Read Sukuma Bible 2015 – Bibilia Ilagano Lya Kale 2015 Bagabīji 11 Bible Online

Bagabīji 11 - Sukuma Bible 2015 – Bibilia Ilagano Lya Kale 2015 bible

Bagabīji 11

¹Ū SEEBA ūng'wīla ū Musa,

²Bawīlage a Baisilaeli gīkī, “Ū mu ndimu nī shiinū pyī ījo jilīmo ū mu sī, ījo mudūgije kūlya jiiji:

³Pyī ī ndimu ī ja chūūga shigabanhīkile shūlekana, hama jūbiza jikashoshaga būdīīma.

⁴Kwike jilīho ījo jikashoshaga būdīīma dūhū, na jingī jilī na chūūga jilekanile dūhū; yaya ū kūjilya ī ja mbika yenīyo, gīt'ūmo īlī ngamīla; ī yoi īkashoshaga būdīīma, alīyo ī chūūga shayo shitalekanije, ī yenīyo nsoso ū kū bing'we.

⁵Īlīho na mhīmbī, nayo īkashoshaga būdīīma, alīyo ītī na chūūga shilekanije, ī yenīyo nayo nsoso ū kū bing'we.

⁶Na sayayi, nayo īkashoshaga būdīīma, alīyo ītī na chūūga shilekanije; ī yenīyo nayo nsoso ū kū bing'we.

⁷Hama īlīho ngīlī, īyo nūūlū īkī īlī na chūūga shilekanije alīyo ītashoshaga būdīīma; nayo ī yenīyo nsoso ū kū bing'we.

⁸Yaya ū kūjilya ī nyama ja ndimu jenījo, yaya nūūlū ū kwīkuumya ī mibimba yajo; jilī nsoso ū kū bing'we.

⁹“Ū mu shiseeng'wa pyī ī sha mu minzī ga mu nyanza na mu myongo, mudūgije kūlya ī ja masandà[4] na magambala.

¹⁰Alīyo ū mu shiseeng'wa sha mu nyanza na mu myongo, pyī īsho shitī na masandà na magambala shilī sha malofu ū kū bing'we, pye gete ī shenīsho; shido na shitaale.

¹¹Na lūūlū īkī ī shiseeng'wa shenīsho shilī sha malofu ū kū bing'we, yaya ū kūjilya ī nyama jajo; nī mibimba yajo ībalagi gīkī īlī ya malofu.

¹²Shose shose ī sha mu minzī īsho shitī na masandà hamò na magambala, shilī sha malofu ū kū bing'we.

¹³“Ī noni ījo jing'wigeleelilwe kūjibala gīkī jilī ja malofu, ījo shitigelile mujilye nguno jilī ja malofu, fungwe, mbeeshi, nanda,

¹⁴lūbala, mbika jose ja majū.

¹⁵Mbika jose ja ng'hūngūūlū,

¹⁶ging'hi ya mapembe, ging'hi ya kūhiimīla, guleegule, kasunguseelya ja būlī mbika;

¹⁷ging'hi ndo, jibbada kūūlī, ging'hi nhaale.

¹⁸Ng'hūyūgū, mugeeni, lūbundaaji,

¹⁹ng'oong'oli, choogihīnga, jibelamafumba, na tūnge.

²⁰“Ī shiinū ī ndo do do pyī ī ja manana alīyo jikashimīzīlaga magūlū anè, jilī ja malofu ū kū bing'we.

²¹Alīyo jilīho jimò ījo mudūgije kūlya nūūlū īkī jikashimīzīlaga magūlū anè, ījo jilī na magūlū ga būgondelo na mapando, na jidūgije kwidaamuka a ha sī.

²²Ū mu jenījo mudūgije kūlya njige ja būlī mbika, na ng'hūmbī jimò na jimò, nhaale na ndo.

²³Lelo ī shiinū ī ndo do do ī jingī ī ja manana na magūlū anè, pyī ī jenījo jiisaabagi kūbiza ja malofu ū kū bing'we.”

²⁴“Ī shiinū ījo jidūgije kūmusosohaja jilī īji; ose ose ūyo ūkuumya mimba gwa shiinū jenījo akūbiza nsoso kūshisha līīmi līlibīle.

²⁵Būlī ng'wene ūyo ūbūūcha shiinū īchile ū mu jenījo, akūfula ī shizwalo shakwe; hūna wibala gīkī alī nsoso kūshisha līīmi līlibīle.

²⁶Būlī ndimu īyo īlī na chūūga shigabanhije alīyo shitalekanije gete, nūūlū īyo ītashoshaga būdīīma, ī jenījo jilī nsoso ū kū bing'we. Būlī ng'wene ū wa kūkuumya īmò ya ndimu jenījo īchile, akūsosohala.

²⁷Ū mu shiinu na shiinū ījo jikashimīzaga na magūlū anè, pyī ījo jikashimīzīlaga mabondo jilī nsoso ū kū bing'we; ose ose ūyo ūkuumya mimba gwajo akūsosohala kūshisha līīmi līlibīle.

²⁸Ose ose ūyo ūbūūcha īmò ya shiinū jenījo īchile, akūfula ī shizwalo shakwe; hama akwibala kūbiza nsoso kūshisha līīmi līlibīle, ī shiinū jenījo jilī nsoso ū kū bing'we.

²⁹“Ū mu shiinū ījo jikashimīzaga jiligweesa hasī, īji jene jilī nsoso ū kū bing'we, nyamiswi,[5] ngoso, kūūlī ja mbika jose,

³⁰jigonà, mbūlū, noolè, jidīīma mbūli na wambu.

³¹Ū kū bing'we jilī nsoso ī jenīji ū mu shiinū jose ījo jikashimīzaga bo kwigweesa hasī. Ose ose ūyo ūkuumya mibimba yajo akūbiza nsoso kūshisha līīmi līlibīle.

³²Ūlū īmò ya shiinū jenīji yūūcha hūna yūgwīīla ha shikolo sha kūtūmamīla nīmo gose gose; shibize sha mantī, nūūlū sha ng'wenda, nūūlū sha ndīlī, nūūlū hamo igūnīla, ī shikolo shenīsho shikūbiza shisoso. Mukūshilobeka mu minzī, shikale shisoso gīko kūshisha līīmi līlibīle, hūna shūbiza sheela hangī.

³³Ūlū īmò ya shiinū jenījo yūgwīīla mu nungū ya mabūmba, pyī ī shikolo īsho shilīmo shikūbiza shasosohala, nī nungū yenīyo ng'wībela.

³⁴Shilīwa shose shose īsho shidūgije kūlyiwa, alīyo shūūloba minzī ga kūfuma ū mu nungū yenīyo, ī shenīsho shisoso. Nūūlū shing'wiwa shose shose īsho shilī mu nungū gītī yenīyo, ī shenīsho shisoso.

³⁵Ūlū yūūcha shiinū ū mu jenījo hūna yūgwīla ha shikolo shose shose, ī shikolo shenīsho shikūsosohala; ī lizugīlo lya būgubbanīje ī lya mabūmba nūūlū nungū ya kūzugīla, shiigelile shibelagūlwe nguno shilī shisoso; nū bing'we shiisaabagi kūbiza shisoso.

³⁶Kwike ūlū lūzwīīlo lwa minzī, nūūlū ilambo lya minzī mingī, a minzī ga ng'wenūmo gakwikala gawiza; alīyo ī shingī shose shose ūlū shiikuumya nī mibimba ya shiinū jenījo, shikūsosohala.

³⁷Ū mimba gwa mbika yenīyo ūlū gūgwīīla ha mbīyū ja kūhamba, ī jene jikwikala jawiza dūhū.

³⁸Alīyo ī mbīyū jenījo ūlū jidīkīlagwa minzī, hūna jūgwīīlwa mimba gītī gwenūyo, jikūsosohala ū kū bing'we.

³⁹“Ūlū yūcha ndimu īyo muzunīlīgije kwīlya, ose ose ūyo ūgūkuumya ū mimba gwayo akūsosohala kūshisha līīmi līlibīle.

⁴⁰Ū wa kwīlya ī nyama ya ndimu yenīyo akūfula ī shizwalo shakwe, hama wibala gīkī alī nsoso kūshisha līīmi līlibīle, ūyo ūgūbūūcha ū mimba gwa ndimu yenīyo, akūfula ī shizwalo shakwe, hūna wibala gīkī alī nsoso kūshisha līīmi kūlibīla.

⁴¹Shiseeng'wa shose shose īsho shikashimīzaga shikwigweesaga hasī, shilī shisoso; yaya ū kūshilya.

⁴²A bing'we mutazunīlīgije kūlya shiseeng'wa shose shose īsho shikashimīzaga shikwigweesaga hasī, ni shibizage sha kūshooloma, nūūlū sha kūshimīza na magūlū anè, nūūlū sha magūlū mingī; ī shenīsho shilī shisoso ū kū bing'we.

⁴³Yaya gete a bing'we ū kwiyenheleja kūbiza ba malofu kūlwa shiseeng'wa shose shose ū mu shenīsho. Mutizisosohaja mu nzīla yasho; nūūlū shitizūmusosohaja a bing'we.

⁴⁴Ū nene nalī SEEBA Mulungu wing'we; shiigelile ng'wiyeeje mubize beela, nguno ū nene nalī ng'wela. A bing'we yaya ū kwisosohaja kūlwa shiseeng'wa shose shose īsho shikashimīzaga shikwigweesaga hasī.

⁴⁵Ū nene nalī SEEBA ūyo nakang'wenha kūfuma mu sī ya Misili gīkī nabize Mulungu wing'we; na lūūlū bizagi beela nguno ū nene nalī ng'wela.

⁴⁶“Ī mihayo yenīyī īhelilwe kūlwa nguno ya ndimu na shiinū, na noni, hamò na shiseeng'wa shose īsho shikayeelayelaga mu minzī, nī shisho shikashimīzaga higūlya ya sī.

⁴⁷Īng'wigeleelilwe mulekanye a ha gatī ya shikolo īsho shitī sheela nī sheela; ī shiseeng'wa shipanga īsho mudūgije kūshilya, nī shisho mulemegije ū kūshilya.”