Read Sukuma Bible 2015 – Bibilia Ilagano Lya Kale 2015 Bagabīji 20 Bible Online

Bagabīji 20 - Sukuma Bible 2015 – Bibilia Ilagano Lya Kale 2015 bible

Bagabīji 20

¹Ū SEEBA ūng'wīla ū Musa,

²Bawīlage a Baisilaeli gīkī, “Munhū ose ose ū mu Baisilseli ūlū ūmfunya ng'wana wakwe kūbiza shitambò kūlī Moleki, ū ng'wenūyo shiigelila abūlagwe, ni abizage ng'wana byalwa, nūūlū ngeni ūyo akwikalaga mu sī ying'we. A banhū ba ng'wigūngūli lyakwe hū bene bakūmūlaga bo kūmponda mawe.

³Nīyo ū nene nakūbiza ng'wilwisha wakwe ū munhū ng'wenūyo, nankomanye winge gete ū mu banhū bakwe. Nguno ū wa kūfunya baana bakwe babize shitambò kūlī Moleki, akūbiza walīsosohaja ī lipandī lyane ī lyeela, na wagimaga kūkenaagūla lina lyane.

⁴A banhū ba ng'wigūngūli lyakwe ū munhū ng'wenūyo ūlū būmona alīmfunīja Moleki nūūlū ūmò wa baana bakwe, alīyo hū būleka ū kūndīlīla; būleka kūmūlaga,

⁵nene ng'wenekīlī nakwilwisha nang'hwe ū munhū ng'wenūyo, hamò nī kaya yakwe, pye na a babo bakūsangīlaga nang'hwe ū mu wīmīlīzu wa kūnondeela Moleki; nakūbakomanya bīnge gete ū mu banhū babo.

⁶“Nūūlū munhū ūgalūkīla mihayo ya bachūūja na ya banhū abo basanije nguzu ja masamva, wandya kūyūja akūtagaalījaga kūbalondeela banhū balī gīko, ū ng'wenūyo nag'hwe nakūbiza ng'wilwisha wakwe ū nene; nakūnkomanya wīnge ū mu banhū bakwe.

⁷Na lūūlū iyeejagi bing'we benekīlī mubize beela; nguno ū nene nalī SEEBA, Mulungu wing'we.

⁸Īdimagi īyo naamuhelelaga, mushimīzīle muyo; ū nene nalī SEEBA ūyo akūng'wītaga mubize beela.

⁹“Ū munhū wa kūndūka ise nūūlū nina, shiigeleelilwe abūlagwe; nguno wandūkaga ise nūūlū nina. A mininga gaakwe gakwidīka kūlwa nguno yakwe wei ng'wenekīlī.

¹⁰“Ūlū munhū ūlaala na nkīma atoolilwe, akūbiza washihyaga na nke wa nzenganwa ng'wiye, ū ngosha nū nkīma ng'wenūyo shiigelile babūlagwe būbīlī wabo.

¹¹“Nūūlū munhū ūlaala na nke o ng'wa ise, akūbiza wang'wibengelejaga ū ise; ū ngosha ng'wenūyo nū nkīma shiigelile babūlagwe būbīlī wabo. A mininga gabo gakwidīka kūlwa nguno yabo boi benekīlī.

¹²“Nū wa kūlaala na ng'wīnga wakwe, nang'hwe shiigelile abūlagwe; a bose būbīlī wabo shiigelile babūlagwe, nguno bīītaga mhayo gwa soso nhaale no. A mininga gabo gakwidīka kūlwa nguno yabo boi benekīlī.

¹³Ū ngosha ūlū ūlaala na ngosha ng'wiye gītī kūlaala na nkīma; a benabo būbīlī wabo bīītaga mhayo gwa soso nhaale no. Shiigelile babūlagwe, a mininga gabo gakwidīka kūlwa nguno yabo boi benekīlī.

¹⁴Ūlū munhū ūbatoola bakīma babīlī, munhū na nina, ū gwenūyo mhayo gwa būsoso; ū ngosha ng'wenūyo na a bakīma benabo, shiigelile babūlagwe bo kūpemva mu moto, muyīnje gete pyī ī mihayo ya būsoso ū mu bing'we.

¹⁵Ūlū ngosha ūlaala na shiinū, shiigelile abūlagwe; nī shiinū yeene mukwībūlaga.

¹⁶Nūūlū nkīma wifunya kūlaala na shiinū, shiigelile abūlagwe ū nkīma ng'wenūyo hamò nī shiinū yenīyo. A banhū ba gīko shiigelile kūbūlagwa; a mininga gabo gakwidīka kūlwa nguno yabo boi benekīlī.

¹⁷“Ūlū ngosha ūntoola ilūmbūye, nshīke o ng'wa ise nūūlū nshīke o ng'wa nina, ūmona dūūhū yakwe, nū nkīma ūmona dūūhū yakwe ū ngosha, ū mhayo gwenūyo gwa soni no. A banhū benabo īkwigeleelwa bakomanyiwe gete, bīnjiwe ū mu miso ga banhū babo. Ū munhū ng'wenūyo akūbiza wītile mhayo gwa soni ū kūl'ilūmbūye; ū būbi wakwe akūbūbūūcha wei ng'wenekīlī.

¹⁸Ūlū ngosha ūlaala na nkīma alī mu shikū jakwe ja ng'weji, ūmona dūūhū yakwe; akūbiza wabonaga minala ya mininga gakwe ū nkīma ng'wenūyo, ū nkīma nang'hwe akūbiza oolechaga minala ya mininga gakwe; a bose būbīlī wabo shibigelile bakomanyiwe gete bīnjiwe ū mu banhū babo.

¹⁹Yaya kūlaala na ng'wana wa ng'wawe o ng'wa mayū wako, nūūlū n'ilūmbūye lya ng'wa so, nguno ū mhayo gwenūyo gūlī gwa magooke ū kū banhū ba mu kaya. Bose būbīlī wabo bakūbūbūūcha ū būbi wabo boi benekīlī.

²⁰Ūlū munhū ūlaala na nke o ng'wa ise,[21] akūbiza wang'wibengelejaga ū ise; a bose būbīlī wabo bakūbūbūūcha ū būbi wabo, bakūcha na kūbyala yaya.

²¹Ūlū munhū ūntoola nke wa ng'wana wa ng'wawe, ū wenūbo būsoso, wang'wītīlaga ibengwe ng'wana wa ng'wawe. Bakūcha na kūbyala yaya. Banhū abo bakatūmamīlaga nguzu ja myoyo misoso mu kūgema kūlagūla banhū bangī, nūūlū kūbawīla īyo īlabilongele kū shikū ja kū būtongi.”

²²Gadimagi pye a malange gaane nī shilagīlo shaane, nīyo mushimīzīle musho gete; ītizūmuswa ī sī īyo nalīmutwala kwikala mo.

²³A bing'we yaya ū kūshimīzīla mu nhūngwa ja banhū abo nalībapeeja bang'wīngīle. Nguno a bene baayītaga pyī ī yenīyī, h'ī nguno yeene nabakolilwe.

²⁴Alīyo a bing'we nakamuwīla, “Nene ng'wenekīlī nakūng'winha ī sī yabo ng'wīdime, ībize wingīji wing'we; ī sī yenīyo ī ya būhondo ya kūsūlūlūcha būki na mabele[22] ū nene nalī SEEBA Mulungu wing'we; nene h'ūyo naamukomanya kūfuma mu mahanga.

²⁵“Na lūūlū īng'wigeleelilwe kūtūūla ho būlekanya a ha gatī ya ndimu ījo jibalilwe kūbiza jawiza nī jijo jitī jawiza; nī noni ī jawiza nī jitī jawiza. A bing'we yaya ū kwisosohaja mu nzīla ya shiinū yose yose, nūūlū noni yose yose; nūūlū ni mu nzīla ya shiseeng'wa shose shose īsho shikashimīzaga hasī, īsho nashihayile gīkī shilī shisoso ū kū bing'we.

²⁶Shiigelile mubize beela, nguno ū nene SEEBA nalī ng'wela; nene ng'wenekīlī naamukomanya kūfuma mu mahanga gīkī mubize banhū bane.

²⁷“Munhū ose ose, ngosha nūūlū nkīma, ūyo akikalaga mu bing'we alīyo ūbiza akīītaga nīmo gwa būchūūja, nūūlū gwa kūkooba būdūla kūfuma mu masamva, shiigelile abūlagwe. A banhū ba mbika yenīyo shiigeleelilwe muyūbabūlaga bo kūbaponda mawe; a mininga gabo gakwidīka kūlwa nguno yabo boi benekīlī.”