Read Sukuma Bible 2015 – Bibilia Ilagano Lya Kale 2015 Bagabīji 18 Bible Online

Bagabīji 18 - Sukuma Bible 2015 – Bibilia Ilagano Lya Kale 2015 bible

Bagabīji 18

¹Ū SEEBA ūlūngalūnga nū Musa ūhaya,

²Bawīlage a Baisilaeli gīkī, “Ū nene nalī SEEBA Mulungu wing'we.

³Yaya a bing'we ū kwīta ūmo bakīītīlaga mu sī ya Misili, ūko ng'walikalaga; nūūlū yaya kwīta gīt'ūmo bakīītīlaga mu sī ya Kanani, ūko nalīmutwaala. Yaya ū kūshilondeela ī shītīle shabo.

⁴Shidimagi ī shilagīlo shane, nīyo mushimīzīle mu katongeelele kane mu witegeleja. Ū nene nalī SEEBA Mulungu wing'we.

⁵Shidimagi ī shilagīlo shane na a katongeelele kane; nguno būlī ng'wene ūyo ūzunya kūshimīzīla musho, akūbiza mpanga mu nzīla yasho. Ū nene nalī SEEBA.

⁶“Atizilonga nūūlū ūmò wa kūlaala na ndūgūye wa bbihī. Ū nene nalī SEEBA.

⁷Yaya kūng'wibengeleja so mu nzīla ya kūlaala na noko; ūtizūgima kūlaala nang'hwe, nguno ū ng'wenūyo noko.

⁸Hama yaya nū kūlaala na noko ng'wīnga; ū mhayo gwenūyo gūlī gwa kūng'wibengeleja ū so.

⁹Yaya kūlaala n'ilūmbūyo, mubize musangīlile sīng'we dūhū, nūūlū musangīlile nining'we dūhū; abize wa kūbyalīlwa ha kaya, nūūlū wa kūbyalīlwa kūngī. Yaya kūlaala nang'hwe ū ng'wenūyo.

¹⁰Hama yaya nūūlū kūlaala na ng'wizūkūlū wako, ūyo alī nshīke wa ng'witūnja wako, nūūlū wa nshīke wako; yaya kūlaala nabo a benabo nguno ū mhayo gwenūyo gūgūkūponda soni ū bebe.

¹¹“Nūūlū ū ilūmbūyo wa kūbyalwa na so kūfuma mulī noko ng'wīnga, yaya ū kūlaala nang'hwe; nguno alī ilūmbūyo.

¹²Nūūūlū kūlaala na sengiyo yaya; nguno ū ng'wenūyo ilūmbūye[15] o ng'wa so.

¹³Nū ng'wana wa ng'wawe o ng'wa mayū wako yaya kūlaala nang'hwe; nguno alī nkūlūye nūūlū nzunaye o ng'wa mayū wako.

¹⁴Yaya kūng'wibengeleja so ntaale nūūlū ū ndo mu nzīla ya kūlaala na nke wakwe; nguno ū ng'wenūyo noko.

¹⁵Yaya kūgima kūlaala na ng'wīnga wako, nguno ū ng'wenūyo nke wa ng'witūnja wako; yaya gete ū kūlaala nang'hwe.

¹⁶Hama yaya nūūlū kūlaala na nkwelayo; nguno ūkūbiza ūlīng'wibengeleja ū ng'wana wa ng'wing'we.

¹⁷Nū kūlaala na nkīma, hama wīta walaala na nshīke wakwe, nī chene yaya; yaya gete nūūlū kūsangīlīja na ng'wizūkūlū wakwe wa kūbyalwa na ng'witūnja wakwe, nūūlū wa kūbyalwa na nshīke wakwe. Ū gwenūyo gūlī mhayo gwa malofu; nguno a benabo badūgū bako ba bbihī.

¹⁸Hama yaya kūlaala na nkīma ūyo ng'wana wa ng'wawe ūntoolile; ūtizūgema kūlaala nang'hwe aho ng'wana wa ng'wawe alīho mpanga.

¹⁹“Ū nkīma ūlū alī mu shikū jakwe ja ng'weji yaya kūng'wegeela gīkī ūlaale nang'hwe.

²⁰Yaya kwisosohaja na nke nzenganwa[16] ng'wiyo mu nzīla ya kūshihya nang'hwe.

²¹A bana bing'we yaya ū kūbinha gīkī bayūfunyiwa kūlī Moleki kūbiza shitambò sha kūpemva; nguno mukūlīsosohaja ī lina lya ng'wa Mulungu wing'we. Ū nene nalī SEEBA.

²²Ū ngosha yaya kūlaala na ngosha ng'wiye gītī kūlaala na nkīma; ī yenīyo soso yabūbi no.

²³Yaya kwisosohaja na shiinū mu nzīla ya kūlaala nayo; nū nkīma yaya kwifunya kūlaala na shiinū, ū gwenūyo mhayo gwa būjimīīji.”

²⁴“A bing'we yaya ū kwisosohaja mu mhayo nūūlū gūmò gwa yenīyī, nguno ī yenīyī h'ī mihayo īyo yageenheleja kūsosohala a mahanga ayo nalīgapeeja gang'wīngīle a bing'we.

²⁵Nī sī bakīsosohaja kūshisha nūyīgwisīja nsango kūlwa shibi shaamo, yūbaswa a bazengi baamo na kale.

²⁶Alīyo a bing'we shing'wigelile mushilang'hane ī shilagīlo shaane, na a katongeelele kane. Yaya ū kwīta ī mihayo ya malofu gīko a bing'we bana byalwa, nūūlū a bageni abo bakwiza kwikala hamò ning'we.

²⁷Nguno pyī ī mihayo yenīyī yītagwa na a mahanga ayo gikalaga ū mu sī yenīyo aho mutaalī a bing'we ū kūja kwikala mo, h'ī chene ī sī īkasosohala.

²⁸Na a bing'we ūlū muyīsosohaje ī sī yenīyo, īkūmuswa gīt'ūmo yabaswīīla a banhū ba mahanga ayo gikalaga mo aho mutaalī kwingīla mo a bing'we.

²⁹“Na lūūlū ose ose ūyo wīta mihayo ya malofu gītī yenīyī, akūkomanyiwa wīnjiwe ū mu banhū bakwe.

³⁰A bing'we londeelagi gete a katongeelele kane, yaya ū kūshimīzīla mu shītwa sha malofu īsho shītagwa aho mutaalī a bing'we ū kwiza mo; mutizisosohaja mu nzīla ya mihayo yenīyo. Ū nene nalī SEEBA Mulungu wing'we.”