Read Sukuma Bible 2015 – Bibilia Ilagano Lya Kale 2015 Bagabīji 17 Bible Online

Bagabīji 17 - Sukuma Bible 2015 – Bibilia Ilagano Lya Kale 2015 bible

Bagabīji 17

¹Ū SEEBA ūng'wīla ū Musa alīhaya,

²Ng'wīlage ū Alooni na a bitūnja bakwe, hamò na a banhū a bose gīkī, “Ī shilagīlo īshi walagīlile SEEBA gīkī,

³‘Munhū ose ose ū mu Baisilaeli ūlū alī mu ng'hambī nūūlū hanze ya ng'hambī, hūna ūsīnza ng'ombe nūūlū ng'holo, nūūlū mbūli,

⁴alīyo ūbiza atayenhile kū nyango gwiheema lya kwibilingīla kwiza kwīfunya shakwinha kūlwa ng'wa SEEBA, ū munhū ng'wenūyo akūbalīlwa būhūbi kūlwa mininga, witaga mininga; shiigelile akomanyiwe wīnjiwe ū mu banhū bakwe.’

⁵Ū gwenūyū shiigelile gūje gīko kūlwa gīkī, ī mitugo ījo Baisilaeli balūsīnzīlaga kū matogolo, bayūjenha kū būtongi bo ng'wa SEEBA bamfunīja shakwinha. Shibigelile kūyūjenha kū nyango gwiheema lya kwibilingīla, biza bang'winha ngabīji jafunyiwa kūlwa ng'wa SEEBA kūbiza shakwinha sha būsangī.

⁶Ū ngabīji akūgaseeseebela a mininga ha ng'walīlo go ng'wa SEEBA ūyo gūlī ha nyango gwiheema lya kwibilingīla; a masazu ūgapemba gūbiza shakwinha sha ng'waso gwawiza kūlī SEEBA.

⁷Yaya ū kwikala būfunya shakwinha shabo kū magulyati ayo bagagīmbile kūbiza ma mulungu gabo. Ī shilagīlo shenīshi shilī sha būja na būja kūlwa nguno yabo, nī shibyalīlwe īsho shiliza.

⁸Bawīlage gīkī, ‘Munhū ose ose ūyo ūfunya shakwinha sha kūpemva nūūlū shitambò, abize ūmò wa Baisilaeli, nūūlū ngeni ūyo akwikalaga hamò nabo,

⁹alīyo ūleka kūshenha kū nyango gwiheema lya kwibilingīla kwiza kūshifunya kūlwa ng'wa SEEBA, ū munhū ng'wenūyo shiigelile akomanyiwe wīnjiwe ū mu banhū bakwe.’

¹⁰“Munhū ose ose ūlū ūlya mininga akūnipelanya; ūyo ūlya mininga, nene ng'wenekele nakūbiza ng'wilwisha wakwe ū ng'wenūyo, abize ūmò wa Baisilaeli nūūlū ngeni ūyo akwikalaga hamò nabo, nakūnkomanya winge gete ū mu banhū bakwe.

¹¹Ū būpanga wa shiseeng'wa būlī mu mininga, hūna lūūlū ū nene nang'winhile a mininga gatūmame ha ng'walīlo kūtūūla isangī kūlwa būpanga wing'we; a mininga hū gene ayo gakatūūlaga isangī kūlwa nguno ya būpanga wa munhū.

¹²Na lūūlū nalībahūgūla a Baisilaeli, ‘Atizilonga nūūlū ūmò wing'we wa kūlya mininga, nūūlū akabiza ngeni ūyo akwikalaga hamò ning'we, atizūūlya mininga na hado yaya.’

¹³“Nīyo hangī nūūlū ose ose, abize ūmò wa Baisilaeli nūūlū ngeni ūyo akwikalaga hamò ning'we, ūlū ūja kūhīīga hūna ūbūlaga ndimu nūūlū noni īyo īzunīlījiwe kūlyiwa, shiigelile agasūlūlūkīje hasī a mininga gayo, ūgafukīīla na masalū;

¹⁴nguno ū būpanga wa shiseeng'wa shose būlī mu mininga gasho. H'ī nguno yeene nalībawīla a Baisilaeli, “Yaya kūlya mininga ga shiseeng'wa shose shose, nguno ū būpanga wa shiseeng'wa shose na shose būlī mu mininga gasho; ū wa kūlya mininga shing'wigeleelilwe kūkomanyiwa na kwīnjiwa ū mu banhū bakwe.

¹⁵Na būlī munhū ose ose, abize myalīlwa mu sī ying'we nūūlū ngeni, ūlū ūlya nyama ya shikolo sha kūcha shoi shenekīlī, nūūlū sha kūbūlagwa mashiinū, akūfula ī shizwalo shakwe, ooga na kooga mu minzī. Akūbiza nsoso kūshisha līīmi līlibīle; hūna ū kwandīja henaho ūbiza ng'wela.

¹⁶Alīyo ūlū ūleka kūfula ī shizwalo shakwe nū kooga ū mīlī gwakwe, akūbalwa kūbiza nkenaagūji.”