Read Sukuma Bible 2015 – Bibilia Ilagano Lya Kale 2015 Bagabīji 21 Bible Online

Bagabīji 21 - Sukuma Bible 2015 – Bibilia Ilagano Lya Kale 2015 bible

Bagabīji 21

¹Ū SEEBA ūng'wīla ū Musa, Bawīlage a bagabīji, a bitūnja ba ng'wa Alooni gīkī, “Ngabīji ose ose ītang'wigeleelilwe kwisosohaja[23] kūlwa munhū ūyo wazumalīkaga, nūūlū akabiza wa kūfuma mu banhū bakwe.[24]

²Numho abize wa mu kaya gete, gītī nina, ise, ng'witūnja wakwe nūūlū nshīke wakwe, na kūlwa nzunaye nūūlū nkūlūye.

³Adūgije ū kwisosohaja nūūlū kūlwa nguno ya ng'wilūmbūye ūyo atatoolilwe, ūlū akanang'hanaga wei.

⁴Ū ngabīji ītang'wigeleelilwe kwisosohaja kūlwa nguno ya banhū ba kū būkwiye.

⁵“Hama yaya kwihalūla ipala ha ntwe, nūūlū kūmoogeela ndezu mu mhelo mhelo; yaya nūūlū kwitema salago ha mīlī gwakwe.[25]

⁶Ū wei īng'wigeleelilwe kūbiza ng'wela ū kūlī Mulungu wakwe, yaya ū kūlīsosohaja ī lina lya ng'wa Mulungu wakwe. Nguno alī ng'wenhi wa shilīwa ū kūlī Mulungu wakwe, alī na nīmo gwa kūfunya shitambò kūlwa ng'wa SEEBA mu nzīla ya moto; na lūūlū ū ngabīji shing'wigeleelilwe kūbiza ng'wela gete.

⁷“Īkī ū ngabīji alī ng'wela ū kūlī Mulungu wakwe, na lūūlū atī wa kūtoola nkīma ng'wīmīlīzu, nūūlū ūyo wamala kūlaala na bagosha bangī, nūūlū wamala kūbūlaga numba.

⁸Būlī munhū shiigeleelilwe ang'wisaabe ū ngabīji gīkī alī ng'wela, nguno akenhaga shilīwa kūlī Mulungu wing'we. Ng'wisaabagi ū ng'wenūyo gīkī alī ng'wela, nguno ū nene SEEBA nalī ng'wela; ū nene ūyo nakang'wītaga bing'we kūbiza beela.

⁹“Hama ūlū nshīke wa ngabīji wisosohaja wei ng'wenekīlī mu nzīla ya wīmīlīzu, akūbiza wansosohajaga ise; na lūūlū ū ng'wenūyo wigeleelilwe kūbūlagwa wa kūpemva mu moto.

¹⁰“Ū ngabīji ntaale mu baana ba ng'wawe, ūyo wamala kwitīīlwa maguta ha ntwe gwakwe kūlwa kūtūūlwa ha nīmo, hūna ūshikīlījiwa ho a ha nīmo, ūbiza wa kūyūzwaala nī shizwalo sha nyagabīji, ū ng'wenūyo yaya ū kūjilekanīja ī nzwīlī jakwe jisakaale; yaya nūūlū kūtandūla shizwalo shakwe.

¹¹Atī wa kwegeela hose hose aho gūlī mimba; atī wa kwisosohaja nūūlū hado, nūūlū ni kūlwa nguno ya ng'wa ise nūūlū nina.

¹²Ū wei atī wa kwīnga na hado yaya ū ng'wipandī lyeela lya ng'wa Mulungu wakwe, yaya nūūlū kūlīsosohaja mu nzīla yose yose, nguno ū wei wamala kwejiwa kūlwa kwitīīlwa maguta ga ng'wa Mulungu wakwe; ū nene nalī SEEBA.

¹³“Ū nkīma wa kūtoolwa na ngabīji ntaale abize ataalī kūlaala na ngosha ūngī ose ose.

¹⁴Ū wei atī wa kūtoola nkīma wamala kūchīlwa, nūūlū wabūlaga numba, nūūlū ūyo wasosohajiwa wīmīlīzu; alīyo alī wa kūtoola nkīma wa kūfuma mu banhū bakwe, ūyo ataalī kūlaala na ngosha ose ose.

¹⁵Ū ngabīji ntaale atigeleelilwe kūsosohaja būbyīle wakwe ū mu banhū bakwe. Ū nene nalī SEEBA, ūyo nakabīītaga bagabīji kūbiza beela.”

¹⁶Ū SEEBA ūng'wīla ū Musa,

¹⁷Ng'wīlage ū Alooni gīkī, “Ū mu shibyalīlwe shose īsho shiliza, nemehazu ose ose ū mu būbyīle wako, atigeleelilwe kwegeela kūlī Mulungu wakwe kūfunya shilīwa.

¹⁸Būlī ng'wene ūyo alī na būlemehazu būlebe yaya ū kwegeela; mboku ose ose yaya, nūūlū nemehazu, nūūlū alī na būlema būlebe kū būshū,[26] nūūlū alī na gūgūlū gūmò, nūūlū nkono gūmò nīhu kūtinda ng'wichaago.

¹⁹Abize abīnzīkile kūgūlū nūūlū nkono, nū ng'wene yaya ū kwegeela.

²⁰Nūūlū wigembe ha ngongo, nūūlū nemehazu mu kakūlīle, nūūlū alī na songo, nūūlū wa būhele nūūlū malonda; nūūlū asoloolile.

²¹Atīho wa būbyīle wa ngabīji Alooni ūyo alī na būlemehazu wa mbika yose yose ū wa kūzunīlījiwa kwegeela kū būtongi bo ng'wa SEEBA kwiza kūfunya shakwinha mu nzīla ya moto. Īkī alī na būlemehazu, na lūūlū atizegeela kū būtongi bo ng'wa Mulungu wakwe kwenha shilīwa.

²²Kwike ī shilīwa īsho shikafunyiagwa kūlī Mulungu wakwe, ī sheela no no no, nī shingī īsho shikafunyiagwa, azunīlījiwe ū kūshilya.

²³Alīyoī īkī alī na būlemehazu, atazunīlījiwe kwegeela a hisenge lya ng'wipandī lyeela, nūūlū ū kwegeela a ha ng'walīlo; nguno adūgije kūlīsosohaja ī lipandī lyeela lyane. Ū nene nalī SEEBA ūyo nakabīītaga bagabīji kūbiza beela.”

²⁴Na lūūlū ū Musa ūng'wīla ū Alooni na a bitūnja bakwe, hamò na a Baisilaeli a bose ī mihayo yenīyī.