Read Sukuma Bible 2015 – Bibilia Ilagano Lya Kale 2015 Bagabīji 13 Bible Online

Bagabīji 13 - Sukuma Bible 2015 – Bibilia Ilagano Lya Kale 2015 bible

Bagabīji 13

²“Ūlū munhū ose ose wīta ibimbà nūūlū ūdīdīmūka būhele,[6] nūūlū ūfuma ibalà ha mīlī gwakwe, īlo līdūgije kūbiza būsaatu w'ikūnza lya mīlī[7] bo kūbatūlīla na biye, īkwigeleelwa enhwe kūlī ngabīji Alooni, nūūlū kūlī ūmò wa bitūnja bakwe a bagabīji.

³Ū ngabīji akūbūlola chiza ū būsaatu ūbo būlī a ha mīlī gwakwe ū munhū ng'wenūyo; ū booya ūbo būlī a ha būsaatu wenekīlī ūlū būbiza wagalūkile kūbiza wape, nū būdito w'ibalà lyenīlo būloolecha gīkī būjile mu gatī, būūkīlanhya aho līgelelile ī likūnza lya mīlī gwakwe, ū wenūbo būlī būsaatu būbi w'ikūnza lya mīlī; adūgije kūbatūlīla na banhū bangī. Ū ngabīji ūlū ūmala ū kūnola, ūbawīla a banhū gīkī ū munhū ng'wenūyo atigeleelilwe kwisanja na banhū bangī.

⁴Ī libalà lya ha mīlī gwakwe ūlū lyūbonekena gīkī ū būdito walyo būtingīlile ū ng'wikūnza, nū booya ūbo būlī a h'ibalà lyenīlo būtagalūkile kūbiza wape, ū ngabīji akūntūūla ū nsaatu ng'wenūyo h'ipandī lya iyene ūneka henaho shikū mpungatī.

⁵“Ū mu lūshikū ū lwa mpungatī ū ngabīji akūūnola hangī ū munhū ng'wenūyo, ūlū ūbona gīkī ī libalà lītaalī kūgalūkīja, na lītaalī kūsambaala hose hose a ha mīlī gwakwe, akūneka a h'ipandī lya iyene henaho shikū mpungatī hangī.

⁶Ū mu lūshikū lwa mpungatī ū ngabīji akūnola hangī, ī libalà ūlū lyūbiza lyanyaalile, lītūgūsambaalīlaga ū mīlī gwakwe, ū ngabīji akūbawīla a banhū gīkī ū munhū ng'wenūyo atī na makoye;[8] asīlūkile būhele dūhū ū wenūbo. Hūna ū munhū ng'wenūyo akūfula ī shizwalo shakwe ūbeela.[9]

⁷Alīyo ūlū ūmala kwiyoolecha kūlī ngabīji, na a banhū būwīlwa gīkī atī na makoye, hūna hangī ū būhele wenūbo wandya kūgūsambaalīla ū mīlī gwakwe, īkūng'wigeleelwa wize kwiyoolecha hangī ū kūlī ngabīji.

⁸Nang'hwe ū ngabīji akūūnola hangī, ūlū ūbona gīkī ū būhele wagūsambaalīlile pyī ū mīlī gwakwe, akūbawīla a banhū gīkī ū munhū ng'wenūyo nsaatu, wigeleelilwe kūkomanyiwa. Alī na būsaatu w'ikūnza lya mīlī ūbo adūgije kūbatūlīla bangī.”

⁹“Ū munhū ūlū ūpandīka būsaatu w'ikūnza lya mīlī, akwenhwa kūlī ngabīji.

¹⁰Ū ngabīji ūlū ūnola hūna ūmona gīkī alī na būdīdīmūke būkuulīku a ha mīlī gwakwe, bookūbiza būsaatu ūlū būkuumiwa, hama būkwenhelejaga nū booya ūbo būlī henaho kūgalūka kūbiza wape,

¹¹Ū wenūbo būsaatu w'ikūnza lya mīlī, būtī bo kūpīla. Na lūūlū ū ngabīji akūbawīla a banhū gīkī ū ng'wenūyo atigeleelilwe kwisangīja na banhū bangī; atūntūūla na a h'ipandī lya iyene gīkī alolwe tame, nguno wamalaga kūbonekana hape gīkī nsaatu.

¹²“Alīyo ū būdīdīmūke wenūbo ūlū būgūsambaalīla pyī ū mīlī, nang'hwe ū ngabīji ūbona gīkī ī likūnza lya mīlī gwakwe ū munhū ng'wenūyo lyabiza gīko pyī ī lyose, kwandīja kū ntwe kūshisha kū magūlū,

¹³Ū ngabīji akūūnola chiza; ūlū ūbona gīkī ū būdīdīmūke wenūbo bogūsheekije pye gete ū mīlī, akūbawīla a banhū gīkī ū munhū ng'wenūyo ng'wela, nguno pyī ū mīlī gwakwe gwasanganīkīlile ū būkuulīku wenūbo; na lūūlū adūgije ū kwisangīja na a banhū a bangī.

¹⁴Alīyo ūlū lyūbonekana a ha mīlī gwakwe ibalà lya kūbiza isaatu ūlū lyūkuumiwa, akūbiza atigeleelilwe ū kwisangīja na a banhū a bangī.

¹⁵Ū ngabīji akūlīlola ī libalà lyenīlo, hama akūbawīla a banhū gīkī atigeleelilwe kwisangīja na a banhū. Nguno ī libalà lyenīlo līlī isoso, alī na būsaatu ūbo adūgije kūtūlīla banhū bangī.

¹⁶Kwike ī libalà lyenīlo ūlū lyūgalūka hangī lyūkuulīka, akūshoka ū kūlī ngabīji.

¹⁷Ū ngabīji akūūnola chiza, ūlū ūmona gīkī a mabalà gaagalūkile gūbiza makuulīku, akūbawīla a banhū gīkī ū munhū ūyo walī na mabalà wapīlile, akūbalwa gīkī wigeleelagwa kwisangīja na a banhū a bangī.

¹⁸“Ūlū munhū alī n'ibute hose hose a ha mīlī gwakwe hūna lyūpīla,

¹⁹alīyo aho lyalī ī libute lyenīlo wilonga ho būdīdīmūke būkuulīku, nūūlū ibalà lya būūpe būbalalūku, akwiza kūlī ngabīji.

²⁰Ū ngabīji akūlīlola chiza ī libalà lyenīlo, ūlū lyoolecha gīkī ū būdīdīmūku walyo būjile mu gatī, kūkīla aho līgelelile ī likūnza lya mīlī gwakwe, nū booya ūbo būlī aho līlī wagalūkile ī langi būbiza wape, ū ngabīji akūbawīla a banhū gīkī ū ng'wenūyo atigeleelilwe kwisangīja na a banhū a bangī. Ū wenūbo būsaatu wa kwitūlīla, wilongile aho lyalī ibute.

²¹Alīyo ū ngabīji ūlū ūnola hūna ūbona gīkī aho līlī ī libalà būtīīho booya wape, nūūlū lītajile mu gatī kūkīla aho līgelelile ikūnza, hama ūbona gīkī līlīīlīīla mu kūshila, a henaho ū ngabīji akūntūūla ū munhū ng'wenūyo h'ipandī lya iyene shikū mpungatī.

²²Ī libalà lyenīlo ūlū lyūbonekana gīkī līlīgūsambaalīla ū mīlī, ū ngabīji akūbawīla a banhū gīkī ū munhū ng'wenūyo atigeleelilwe kwisangīja na a banhū a bangī; alī na būsaatu wa kwitūlīla.

²³Alīyo ī libalà ūlū lītūūgalūkaga, nīyo lītūūsambaalaga, ī lyenīlo ilanda lya kūfuma hibute dūhū. Ū ngabīji akūbawīla a banhū gīkī ū munhū ng'wenūyo atī na makoye.

²⁴“Ūlū munhū ahubūkile hose hose ha mīlī gwakwe kūlwa kūpya moto, hūna a ha mīlī ūyo gūpile moto gwenūyo lilonga ibalà lya būūpe būbalalūku, nūūlū ikuulīku,

²⁵Ū ngabīji akūlīlola chiza ī libalà lyenīlo; ūlū ūbona gīkī ū booya ūbo būlī aho līlī wagalūkile ī langi, wabizile wape, hama līlībonekana gīkī līlibīlile mu gatī kūtinda aho līgelelile ikūnza lya mīlī, ū wenūbo būsaatu wa kwitūlīla, wingīlile a hilonda lya moto. Ū ngabīji akūbawīla a banhū gīkī ū ng'wenūyo atigeleelilwe kwisangīja na a banhū a bangī; būlī būsaatu w'ikūnza lya mīlī, ūbo būshikile kūbatūlīla na bangī.

²⁶Alīyo ū ngabīji ūlū ūlīlola hūna ūbona gīkī būtīīho booya wape a h'ibalà lyenīlo, hama nīyo lītūūbonekanaga gīkī lījile mu gatī kūtinda ūmo līlī ikūnza lya mīlī, nīyo līlīīja lyongeja kūpīla, ū ngabīji akūntūūla ū munhū ng'wenūyo h'ipandī lya iyene shikū mpungatī.

²⁷Ū mu lūshikū lwa mpungtī ū ngabīji akūūnola hangī, ūlū ūbona gīkī ī libalà lyenīlo līlīgūsambaalīla ū mīlī, akūbawīla a banhū gīkī ū ng'wenūyo atigeleelilwe kwisangīja na a banhū a bangī; ū būsaatu wakwe būlī wa kūtūlīla na bangī.

²⁸Alīyo ī libalà lyenīlo ūlū lītagalūkile, hama lītagūsambaalīlile nū mīlī, nīyo lyūbonekana gīkī līlīīja lyūgeeha, ū wenūbo būlī būbimbe dūhū kūlwa kūpya moto; na lūūlū ū ngabīji akūbawīla a banhū gīkī atī na makoye; ī lyenīlo līlī ilanda dūhū kūlwa kūpya moto.

²⁹“Ūlū munhū ngosha nūūlū nkīma ūbonwa alī na būchūūbūke ha ntwe nūūlū ha shilezu,

³⁰Ū ngabīji akūbūlola ū būchūūbūke wenūbo, ūlū ūbona gīkī būtagelelile ng'wikūnza dūhū, nū booya ūbo būzwile ho būlī na langi mbalalūku nīyo būlī nyabbūūpu, ū ngabīji akūbawīla a banhū gīkī ū munhū ng'wenūyo atigeleelilwe kwisangīja na banhū bangī. Alī na gishe; ū wenūbo būsaatu wa kūtūlīla banhū, wa ha ntwe nūūlū ha shilezu.

³¹Alīyo ū ngabīji ūlū ūbūlola ū būchūūbūke wenūbo ūbūbona gīkī būtajile mu gatī kūlīkīla ī likūnza lya mīlī, hama aho līlī būtīīho booya wapi, ū ngabīji akūntūūla ū munhū ng'wenūyo h'ipandī lya iyene shikū mpungatī.

³²A ha lūshikū lwa mpungatī, ū ngabīji akūbūlola chiza ū būchūūbūke wenūbo, ūlū ūbona gīkī ī līgishe lyenīlo lītaalī kūsambaalīla na mapandī gangī a ha mīlī, hama aho līlī būtīīho booya būbalalūku, nīyo līlībonekana kūbiza higūlya gūlya dūhū,

³³Ū munhū ng'wenūyo akūmoogwa, hūūlekeelwa dūhū aho būlī ū būsaatu; hūna ū ngabīji akūntūūla hangī h'ipandī lya iyene shikū jingī mpungatī.

³⁴A ha lūshikū lwa mpungatī, ū ngabīji akūlīlola ī līgishe lyenīlo, ūlū ūbona gīkī lītaalī kūsambaala hose hose ū mu mīlī, hama līlībonekana kūbiza higūlya gūlya dūhū, ū ngabīji akūbawīla a banhū gīkī ū munhū ng'wenūyo atī na makoye. Kwike akūfula ī shizwalo shakwe, hū ūbiza ng'wela.

³⁵Alīyo a banhū ūlū būmala kūwīlwa gīkī atī na makoye, hūna ī līgishe lyenīlo lyandya kūūgūsambaalīla ū mīlī,

³⁶Ū ngabīji akūūnola hangī, ūlū ūbona gīkī ī līgishe lyagūsambaalīlile ū mīlī, hū kūhaya ū munhū ng'wenūyo atigeleelilwe kwisangīja na banhū bangī; ū ngabīji atī na nguno ya kūlola ūlū būlīho hoi booya būbalalūku nūūlū ndūhū.

³⁷Kwike ū mu kabonele kakwe ū ngabīji ūlū ūbona gīkī ī līgishe lyenīlo lītagalūkīgije, hama na booya wapi wandije kūzwa hoi, hū kūhaya ī līgishe lyenīlo lyapīlile. Ū munhū ng'wenūyo atī na makoye, ū ngabīji akūbawīla a banhū gīkī alī ng'wela.

³⁸“Ūlū munhū ngosha nūūlū nkīma alī na mabalà ha mīlī gwakwe ga būūku ūku,

³⁹Ū ngabīji akūgalola chiza a mabalà genayo, ū būūku wago ūlū būbiza wa nyabalalūku, a genayo gang'wilongelile mabūhele dūhū, gatī na būbi; ū munhū ng'wenūyo atī na makoye.

⁴⁰“Hama nūūlū munhū ūpalūka wanga, jūshila ī nzwīlī ū kū ntwe gwakwe, nang'hwe ū ng'wenūyo alī ng'wela.

⁴¹Nūūlū ūbiza jahūlūlūkile ī nzwīlī ūpalūka wanga kwandīja kū būshu, nahene alī ng'wela dūhū.

⁴²Alīyo ūlū ligela ibbado ibalalūku a ha wanga nūūlū a ha būshū wakwe, ū wenūbo būsaatu wa kūdūla kūtūlīla na banhū bangī; wafumīlile ha wanga nūūlū ha būshū.

⁴³Ū ngabīji akūūnola chiza, ī libbado lya būsaatu īlo līlī ha wanga nūūlū a ha būshū wakwe ūlū ūlībona gīkī līlī na būūpe būbalalūku, nīyo līlīboneka gītī ibimba īlo adūgije kūbatūlīla na bangī,

⁴⁴numho nsaatu ū munhū ng'wenūyo, atigeleelilwe kwisangīja na banhū bangī; ū ngabīji akūbawīla a banhū gīkī shitigelile kwisangīja na banhū bangī, nguno ya būsaatu ūbo būlī ha ntwe gwakwe.

⁴⁵“Na lūūlū, ū munhū ūyo alī na būsaatu wa gīko, ūbo adūgije kūbatūlīla banhū, akūzwala shizwalo shitandagūkile,[10] nī nzwīlī jakwe jikala jisakaalile; hanuma akwikundīkīja ū kū būshū wakwe, kwandīja kū nindo kwika kū shilezu; hūna ūyūhamuka akūhayaga, ‘Nalī nsoso! Nalī nsoso’!

⁴⁶Ū mu shikū jose ījo akūbiza nabo ū būsaatu wenūbo, akūbiza atigeleelilwe kwisangīja na a banhū a bangī; akwikala asūngūlilwe iyene gīko alī hanze ya ng'hambī.”

⁴⁷“Ūlū shizwalo shose shose shūsosohajiwa booba,[11] ni shibizage sha booya wa ng'holo nūūlū sha kitaani,

⁴⁸nūūlū shitambaala sha kitaani nūūlū sha booya wa ng'holo, nūūlū ng'wenda gūsumilwe mu kashibanīje ka būgaliili būtaale nago gwa kitaani nūūlū gwa booya wa ng'holo; nūūlū ndīlī, nūūlū shikolo sha kūbeejiwa kūfuma mu ndīlī;

⁴⁹Ū būsoso ūbo būlī mu shizwalo shenīsho nūūlū ū mu ndīlī yenīyo, nūūlū ū mu shitambaala shenīsho, nūūlū ū mu ng'wenda ūyo gūsumilwe chiza gwenūyo, nūūlū mu shikolo sha kūbeejiwa kūfuma mu ndīlī, ū būsoso wenūbo ūlū wikola na lūgogà lūnīlīzu, nūūlū gītī lūbuubu lūbalalūku, ū wenūbo booba. Ī shikolo shenīsho shitwalwe kūlī ngabīji shikalolwe.

⁵⁰Ū ngabīji akūbūlola ū booba wenūbo, hūna ī shikolo īsho shilī na booba ūshitūūla h'ipandī lya iyene shikū mpungatī.

⁵¹Ū mu lūshikū lwa mpungatī akūshilola, ū booba ūlū būūsangwa wasambaalile na kūngī ū mu shizwalo shenīsho, nūūlū ū mu shitambaala shenīsho, nūūlū mu ng'wenda ūyo gūsumilwe mu kashibanīje ka būgaliili būtaale gwenūyo, nūūlū ū mu ndīlī yenīyo; ī shikolo shenīsho nūūlū shikabiza sha kūtūmamīlwa mu nīmo kī shilī shisoso, nguno shilī na booba ūbo būdūgije kūkenaagūla.

⁵²Na lūūlū, ū ngabīji akūshiponeja mu moto ī shizwalo shenīsho shijige, nūūlū ī shitambaala, pyī nūūlū ng'wenda gwa mbika yīngī ūyo gūsumilwe mu kashibanīje ka būgaliili būtaale; ī shikolo shenīsho ni shibizage sha booya wa ng'holo nūūlū sha kitaani, nūūlū shibeegije kūfuma mu ndīlī, shose shose īsho shilī na būsoso wenūbo, shiigelile shipemve mu moto. Nguno ū booba wenūbo būlī na būdūla wa kūkenaagūla.

⁵³“Alīyo ū ngabīji ūlū ūshilola hūna ūbona gīkī ū booba būtaalī ū kūsambaalīla na kūngī ū mu shizwalo shenīsho nūūlū ū mu shitambaala shenīsho, nūūlū mu ng'wenda ūyo gūsumilwe kasumīle ka būgaliili būtaale, nūūlū ū mu shikolo sha kūbeejiwa kūfuma mu ndīlī,

⁵⁴akūlagīja gīkī ī shikolo shisoso shenīsho shifulwe. Hanuma akūshitūūla h'ipandī lya heeke shikū jingī mpungatī.

⁵⁵Ī shikolo shisoso shenīsho ūlū shūūmala ū kūfulwa, ū ngabīji ūshilola, ūlū ūbona gīkī ū booba wenūbo būtaalī būlīho, nūūlū būkabiza būtongejaga kūkwīīla, nūūlū būbiza būlī ipandī līmò dūhū nūūlū kose kose, ī shikolo shenīsho shikūpemva mu moto, nguno shilī shisoso.

⁵⁶Alīyo ī shikolo shenīsho ūlū shūmala kūfulwa hūna ū ngabīji ūshilola ūbona gīkī ū booba wageehaga, akūlītīna ī lipandī īlo līlī na booba ūlyīnja a ha shizwalo shenīsho, nūūlū a ha ndīlī yenīyo, nūūlū ha shitambaala shenīsho, nūūlū ha ng'wenda ūyo gūsumilwe mu kashibanīje ka būgaliili būtaale.

⁵⁷Alīyo ū būsoso wenūbo ūlū wilonga hangī a ha shizwalo shenīsho nūūlū a ha shitambaala shenīsho, nūūlū a ha ng'wenda ūyo gūsumilwe mu kashibanīje ka būgaliili būtaale gwenūyo, nūūlū a ha shikolo sha ndīlī shenīsho; hū kūhaya ū būsoso wenūbo būlongeja ū kūkwīla, na lūūlū shose shose īsho shilī na booba shenīsho, shipembagi mu moto.

⁵⁸Ī shizwalo nūūlū ī shitambaala, nūūlū ū ng'wenda ūyo gūsumilwe mu kashibanīje ka būgaliili būtaale, nūūlū shikolo shose shose sha ndīlī īsho shamalaga kūfulwa shīngījiwa ū booba, īkwigeleelwa shifulwe hangī; hūna shikūbalwa gīkī shitī na būsoso.”

⁵⁹Ī shenīshi h'ī shilagīlo īsho shiigelile kūding'wa, kūlwa mihayo ya būsoso wa kwenhelejiwa booba mu shizwalo sha booya wa ng'holo, nūūlū mu myenda ya kitaani, nūūlū mu shitambaala; pyī nūūlū mu ng'wenda gūsumilwe mu kashibanīje ka būgaliili būtaale, nūūlū ni shikolo shose shose sha ndīlī, ūlū yiigeleelwa shihayiwe gīkī shilī sheela nūūlū shitī sheela.