴Alilūūlū, ū SEEBA wei ngwenekīlī akūng'winha shimanīkījo a bing'we: Munhya ng'wilindu akūbūūcha nda, na akūbyala ng'wana ngosha, ūyo akūng'wilīka ī lina lyakwe Emmanūli.[5]

¹⁵Ūlū ūshika ng'wikanza lya kūmana kwīlema ī yabūbi na kūsola ītūngīlīgije, akūyūlīīla mabeele maliboto na būūkī.

¹⁶Nguno ū ng'wana ng'wenūyo aho ataalī kūmana kūyūlema yabūbi na kūsola ītūngīlīgije, ī sī ya batemi babīlī abo ūlībogoha īkūsangwa yasaagile buyīkī.

¹⁷Ū SEEBA akūkwenhela ū bebe na a banhū bako, na a banhū ba mu numba ya ng'wa so; akūkwenhela ikanza īlo lītaalī kwilonga kūfuma mu lūshikū ūlo Efulaimu īkalekana na Yuda. Akūng'wenha ntemi wa Ashulu.”

¹⁸Ū mu lūshikū lwenūlo ū SEEBA akūlula nuli, iitane mabbūbbūlū kūfuma kūle kū myongo ya Misili, na nzūkī ja mu sī ya Ashulu.

¹⁹Pye a genaya gakwiza gihoolele gikale būlī kwene, ībize mu njonga ī shimu, mu mahalo ga mawe, hose hose būyaga na mu malūla ga kū madīīmīlo a gose.

²⁰Nīyo ū mu lūshikū lwenūlo, ū SEEBA akwenha lūgembe lwa kūfuma kū nkīlo gwa mongo, h'ū ntemi wa Ashulu. Akūkūmooga ī nzwīlī ja kū ntwe gwako, nū booya ū mu magūlū gako abūpalagute; pye nī ndezu jako akūjifufuula.

²¹Hangī nīyo ū ng'wikanza lyenīlo, ū munhū akūsaba kang'ombe kamò, na tūkolo tūbīlī.

²²Alīyo a mabeelè akūyūpandīka mingī no, nose akūyikala akūlīīlaga mabeelè maliboto dūhū. Nguno pye abo bakūshiigīīla ū mu sī yenīyo, bakūbiza balīīji ba mabeelè maliboto na būūkī.

²³Nīyo hangī ū ng'wikanza lyenīlo, būlī kwene ūko gaalīho matina shihūmbī ga mizabibu, īyo yalī īshikile kūmpandīkīla munhū feza shihūmbī, gakūzwa magwaata na ming'hwa.

²⁴Ū munhū ū kūja kwenūko īkūng'wigeleelwa abūūche būta na masonga, nguno pyī ī sī īkokala magwaata na ming'hwa.

²⁵Hama pyī ī shigūlū īsho shalīmagwa na magembe, atūdūla ū munhū ū kūja koi, kūlwa nguno ya kogoha magwaata na ming'hwa; gakūbiza madīīmīlo ga ng'ombe na ng'holo dūhū.