Read Sukuma Bible 2015 – Bibilia Ilagano Lya Kale 2015 Isaya 8 Bible Online

Isaya 8 - Sukuma Bible 2015 – Bibilia Ilagano Lya Kale 2015 bible

Isaya 8

¹Ū SEEBA ūniwīla hangī, “Solaga lūbbapūla[6] lūtaale, ūlwandīke bo kalamu gītī īyo īkatūmamīlagwa na banhū shikū jose. Andīkaga, Maha-Shalali-Hashi-Bazi.

²Nakūng'witana ngabīji Ulia na Zakalia ng'witūnja o ng'wa Yebelekiya, babize bakaanīji bane.”

³Nū nke wane walī ng'hangi, nūlaala nang'hwe, ūbūūcha nda, ūbyala ng'wana ngosha. Hūna ū SEEBA ūniwīla, “Ng'wilīkage ī lina lyakwe Maha-Shalali-Hashi-Bazi.

⁴Nguno ū ng'wana ng'wenūyū aho ataalī kūmana kwitana gīkī, ‘Baba’ nūūlū ‘Mayu’ ū būsabi wa Damasiko nī shisonzwa sha Samalia shikūja na ntemi wa Ashulu.”

⁵Ū SEEBA ūlūngalūnga nane hangī gīkī,

⁶“Īkī a banhū benaba balīgalema a minzī ga Shilo ayo gakahūūmaga mu būlembeezu, kūlwa kūnyegela Lezini na ng'witūnja o ng'wa Lemalia,

⁷alilūūlū, ū SEEBA akūbenhela minzī ga nguzu, ihūūma itaale kūfuma ū kū Līmongo; hū ntemi wa Ashulu, akwiza na makanji gakwe gose. Līkokala pa, na a matambī galyo a gose gakokala pa pa pa; nīyo līkūseesekeja kūjikīlanhya Ī ngegu jalyo,

⁸a minzī galyo gakūhūūma gajile hose pyī ū mu sī ya Yuda, gakūtaala gīkundīkīje pyī ī yose; pye a hose gakūbiza minzī gike, mingī no ga kūshika mu nhingo. A manana galyo līkūgatananula gabūtang'anhye pyī ū būgalī galī bo sī yako, Ee Emmanūli.”

⁹Bing'we mahanga, Ītagi ying'we ya nkūla mutobagūke! Degelekagi bing'we sī jose ja kūle. Itungagi shilanga kūja mu būlūgū mukatobagūke! Alichene, itungagi shilanga mukatobagūkīle mu būlūgū!

¹⁰Lomanagi mulye gwīnda īmò, alīyo īkūcha mpandagīlo. Gūhoyelagi ū mhayo gwing'we, alīyo gūtīmīīla; nguno ū Mulungu alī kū lwandī lwise.

¹¹Hūna ū SEEBA ūlūngalūnga nane, kūnū ū nkono gwakwe gwa nguzu gūlī hamò nū nene. Ūnihūgūla gīkī natizūshimīzīla ū mu nzīla ja banhū benaba. Ūhaya,

¹²Yaya ū kwīhaya ya wijomboki pyī īyo bakwīhayaga a banhū benaba gīkī ya wijomboki, nī yīyo bakwīyogohaga yaya ū kwīyogoha ū bebe; yaya nūūlū kūdetema ū bebe.

¹³Ū SEEBA wa mabità hū ng'wene shikwigeleelilwe ūng'wisaabe gīkī alī ng'wela, ū ng'wenūyo hū ng'ogohage. Detemaga ū kū būtongi bokwe ū ng'wenūyo,

¹⁴hūna akūbiza ipandī lya kūpīlīla, alīyo ū kū numba ja Isilaeli būbīlī wajo akūbiza iwe lya kwenheleja banhū kwipama, na shiganga sha kūbagwisha. Hama ū kū bikaji ba mu Yelusalemu akūbiza ntego na lūtu.

¹⁵Bingī babo bakwipama, bakūgwa babīnzagūke; bakūgwashiwa bading'we.

¹⁶Būtungage ū būkaanīji, ūshilang'hane ī shilagīlo shiikale ū mu bahemba bane.

¹⁷Ū nene nakūnindīīla SEEBA, ūyo ibisile ū kū banhū ba numba ya ng'wa Yakobo, batizūbūbona ū būshū bokwe; hū ng'wene nakūng'wisagīlwa.

¹⁸Ū nene ūūyū nalīho na baana abo waninha SEEBA, ū kū Baisilaeli tūlī shimanīkījo na shigīmbo sha kūfuma kūlī SEEBA wa mabità, ūyo wikalo bokwe būlī kū lūgūlū lwa Sayūni.

¹⁹Ūlū būkūwīla, “Jaga ūkabūje kū balagūji na balogi, abo bakahwehwetaga na kūng'ulang'ula,” nibūlī a banhū batizūmūja Mulungu wabo? Nibūlī babūje kū bafu mihayo ya banhū bapanga?

²⁰Jagi kū shilagīlo na kū būkaanīji! Ūlū batayombile ūmo gūhayīlile ū mhayo gwenūyū, numho ī lisana lītaalī ū kūbaakīla.

²¹Bakwikala bakūkoyaga balī nzala, kūnū bakūhūhūūlījaga kūja hose hose ū mu sī; ūlū wabaminya ū būtamo balangamīla ū kwigūlya, hūna banzuma ū ntemi wabo nū Mulungu wabo.

²²Bakwihamba ū kūlola a hasī, batūbona shose shose ūlū ītī makoye dūhū na giiti, hamò n'ilundu lya kogohya. Ū kū ng'halīlo yaho bakūhūngūlwa bakagwīle mu giiti sha gamha.