Read Sukuma Bible 2015 – Bibilia Ilagano Lya Kale 2015 Bagabīji 2 Bible Online

Bagabīji 2 - Sukuma Bible 2015 – Bibilia Ilagano Lya Kale 2015 bible

Bagabīji 2

¹Ūlū munhū wenha shakwinha sha būsu kūlwa ng'wa SEEBA, ī shakwinha shakwe būkūbiza būsu būnogu, ūwitīīla na maguta a higūlya, hūna ūbūtūūlīla na būbbani.

²Hanuma ūbatwalīla bitūnja ba ng'wa Alooni, a bagabīji; ū ngabīji akūsola būsu būgehu mu shiganza, hamò na a maguta, nū būbbani ū bose. Ī shenīsho akūshipemba ha ng'walīlo shibize shiizūkījo; ī shenīsho shakwinha sha kūfunyiwa mu nzīla ya moto, sha ng'waso gwa kūnyeja SEEBA.

³Ū būsu bo shakwinha shenīsho ūbo būkūsaaga, bo ng'wa Alooni na bitūnja bakwe; ī shoi shilī shakwinha sheela no no no; ibbudīka lya shakwinha īsho shikafunyiagwa kūlwa ng'wa SEEBA mu nzīla ya moto.

⁴Ūlū wenha shakwinha sha būsu mu mbika ya shikolo shizugile ng'wizugīlo lya būgubbanīje, shikūbiza sha būsu būnogu. Jibize keki ja būsu būtī na shibimbya būsangije maguta, nūūlū migatī mikalamuku; nayo ya būsu būtī na shibimbya, īchaagije maguta.

⁵Ī shakwinha shako sha būsu ūlū shikalangilwe h'ikalangīlo, shikūbiza sha būsu būnogu būsangije maguta, būtī na shibimbya.

⁶Ūkūshipondagūla shimenyagūke, hūna ūshitūūlīle maguta; ī shenīsho shilī shakwinha sha būsu.

⁷Ī shakwinha shako sha būsu ūlū sha kūzugwa mu shiseme shigalī galī, shikūbiza sha būsu būnogu būlī na maguta.

⁸Ī shakwinha sha būsu īsho shibeejiwe kūfuma mu shikolo shenīshi, ūkūshenha kū būtongi bo ng'wa SEEBA, ūng'winhe ngabīji ashitwale ha ng'walīlo.

⁹Ū kūfuma ū mu shakwinha sha būsu shenīshi, akūsola shigehu sha kwizūkīja, hūna ashipembe ha ng'walīlo shibize shakwinha sha kūfunyiwa mu nzīla ya moto, sha ng'waso gwa kūnyeja SEEBA.

¹⁰Ū mu shakwinha sha būsu shenīsho, īsho shilasaage shilī sha ng'wa Alooni na bitūnja bakwe; ī shoi shilī ibbudīka lya shakwinha sheela no no no, īsho sha kūfunyiwa kūlwa ng'wa SEEBA mu nzīla ya moto.

¹¹Būlī shakwinha sha būsu īsho ūkūmfunīja SEEBA shikūbiza shitī na shibimbya. Yaya gete kūpemba shibimbya nūūlū būūkī ū mu shakwinha shose shose īsho ūlīmfunīja SEEBA, mu nzīla ya moto.

¹²Kwike ī shoi ūdūgije ū kūshenha ū kū būtongi bo ng'wa SEEBA, gītī shakwinha sha matwajo ga kwandya, alīyo shitī sha kūfunyiwa ha ng'walīlo gītī sha ng'waso gwa kūyeja.

¹³Pyī ī shakwinha shako sha būsu ūkūyūshisanja na munhu. Ū mu shakwinha shako sha būsu yaya ū kūleka kūtwīīla mo ū munhu gw'ilagane lya ng'wa Mulungu wako; ī shakwinha shako pyī ī shose ūkūyūshitwīla munhu.

¹⁴“Ūlū wenha kū būtongi bo ng'wa SEEBA matwajo ga kwandya kūbiza sha shakwinha sha būsu, funyaga būsu wa kūfuma mu mbeke ja mangala mapya, ga kwanikīlwa ha moto gūūma hūna ī mbeke jūshiiwa.

¹⁵Ū būsu wenūbo ūkūbūtūūlīla maguta na būbbani; ī shoi shilī shakwinha sha būsu.

¹⁶Ū ngabīji akūpemba ibbudīka lya būsu wenūbo, shibize shiizūkījo, na a maguta nū būbbani ū bose ūbo būlīho hoi; shibize shakwinha sha kūfunyiwa kūlwa ng'wa SEEBA mu nzīla ya moto.”