Read Sukuma Bible 2015 – Bibilia Ilagano Lya Kale 2015 Bagabīji 15 Bible Online

Bagabīji 15 - Sukuma Bible 2015 – Bibilia Ilagano Lya Kale 2015 bible

Bagabīji 15

¹Ū SEEBA ūbawīla a ba Musa nū Alooni,

²Lūngalūngagi nabo a Baisilaeli mubawīle gīkī, “Ūlū munhū ngosha ūsaata būsaatu bo kūfuma minzī minzī mu mīlī gwakwe, īsho shilīmfuma shenīsho shilī shisoso.

³Nū wei shikūng'wenheleja kūbiza nsoso, shibize shikūselaga būl'ikanza, nūūlū ū mīlī gwakwe gwachibije; alī nsoso ū ng'wenūyo.

⁴Ū munhū ūyo būsoso būkūmfumaga mu mīlī ūlū ūlaala ha būlīīlī, ūbūlobya nī shisho shikūmfumaga, būkūsosohala; nūūlū wigaasha ha shikolo shose shose, shikūsosohala.

⁵Ose ose ūyo ūbūkuumya ū būlīīlī wa munhū ng'wenūyo, akūbiza nsoso; akūfula ī shizwalo shakwe, ooga na kooga mu minzī, hūna wikala alī nsoso gīko kūshisha līīmi kūlibīla.

⁶Ose ose ū wa kwigaasīja shikolo īsho shaalī shigaasījiagwa na munhū akūfumagwa būsoso, akūfula ī shizwalo shakwe, ooga na kooga mu minzī; hūna wikala alī nsoso gīko kūshisha līīmi kūlibīla.

⁷Nūūlū ose ose ūyo ūnkuumya munhū ūyo akūfumagwa būsoso, akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

⁸“Ū munhū ūyo akūfumagwa būsoso ūlū ūng'wigaasīja munhū, ūyo wigaasījiagwa ng'wenūyo akūfula ī shizwalo shakwe, ooga na kooga mu minzī; hūna wikala alī nsoso gīko kūshisha līīmi kūlibīla.

⁹Ū munhū ng'wenūyo ūlū wigaasīja shose shose alī mu lūgendo,[13] īsho alashigaasīje shikūsosohala.

¹⁰Na būlī ose ose ūyo ūshikuumya ī shikolo īsho shaalī shigaasījiagwa na munhū wa kūfung'wa būsoso, nang'hwe akūbiza nsoso kūshisha līīmi kūlibīla; ū wa kūshibūūcha ī shikolo shenīsho akwigeleelwa kūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

¹¹Ū munhū ūyo akūfumagwa būsoso ūlū ūnkuumya munhū ose ose alīyo atakalabile a makono gaakwe, ūyo wakuumiagwa ng'wenūyo akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

¹²Ū munhū ng'wenūyo ūlū ūkuumya nungū, īkūbelagūlwa; ūlū shiseme sha līntī shikoojiwa mu minzī.

¹³“Ū munhū wa kūfung'wa būsoso ūlū ūpīla, akūdīīla shikū mpungatī alī ng'wikanza lya kwejiwa; ūfula ī shizwalo shakwe, ooga nū mīlī gwakwe mu minzī ga kūsela, hūna wela.

¹⁴Ū mu lūshikū lwa kanaane akūsola mhunda ibīlī nūūlū ng'hune ibīlī ja ng'hūūlū wiza najo kū būtongi wang'wa SEEBA, ū kū nyango gwiheema lya kwibilingīla, ūng'winha ngabīji.

¹⁵Ū ngabīji akūjisīnza, īmò kūlwa shitambò sha shibi, ī yīngī yūbiza shitambò sha kūpemva. Ū mu nzīla yenīyo ū ngabīji akūmeegeja isangī kūlī SEEBA, kūlwa nguno ya būsaatu wakwe ū wa kūfung'wa būsoso.

¹⁶“Ū ngosha ūlū wiloteela, akooga mu minzī pyī ū mīlī; hūna wikala alī nsoso gīko kūshisha līīmi kūlibīla.

¹⁷Ng'wenda gose gose ūlū ūgwilooteelela shiigelile gūfulwe, ūlū ndīlī yoojiwe; shikwikala shilī shisoso gīko kūshisha līīmi kūlibīla.

¹⁸Ū ngosha ūlū ūlaala na nkīma, a bose būbīlī wabo īkūbigeleelwa kooga mu minzī, hūna bakwikala basoso gīko kūshisha līīmi kūlibīla.

¹⁹“Ūlū nkīma wingīla ng'wikanza lyakwe lya ng'weji, akūbiza nsoso ikanza lya shikū mpungatī kūlwa mininga gaakwe. Ose ose ūyo ūnkuumya akūsosohala kūshisha līīmi līlibīle.

²⁰Ū ng'wikanza lya būsoso bokwe, shose shose īsho ūshilaalīla shikūsosohala, na būlī shene īsho ūshigaasīja shikūsosohala.

²¹Ose ose ūyo ūkuumya būlīīlī wakwe ū nkīma ng'wenūyo, akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

²²Nūūlū munhū ose ose ūkuumya shikolo īsho shigaasījiagwa nū nkīma ng'wenūyo, ū munhū ng'wenūyo akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

²³Nūūlū ūbiza walī wigaashaga ha būlīīlī, hūna munhū ūbūkuumya, ū munhū ng'wenūyo akūbiza nsoso kūshisha līīmi līlibīle.

²⁴Nūūlū ngosha ūlaala nū nkīma ng'wenūyo hūna gūnkuumya a mininga ga ng'wikanza lyakwe, ū ngosha ng'wenūyo akūbiza nsoso kūshisha shikū mpungatī; na būlī būlīīlī ūbo ūbūlaalīla būkūsosohala.

²⁵“Ū nkīma ūlū ūbiza mu makoye ga kūfuma mininga ikanza lya shikū ningī īlo lītī mu shikū ja ng'weji gwakwe, nūūlū a mininga ga ng'wikanza lyakwe gūūfuma kūshisha kūlībīta ī likanza lyenīlo, akūbiza nsoso pyī ī likanza īlo akūfumagwa mininga; akwīta gīt'ūmo akīītīlaga mu shikū jakwe ja ng'weji.

²⁶Būlīīlī bose bose ūbo ūbūlaalīla aho ataalī akūfumagwa mininga būkūbiza būsoso, gīt'ūmo būkabizīlaga ū mu shikū jakwe ja ng'weji; na būlī shikolo īsho ūshigaasīja shikūbiza shisoso, gīt'ūmo shikabizīlaga mu shikū jakwe ja ng'weji.

²⁷Ose ose ūyo ūshikuumya akūbiza nsoso, akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

²⁸“Ūlū ūpīla wīnga ū mu makoye gaakwe genayo, akūlinda jibīte shikū mpungatī hūna wandya kūbalwa gīkī alī ng'wela.

²⁹Ū mu lūshikū lwa kanaane akūsola mhunda ibīlī, nūūlū ng'hune ibīlī ja ng'hūūlū ūjenha kūlī ngabīji, kū nyango gwiheema lya kwibilingīla.

³⁰Ū ngabīji akwīfunya īmò yajo kūbiza shitambò sha shibi, ī yīngī shitambò sha kūpemva. Ū mu nzīla yenīyo ū ngabīji akūmeegeja isangī kūlī SEEBA, kūlwa būsoso bokwe nguno ya makoye gakwe ga kūfung'wa mininga.

³¹“A Baisilaeli mukūbalekanya nabo ū būsoso wabo mu nzīla yenīyo, batizūchīla mo ū mu būsoso wabo, na kūlīsosohaja ī lipandī lyane ī lya kwikala, īlo līlī hamò nabo.

³²Ī shilagaīlo shenīshi shilī kūlwa būlī ngosha ūyo ūsaata būsaatu wa kūfung'wa būsoso mu mīlī, nūūlū ūyo wisosohaja kūlwa kwilooteela;

³³na kūlwa būlī nkīma ūyo alī ng'wikanza lyakwe lya ng'weji, na ose ose, ngosha nūūlū nkīma, ūyo akūfumagwa būsoso mu mīlī gwakwe; nūūlū ngosha ūyo ūlaala na nkīma alī ng'wikanza lyakwe lya būsoso.”