Read Sukuma Bible 2015 – Bibilia Ilagano Lya Kale 2015 Bagabīji 24 Bible Online

Bagabīji 24 - Sukuma Bible 2015 – Bibilia Ilagano Lya Kale 2015 bible

Bagabīji 24

¹Ū SEEBA ūng'wīla ū Musa,

²“Balagīlage a Baisilaeli bakwenhele maguta gawiza ga mizeituni,[28] ga kūtūmamīla mu tala, jiyūbaka būlī makanza.

³Ū Alooni akūyūjibeegeleja ī tala, ī hanze y'itundubaali l'isenge lya ng'wiheema lya kwibilingīla, īlo līshīkīgije isandīko lya būkaanīji; nguno shiigelile jibake kū būtongi bo ng'wa SEEBA būlī lūshikū, kwandīja mhīndī kūshisha ntondo yaho dilū. Ī shenīshi shilī shilagīlo sha kūshinga ho shikū jose, pyī ū mu shibyalīlwe shing'we īsho shiliza.

⁴Ī tala jenījo jidīlīlwe chiza aho jilī a h'ikīndīkīlo lya tala lya zahabu, jiyūbachiwa būlī lūshikū kū būtongi bo ng'wa SEEBA.

⁵“Hanuma ūkūsola būsu būnogu ūbeeje migatī ikūmi n'ībīlī; būlī kilo ibīlī ja būsu ngatī gūmò.

⁶Ī migatī yenīyo ūkwīhela ng'hīlīlī ibīlī kū būtongi bo ng'wa SEEBA, a ha meeza ya zahabu yawiza; būlī lūhīlīlī migatī ītandatū.

⁷Hūna ūkūtūūla na būbbani wawiza a ha būlī lūhīlīlī, būbize shakwinha sha kūpemva a ha ng'wanya gwa migatī yenīyo; sha kūfunyiwa kū būtongi bo ng'wa SEEBA kūlwa shiizūkījo.

⁸Būlī lūshikū lwa Sabato, ī migatī yenīyo īkūyūfunyiwa kūlwa Baisilaeli a bose, yatūūlwa kū būtongi bo ng'wa SEEBA. Ī lyenīlī līkūbiza ilagane lya shikū jose.

⁹Ī migatī yenīyo īkūbiza ya ng'wa Alooni na bitūnja bakwe, ya kūlya balī ng'wipandī lyeela, nguno īlī myeela no no no; gūlī ngabo gwabo gwa būlī lūshikū, kūfuma mu shitambò sha kūpemva īsho shikafunyiagwa kūlwa ng'wa SEEBA.”

¹⁰“Nsūmba nebe, ng'witūnja wa nkīma Ng'wisilaeli, ū ise walī muna Misili, lwise lūmò aho alī hamò na Baisilaeli mu ng'hambī, akikenya na ngosha ūmò Ng'wisilaeli.

¹¹Ū ng'witūnja wa Ng'wisilaeli ng'wenūyo witagūla mihayo misoso ya kūlīsondagūla ī lina lya ng'wa SEEBA; būndima būntwala kūlī Musa. (Ū nina witanagwa Shelomitī ng'wana Diibīli, wa lūganda lwa Dani).

¹²Ū nsūmba ng'wenūyo būnugalīla hanhū, kūshisha ū SEEBA aboolekeje hape ū gwa kūng'wītīla.”

¹³Hūna ū SEEBA ūng'wīla ū Musa gīkī,

¹⁴“Nfunyagi muntwale hanze ya ng'hambī ū nsondagūji, abo baang'wigwile batūūle makono gabo a ha ntwe gwakwe. Hūna pye a Baisilaeli bamponde mawe, ache.

¹⁵Nīyo bawīlage a Baisilaeli gīkī, ‘Ose ose ūyo ūlīsondagūla lina lya ng'wa Mulungu wakwe, akwingīla mu kwihīga.

¹⁶Būlī ng'wene ū wa kūlīsondagūla ī lina lya ng'wa SEEBA shiigelile abūlagwe. Nūūlū abize ng'wana byalwa ū mu sī ya Isilaeli, nūūlū ngeni, ūlū ūlinda ūlīsondagūla ī Lina, shiigelile abūlagwe; pye a banhū bakūmponda mawe.’

¹⁷“Nūūlū munhū ūntūla munhū kūshisha ūmūlaga, shiigelile abūlagwe nang'hwe.

¹⁸Ū wakūbūlaga ntugo gwa bangī, shiigelile alīpe; ī mihayo īkūyūja mu nzīla ya būpanga kūlwa būpanga.

¹⁹Na lūūlū nūūlū munhū ūnemehaja ng'wiye, ūmo wang'wītīlaga shiigelile nang'hwe ītwe gīko,

²⁰iguha kūlw'iguha, liso kūlwa liso, na lino kūlwa lino. Ūmo wanemehagījaga dūhū ū ng'wiye, nū wei akūlemehajiwa gīko.

²¹Ū wa kūbūlaga ntugo gwa bangī shiigelile alīpe ntugo; alīyo ū wa kūbūlaga munhū, ū ng'wene akūbūlagwa nang'hwe.

²²Shiigelile mubize na shilagīlo sha mbika īmò kūlwa banhū bose, babize bageni nūūlū bana byalwa. Ū nene nalī SEEBA Mulungu wing'we.”

²³Hūna ū Musa ūbawīla a banhū kūmfunya ū nsondagūji, būntwala hanze ya ng'hambī kūjūmponda mawe. A Baisilaeli bīīta gīt'ūmo SEEBA walī wanagīīlīla ū Musa.