Read Sukuma Bible 2015 – Bibilia Ilagano Lya Kale 2015 Bagabīji 10 Bible Online

Bagabīji 10 - Sukuma Bible 2015 – Bibilia Ilagano Lya Kale 2015 bible

Bagabīji 10

¹A bitūnja ba ng'wa Alooni a ba Nadabu nū Abihu, bakabūūcha būlī ng'wene lyahulīlo lyakwe, bahula moto ūyo gwalī gūtazunīlīgije; hūna būtūūla na būbbani wa kūzuukīja; benha kū būtongi bo ng'wa SEEBA kīnhū īsho walī atabalagīlile.

²Kwimanīla moto gwafuma kūlī SEEBA gūūbabbiisha, būchīla henaho kū būtongi bo ng'wa SEEBA.

³Ū Musa ūng'wīla ū Alooni, “Ū mhayo gwenūyo h'ūyo SEEBA akagūhaya aho akayomba gīkī, ‘Ū kū banhū abo bakūneegeelaga nakwiyoolecha gīkī nalī ng'wela. Pyī hose na hose ūko banhū balī, nakwinhwa ikūjo.’” Ū Alooni akagayiwa ū gwa kūhaya!

⁴Ū Musa ūbitana ba Mishaeli na Elizafati, bitūnja ba ng'wa Uzieli ise ndo o ng'wa Alooni;[3] ūbawīla, “Nzūgi mubabūūche a baana ba ng'wing'we, mubīnje ū kwipandī lyeela, mubatwale hanze ya ng'hambī.”

⁵Biza būbabūūcha; abo bakazumalīka baalī bataalī mu ng'hanjo jabo ja milīmo; būbatwala hanze ya ng'hambī, gīt'ūmo Musa akabawīīlīla.

⁶Hūna ū Musa ūng'wīla ū Alooni na a bitūnja bakwe a ba Eliezeli nū Itamaali, “Mutizūjilekanīja ī nzwīlī jing'we jisakaalīle sagala, yaya nūūlū kūtandūla shizwalo shing'we, nguno numho mukūcha; nīyo ū SEEBA akūlīpelanīla nī libità lya banhū pyī ī lyose. A badūgū bing'we a ba numba ya Isilaeli a bose hū bene bakūbalīla abo SEEBA wabakenaagūlaga na moto.

⁷A bing'we yaya ū kwīnga a ha nyango gwiheema lya kwibilingīla; ūlū mulīīte gīko mukūcha, nguno mulī basolwa ba ng'wa SEEBA kūlwa kwitīīlwa maguta.” Ng'hana bīīta gīt'ūmo Musa akabawīlīla.

⁸Hūna ū SEEBA ūng'wīla ū Alooni,

⁹“Ū bebe na a bitūnja bako ūlū mulī na lūdīīma lwa kwingīla ng'wiheema lya kwibilingīla, yaya ū kūng'wa divai nūūlū shing'wiwa shingī shose shose, īsho shidūgije kūnkola munhū; ūlū ng'wīta chene mukūcha. Ī shilagīlo shenīshi shilī sha būja na būja ū mu shibyalīlwe shing'we īsho shiliza.

¹⁰A bing'we shing'wigeleelilwe ng'wīdeebe ī mihayo, ī myeela ī ya kogohwa ng'wīlekanya nī ya shikū jose ū mu kaīle ka banhū; hama nī yawiza ng'wīlekanya nī misoso.

¹¹A bing'we īng'wigeleelilwe kūbalanga a Baisilaeli pyī ī shilagīlo īsho SEEBA wabinhile mu nzīla ya ng'wa Musa.”

¹²Ū Musa ūng'wīla ū Alooni na a bitūnja bakwe a ba Eliezeli nū Itamaali, abo bakashiiga; ūhaya, “Shisolagi ī shakwinha sha būsu īsho shasaagaga ha shakwinha sha kūfunyiwa kūlwa ng'wa SEEBA mu nzīla ya moto, mushizuge shitī na shibimbya, mushilīīle ha ng'walīlo; nguno shilī sheela no no no.

¹³Mukūyūshilya mulī ng'wipandī lyeela, nguno ū gwenūyo ngabo gwako ū bebe, hamò na a bitūnja bako, gwa kūfuma ū mu shakwinha īsho shikafunyiagwa kūlwa ng'wa SEEBA mu nzīla ya moto; h'ūmo naalagīīlilwe.

¹⁴Alīyo ī shiguuku sha kūyengeejiwa, nū gūlūmbū gwa kūfunyiwa, ī shene ūkūshilya ū bebe na a bitūnja bako, hamò na a bashīke bako. Mukūshilya mulī ng'wipandī lyeela; ū gwenūyo ngabo gwako ūhelelilwe bebe hamò na baana bako, ūyo gūkūfunyiwa kūbiza shakwinha sha būsangī īsho Baisilaeli bakūyūfunya.

¹⁵Ū gūlūmbū gwa kūfunyiwa, nī shidali sha kūyengeejiwa shiigelile shenhwe, hamò na a masazu ayo gakīītagwa kūbiza shakwinha sha kūfunyiwa mu nzīla ya moto; shenhwe shiyengeejiwe kū būtongi bo ng'wa SEEBA, shibize shakwinha sha kūyengeejiwa. Ū gwenūyū gūkūbiza ngabo gwing'we gwa shikū jose, gīt'ūmo SEEBA walagīīlile.”

¹⁶Ū Musa aho wabūūja ūko yalī yatūūlwa ī mbūli ya shitambò sha shibi, ūwīlwa gīkī yalī yamala kūpemva moto. Ū mhayo gwenūyo gūnsayīsha, ūbasayīla a bitūnja ba ng'wa Alooni, a ba Eliezeli nū Itamaali, abo baalī basaagīīla; ūbabūūja gīkī,

¹⁷“Nibūlī aho mulī ng'wipandī lyeela mutashiliile ī shitambò sha shibi? Ī shoi ī shenīshi shilī shakwinha sheela no no no; ng'winhiwe bing'we kūlwa kwīnja kwihīga kwa banhū, ībize nzīla ya kūbeeja isangī kūlwa nguno yabo kū būtongi bo ng'wa SEEBA.

¹⁸Yalī īng'wigeleelilwe kwīlya ī mbūli yenīyo aho mulī ng'wipandī lyeela, nguno a mininga gayo gaalī gatatwalilwe ū mu gatī y'iheema; h'ūmo nakamuwīlīla.”

¹⁹Ū Alooni ūng'wīla, “Ī lelo īyī bamfunījaga ū SEEBA shakwinha shabo sha shibi, nī sha kūpemva; yanigwīīlaga mitaale ū nene! Ū SEEBA ni wayega gete ūlū ni nashilya ū nene ī shitambò sha shibi?”

²⁰Ū Musa aho wigwa ū būsombooji wenūbo ūyega.