Read Sukuma Bible 2015 – Bibilia Ilagano Lya Kale 2015 Bagabīji 3 Bible Online

Bagabīji 3 - Sukuma Bible 2015 – Bibilia Ilagano Lya Kale 2015 bible

Bagabīji 3

¹Ūlū munhū ūfunya ng'ombe yakwe ng'osha nūūlū ng'hīma kūlwa ng'wa SEEBA kūbiza shitambò sha būsangī, akūfunya ītī na būka.

²Hūna akūtūūla nkono a ha ntwe gwa ng'ombe yakwe ya shitambò, hama ayīsīnzīle ha nyango gw'iheema lya kwibilingīla. Hanuma a bitūnja ba ng'wa Alooni a bagabīji, bakūgaseeseebela a mininga gayo a ha ng'walīlo, mhande jago jose.

³Ū kūfuma ū mu shitambò sha būsangī shenīsho, akwenha ū kū būtongi bo ng'wa SEEBA shitambò sha kūbeejiwa mu nzīla ya moto; pye a masazu ayo gakundīkīgije sha mu nda, na a maguta a gangī ayo galīmo.

⁴Nī mhīgo būbīlī wajo akūjenha, na a maguta ga ha ngongo, na yayo gakundīkīgije h'itīma; ī shose īshi akūshīnja hamò nī mhīgo.

⁵Hūna a bitūnja ba ng'wa Alooni bakūshitūūla ha ng'walīlo, a higūlya ya shitambò sha kūpemva, īsho shilī ha ng'hwi jilīībaka moto. Bakūshipemba henaho shibize shitambò sha kūfunyiwa mu nzīla ya moto; ī shoi shilī sha ng'waso gwa kūnyeja SEEBA.

⁶Hama ūlū munhū ūfunya ng'holo kūlwa ng'wa SEEBA gīkī ībize shitambò shakwe sha būsangī, akūfunya ng'osha nūūlū ng'hīma ītī na būka.

⁷Ī ng'holo īyo alayīfunye akūyenha kū būtongi bo ng'wa SEEBA;

⁸hūna ūtūūla nkono gwakwe a ha ntwe gwayo ī ng'holo ya shitambò shakwe, hama wīsīnza kū būtongi w'iheema lya kwibilingīla. Hanuma a bitūnja ba ng'wa Alooni bakūgaseeseebela a mininga gayo ha ng'walīlo, mhande jago jose.

⁹Ū kūfuma ū mu shitambò sha būsangī shenīsho, akwenha kūlwa ng'wa SEEBA shitambò sha kūbeejiwa mu nzīla ya moto; a maguta gayo, nī likīla lyayo pyī ī lyose kūlībbutīla aho lyandīgije, na a masazu a gose ayo gakundīkīgije sha mu nda; na a maguta a gangī ayo galīmo.

¹⁰Nī mhīgo būbīlī wajo akūjenha, na a maguta ga ha ngongo, na yayo gakundīkīgije h'itīma; ī shose shenīshi akūshīnja hamò nī mhīgo.

¹¹Ū ngabīji akūshocha ha ng'walīlo ī shenīshi kūlwa shakūlya; shilī shitambò sha kūbeejiwa mu nzīla ya moto, kūlwa ng'wa SEEBA.

¹²Ī shitambò shakwe ūlū mbūli, akwīyenha kū būtongi bo ng'wa SEEBA;

¹³hūna ūtūūla nkono gwakwe a ha ntwe gwayo, hama wīsīnza kū būtongi w'iheema lya kwibilingīla. Hanuma a bitūnja ba ng'wa Alooni bakūgaseeseebela a mininga gayo ha ng'walīlo, mhande jago jose.

¹⁴Ū kūfuma ū mu shitambò īsho alīfunya, akūbeeja shitambò īshi kūlwa ng'wa SEEBA mu nzīla ya moto, pye a masazu ayo gakundīkīgije sha mu nda, na a maguta a gangī ayo galīmo.

¹⁵Nī mhīgo būbīlī wajo, na a maguta ga ha ngongo, na a yayo gakundīkīgije itīma; ī shose īshi akūshīnja hamò nī mhīgo.

¹⁶Ū ngabīji akūshocha ī shenīshi ha ng'walīlo kūlwa shakūlya; shilī shitambò sha kūbeejiwa mu nzīla ya moto, kūlwa ng'wa SEEBA.

¹⁷Ī shenīshi shilī shilagīlo sha būja na būja kūlwa shibyalīlwe īsho shiliza. Hose hose ūko mulakikale, yaya ū kūgalya a mazezele nūūlū a mininga.