Read Sukuma Bible 2015 – Bibilia Ilagano Lya Kale 2015 Bagabīji 26 Bible Online

Bagabīji 26 - Sukuma Bible 2015 – Bibilia Ilagano Lya Kale 2015 bible

Bagabīji 26

¹“Mutalizūgima kwibeegeja shikolo, nūūlū shiikolile shose shose, sha suso ya kīnhū, nūūlū ya munhū. Yaya nūūlū kwīmīlīja ng'hīngī ya mawe, nūūlū kūtūūla hose hose ū mu sī ying'we iwe lya kwiloleelwa na banhū. Yaya kwinama kū shikolo shilī gīko; ū nene nalī SEEBA Mulungu wing'we.

²Nī shilagīlo shane sha Sabato shidimagi n'ikūjo; hama nī lipandī lyane ī lyeela mulītūūlīle logohano. Ū nene nalī SEEBA.

³“Ūlū ng'ūshimīzīla ū mu malange gane, nī shilagīlo shane ng'ūshilondeela na welwa ng'holò,

⁴nakūmutūmīla ī mbula mu makanza gayo, nī sī īkūzwisha īsho shiigeli kūzwa; ī mitī ya mu matogolo nayo īkūtwaja a matwajo gayo.

⁵A makanza ging'we ga kūtūla shilīwa gakwiyingīlīīla na makanza ga kūhūlūla mizabibu; a makanza ga kūhūlūla mizabibu nago gakwiyingīlīīla na makanza ga kūlīma. Nīyo būlī shilīwa īsho mutogilwe mukūpandīka, mukūlya na mukwikala mhola ū mu sī ying'we.

⁶Nakūmutūūlīla mhola ū mu sī ying'we, mukūlaala na atigela wa kūng'ogohya. Nakūng'wīngīja a mashiinū a makenaagūji ū mu sī ying'we, nūūlū būlūgū būtīkoya ī sī ying'we.

⁷A banishi bing'we mukūbapyena mubapeeje, na kūbabūlaga.

⁸Nūūlū banhū batanò dūhū ū mu bing'we bakūpeeja banishi igana; a banhū igana ū mu bing'we bakūpeeja shihūmbī ikūmi. Nīyo mukūbabūlaga no a banishi bing'we.

⁹Nakūng'wītīla yawiza, na nakūng'wīta mubize bibyaji; nū wingī wing'we nakūbongeja no no no. Nakūlīshikīlīja ī lilagane lyane ū kū bing'we.

¹⁰Ī shilīwa shing'we shikūbiza sha kwisanga sanga; nose īkūyūng'wigeleelwa kūshiponya ī sha kale mupandīke ha kūtūūla ī shipya.

¹¹Nakūbeeja wikalo wa kwikala hamò ning'we; nīyo ū kūlī nene mutalasūūka na hado yaya.

¹²Nakūshimīza hamò ning'we, na nakūbiza Mulungu wing'we, na a bing'we mukūbiza banhū bane.

¹³Ū nene nalī SEEBA Mulungu wing'we ūyo wang'wenha kūfuma mu sī ya Misili, gīkī ng'oye kūbiza basese kū bana Misili. Nakalībīnzagūla ī lijoki ling'we muyūshimīza ng'wiyagaalūlaga.”

¹⁴“Alīyo ūlū ng'ūlema ū kūnidegeleka, nū kwīta pyī ī yose īyo nalīmulagīla,

¹⁵nūūlū ng'ūgalema a malange gane, nī shilagīlo shane ng'ūshidalaha, ng'ūlemeelwa ū kwīshikīlīja pyī īyo nalīmulagīla, nī lilagane lyane ng'ūlīkenaagūla,

¹⁶yīīyī īyo nakūng'wītīla: Nakūng'wenhela lyogohya lya kūng'wisanganīja, na mabūsaatu gatī ga kūpīla, na saata ja kūmukenaagūja miso na kūgogolohya mibīlī. Ī mbīyū mukūhamba ū mu migūnda ying'we alīyo mukūnogela dalali dūhū, nguno ī shilīwa īsho shilapye shikūlyiwa na banhū bangī.

¹⁷Nakūgalūka kūbiza ng'wilwisha wing'we, kūshisha a banishi bing'we bamupyeene kībi kībi; abo bamukolilwe bakūmusuga, na mukūyūpeela sagala nūūlū atīho wa kūmupeeja.

¹⁸“Ūlū nūng'winha nsango gīko alīyo ng'wikala mutaalī mulemile ū kūnidegeleka, ū nsango ūyo nakūng'winha kūlwa shibi shing'we nakūgongeja ū būdito ng'hangala mpungatī.

¹⁹Nakūng'wīngīja īsho mushisendamīlile, īsho shikang'winhaga nguzu ja kwikumīlīja, nakūgapyagūla a malunde a higūlū īlo līlī higūlya ya sī ying'we, lyeele pe gītī ibbaadi; nī sī ying'we nūyīkalanga yūūkalamuka gītī itale.

²⁰Ī milīmo mukwīta ya kūnogela madūhū, nguno mutūpandīka shose shose ū mu migūnda ying'we; nī mitī ya mu matogolo ītūtwaja a matwajo gayo.

²¹“Ūlū ng'wikala mutaalī bagang'hanazu, mulemile ū kūnidegeleka, a makoye ga būlūhi wing'we nakūgongeja ng'hangala mpungatī, gadidohe gīt'ūmo shilī ī shibi shing'we.

²²Nakūmutūmīla mashiinū makenaagūji gayūbabūlaga a baana bing'we, na kūmukenaagūja ī mitugo jing'we; gakūmugeehya no, ī nzīla jing'we ī ng'humūūku jigayiwe a banhū ba kūjibītīla.

²³“Alīyo ūlū nūng'wītīla pyī ī yose īyī hūna ng'wikala mulemile dūhū ū kūgalūka, ng'ūbiza mutaalī munigomelile,

²⁴a henaho lūūlū nene ng'wenekīlī nakwandya kwilwisha ning'we; ū būluhi ūbo nalang'winhe kūlwa shibi shing'we nakūbongeja būdidohe ng'hangala mpungatī.

²⁵Nakwenha būlūgū ū mu sī ying'we kūlwa kūmumalīla shiilī, nguno ya kūlīkenaagūla ī lilagane. Ūlū ng'wilugalīla mu mizengo ying'we gīkī ng'wipīje, nakūmutūmīla mo mahūūya; hama nakūmutūūla mu makono ga banishi bing'we.

²⁶Nakūmutūmīla nzala ng'halī, ī shilīwa shibize sha kwineneela no; bakīma ikūmi bakūyūsangīla kūzuga shilīwa mu liiko līmò.[29] Īsho balashizuge shikūmeganyiwa, būlī ng'wene apandīke kapuli kado ka mu nkono atwale kū ng'wakwe, mukūlya a hene, alīyo mutigūta yaya.

²⁷“Ī mihayo ūlū yūshika gīko alīyo ng'ūbiza mutaalī munigomelile dūhū, mulemile ū kūnidegeleka,

²⁸a henaho nakwilwisha ning'we mu būpelanu būtaale no. Nene ng'wenekīlī nakūgongeja hangī ng'hangala mpungatī ū nsango gwa kūng'winha kūlwa shibi shing'we.

²⁹A baana bing'we, bagosha na bakīma, mukwandya kūyūūbalya nyama.

³⁰A mapandī ging'we ga kūlamīja ayo galī higūlya[30] nakūgasambaagūla, nī myalīlo ying'we ya kūzuukīja būbbani nīīkambagūla; ī mibimba ying'we nakwīlūndīka ha mashiikolile ging'we ga kūlamiwa, ayo gatī na būpanga; nīyo nakūmusūūcha no.

³¹Ī mizengo ying'we nakūyīta kūbiza ya mapagale, na a mapandī ging'we a meela gabize buyīīkī; nū ng'waso gwa shakwinha shing'we natūgūyegela.

³²Ī sī ying'we nakwībipya no, na a banishi bing'we abo balayīdime bakūjinjimala.

³³Nakūmusalang'hanīja kū mahanga, alīyo nū kwene nakūmukūūbīja na līlūshū lyane mu nkono. Ī sī ying'we īkūbiza buyīīkī, nī mizengo ying'we īkūbiza ya mapagale gike.

³⁴Hūna a henaho ī sī īkūlīlūmba ī likanza lya kwifuula; nguno ū mu shikū ījo mukūbiza mu sī ya banishi bing'we, ī sī īkwikala buyīīkī yifuule, ījilūmbe ī sabato jayo.

³⁵Ī sī īkwifuula ū ng'wikanza lyose īlo īkūbiza buyīīkī; ū mu shikū jenījo īkūbiza ng'wikanza lya kwifuula, īlo ītalīpandīkile mu sabato jayo ū mu shikū ja kwikala kwing'we mo.

³⁶“Abo balasaage bapanga ū mu bing'we, nakūbatūūlīla ng'holò ya kwikala bakwibakīlaga ū mu sī ya banishi babo; nūūlū bigwa kapalala kasaganya nguno ya lūyaga, bakwibakīla bandye kūpeela gītī balīmpeela mūlagi; bakūja bakūgwaaga sagala gītī balīpeejiwa na munhū.

³⁷Bakwipamagūla no gītī balīmpeela munhū abūūkije lūshū; nūūlū aho atīho ūyo alībapeeja. Na lūūlū mutūdūla ū kūbīīmīla a banishi bing'we.

³⁸Mukūchīla kū mahanga, mumilwe sī ya banishi bing'we.

³⁹Abo balikale bapanga ū mu bing'we bakūshila poole poole; bakūshilīla mu sī ja banishi babo kūlwa nguno ya shibi shabo. Bakūshila poole poole gīko kūlwa nguno ya shibi shabo na sha basaabo.”

⁴⁰“Alīyo ūlū būshitambūūla ī shibi shabo, nī shibi sha basaabo; būyīhabūla hape ī mihayo īyo baanikenya, nū būlambu wabo wa kūshilema ī shilagilo shane,

⁴¹Ūlū būgalūka booya ū kūyīta ī mihayo īyo īkanenheleja nabize ng'wanishi wabo, nose nūūbaponya kūle mu sī ya banishi babo, ī ng'holò jabo ī ngang'hanazu ūlū jūbiza na kwidoohya, nī mheela ya shibi shabo būbiza bayanukūla,

⁴²a henaho lūūlū hū nakūlizūkwa ī lilagane lyane īlo naalagana na Yakobo na Isaka, na Abulahamu; hū nakūyizūkwa nī sī yabo.

⁴³Nguno ī sī yenīyo shiigelile bayīngīle, ījilūmbe ī sabato jayo ū ng'wikanza lya kūbiza buyīīkī, a boi batīīmo. Ū nsango gwenūyo gūkūbagwīīla kūlwa nguno ya shibi shabo na kūlwa kūshilema ī shilagīlo shane na kūgadalaha a malange gane.

⁴⁴Alīyo nahene nūūlū ū mu yose yenīyī, ūlū balī ū mu sī ya banishi babo, natūūbaponya jigi, nūūlū kūbisuusumūla gete gīkī nabakenaagūle ilalī. Natīīko ū kūlīkenaagūla ī lilagane lyane ū kūbo. Ū nene nalī SEEBA Mulungu wabo.

⁴⁵Alīyo īkī aboi balī banhū bane, nakūlizūkwa ī lilagane lyane īlo nakabeeja na bakūlūgenji babo, abo nakabīnja mu sī ya Misili, kū būtongi wa mahanga; aho nakahaya gīkī nakūbiza Mulungu wabo. Ū nene nalī SEEBA.”

⁴⁶A genaya hū a malange na shilagīlo, na katongeelele ako SEEBA akabeeja ha gatī yakwe na Baisilaeli kū lūgūlū lwa Sinai mu būtūmami bo ng'wa Musa.