Read Sukuma Bible 2015 – Bibilia Ilagano Lya Kale 2015 Bagabīji 27 Bible Online

Bagabīji 27 - Sukuma Bible 2015 – Bibilia Ilagano Lya Kale 2015 bible

Bagabīji 27

¹Ū SEEBA ūng'wīla ū Musa,

²Lūngalūngaga nabo a Baisilseli ūbawīle gīkī, “Ūlū munhū ūfunya sabo ha ng'wanya gwa banhū balebe, abo walahīla kūbatūūla kūlī SEEBA,

³tūūlaga mpango, ū ngosha wa myaka ya kwandīja makūmi a bīlī kūshisha myaka makūmi atandatū, abize na mpango gwa shekeeli makūmi atanò ja feza, kūlenganīla nī shekeeli ya ng'wipandī lyeela.

⁴Ūlū nkīma ntūūlīlage mpango gwa shekeeli mkūmi adatū.

⁵Ū munhū wa myaka ya kwandīja ha ītanò kūshisha makūmi abīlī, ū ngosha ntūūlīlage mpango gwa shekeeli makūmi abīlī; ūlū nkīma shekeeli ikūmi.

⁶Ūlū wa kwandīja ng'weji gūmò kūshisha myaka ītanò, ū ngosha ntūūlīlage mpango gwa shekeeli itanò ja feza, ūlū nkīma shekeeli idatū ja feza.

⁷Ūlū munhū alī na myaka ya kwandīja makūmi atandatū na kūja kwigūlya, ū mpango gwa ngosha gūtūūlage ha shekeeli ikūmi na itanò, ū mpango gwa nkīma gūbize shekeeli ikūmi.

⁸Ū munhū ūlū ng'habī no no no, ūbiza atī na būdūla wa kūpandīka sabo ya kūlenganīla nū mpango ūyo gūtūūlilwe, ūkūng'wenha ū munhū ng'wenūyo kūlī ngabīji. Ū ngabīji akūntūūlīla we ū mpango kūlenganīla nū būdūla wa munhū ūyo alīfunya ī shilahīlo.”

⁹“Ū munhū ng'wenūyo ūlū ūfunya shilahīlo kūlwa ntugo ū mu mitugo ījo jizunīlījiwe gīkī jiigeleelilwe kūfunyiwa shitambò kū būtongi bo ng'wa SEEBA, ū ntugo gwa mbika yenīyo ūlū gūfunyiwa kūlwa ng'wa SEEBA, yenīyo yabizaga sabo ya ng'wa SEEBA.

¹⁰Atizūgema kūgūkaabanya nūūlū kūtūūla gūngī a ha ng'wanya gwago; gīkī hīmba ntugo gwawiza ha ng'wanya gwa ntugo gwabūbi, nūūlū ntugo gwabūbi ha ng'wanya gwa ntugo gwawiza. Ūlū wīta būkaabanya wa kūtūūla ntugo ha ng'wanya gwa ntugo gūngī, ī jose būbīlī wajo jikūbiza ja ng'wa SEEBA, ūyo gwalī gwafunyiagwa, nū yūyo gūlatūūlwe a ha ng'wanya gwago.

¹¹Ūlū ūbiza walahīlaga kūgūfunya ntugo ūyo gūtazunīlījiwe kūfunyiwa shitambò kū būtongi bo ng'wa SEEBA, shiigelile gwenhwe kūlī ngabīji.

¹²Ū ngabīji hū g'wene akūfunya ū būlamuji wa ntugo gwenūyo kūlenganīla nū wiza wago nūūlū ū būbi wago. Na lūūlū ū mpango ūyo alagūhele ū ngabīji, hū gwene gūkūbiza gwa ntugo gwenūyo.

¹³Ū ng'wenekīlī ntugo ūlū ūkooba kūgūkomoola, akongeja īmò ya itanò ya mpango gwago.”

¹⁴“Ūlū munhū ūfunya numba yakwe gīkī yabizaga ya ng'wa SEEBA, ū ngabīji akwīlola alamule kūlenganīla nū wiza nū būbi wayo. Ū mpango ūyo alagūtūūle ū ngabīji hū gwene ūyo gūkūbiza gwayo.

¹⁵Ū munhū ūyo wayīfunyaga ī numba yenīyo ūlū ūhaya kwīkomoola, īkūng'wigeleela afunyī īmò y'itanò ya mpango gwayo, hūna ī numba yenīyo īkūbiza yakwe hangī.

¹⁶“Ūlū munhū ūtīna ilaale lya lūganda lwa ng'wawe, ūlīfunya kūlwa ng'wa SEEBA, ū mpango gwalyo shiigelile gūtūūlwe kūlenganīla nū wingī wa mbīyū ījo jiigelile kūhamva mo. Shekeeli makūmi atano ja feza kū būlī homeeli ya mbīyū ja shayiri.

¹⁷Ūlū ūlīfunya ī lilaale lyakwe mu ng'waka gwa kūshosha shikolo, ū mpango ūyo gwatūūlagwa gūkwikala gīko.

¹⁸Alīyo ūlū ūlīfunya ī lilaale lyakwe hanuma ya ng'waka gwa kūshosha shikolo, ū ngabīji akūgūhela ū mpango gwalyo kūlenganīla nī myaka īyo yasaagile ū kūshika ū kū ng'waka gwa kūshosha shikolo ūyo gūlī kū būtongi, hūna ūgūtūūla ū mpango gwalyo.

¹⁹Alīyo ū munhū ūyo walīfunije ī lilaale lyenīlo ūlū ūhaya kūlīkomoola, īkūng'wigeleelwa afunyī īmò ya itanò ya mpango gwalyo, hūna līkūbiza lyakwe hangī.

²⁰Kwike ūlū ūbiza atatogilwe ū kūlīkomoola ī lilaale lyakwe, nūūlū ūbiza walījingije kūlī munhū ūngī hangī, lītīīko kūkomoolwa ī lyenīlo.

²¹Ū mu ng'waka gwa kūshosha shikolo ūlū lyūbiza mu wiyaabī, līkūbiza sabo ya ng'wa SEEBA, līkūbiza sawa na gīkī lyafunyiagwa kūlwa nguno yakwe; līkūbiza lya bagabīji.

²²“Ūlū ūfunya kūlwa ng'wa SEEBA ilaale īlo walīgūlile, īlo lītī sabo ya lūganda lwa ng'wawe,

²³Ū ngabīji akūlīhelela ū mpango gwalyo kūlenganīla nī myaka ya kūshika ha ng'waka gwa kūshosha shikolo, hūna ū lūshikū lwenūlo, ū munhū ng'wenūyo akūlīfunīja ī sabo kūlenganīla nū mpango gwalyo, gītī shikolo īsho shibalilwe kūbiza sabo ya ng'wa SEEBA.

²⁴Ū mu ng'waka gwa kūshosha shikolo ī lilaale lyenīlo līkūnshokela ū munhū ūyo walī ng'wenekīlī a ha kwandya.

²⁵Būlī mpango gwa shikolo gūkūtūūlwa kūlenganīla na shekeeli ya ng'wipandī lyeela; gulaamu ikūmi būlī shekeeli īmò.”

²⁶“Kwike ī mbyalwa ja kwandya ū mu mitugo, jibize ng'ombe nūūlū ng'holo, ī jene ja ng'wa SEEBA ng'hana ng'hana, munhū ose ose atazunīlījiwe kūjifunya mu nzīla yose yose.

²⁷Ūlū gūlī ntugo gūmò gwaho gwa yīyo ītazunīlījiwe kūfunyiwa kūlwa ng'wa SEEBA, ū munhū adūgije kūgūgūla kūlenganīla nū mpango ūyo gūhelilwe, oongeja īmò y'itanò ya mpango gwenūyo. Ūlū atatogilwe kūgūkomoola ū ntugo gwenūyo, gūkūjinjiwa kūlenganīla na mpango ūyo gūhelilwe.

²⁸“Sabo ya munhū ose ose ūlū yūlinda yūfunyiwa kūlwa ng'wa SEEBA, ītīīko kūjinjiwa nūūlū kūkomoolwa; shose shose īsho shūfunyiwa kūlwa ng'wa SEEBA gīko, abize munhū nūūlū ntugo, nūūlū ilaale lya mu kaya, ī shenīsho shilī sha ng'wa SEEBA gete.

²⁹Ūlū munhū ūfunyiwa gīkī abūlagwe atīīko kūkomoolwa, shiigelile abūlagwe ū ng'wenūyo.”

³⁰“Būlī zaka[31] ya shikolo shose shose sha kūfuma mu migūnda, īlī sabo ya ng'wa Seeba; jibize mbīyū ja kūfuma ng'wilaale nūūlū matwajo ga mitī; ī shose shilī sabo ya ng'wa SEEBA.

³¹Ūlū munhū ūkomoola zaka yakwe yose yose, shiigelile ongeje īmò y'itanò ya mpango gwa shikolo shenīsho.

³²Pyī ī zaka ya mu madaale ga mitugo, jibize ng'ombe nūūlū ng'holo, īlī sabo ya ng'wa SEEBA; a h'ikanza lya kūsoloojiwa mitugo, būlī ntugo gw'ikūmi ū mu mitugo jose gūkūbalwa kūbiza sabo ya ng'wa SEEBA.

³³Ū nsolooja ītang'wigeleelilwe kūyūsolanhya ī jawiza kūfuma ū mu jabūbi, yaya nūūlū kūyūkaabanya. Ūlū ūkaabanya, ī jose būbīlī wajo, īyo yalī yabalagwa nī yīyo wayenheelaga ho, jikūbiza ja ng'wa SEEBA; jitī ja kūkomoolwa.”

³⁴Ī shenīshi hū shilagīlo īsho SEEBA akang'winha Musa mu lūgūlū lwa Sinai kūlwa nguno ya Baisilaeli.