Read Sukuma Bible 2015 – Bibilia Ilagano Lya Kale 2015 Bagabīji 4 Bible Online

Bagabīji 4 - Sukuma Bible 2015 – Bibilia Ilagano Lya Kale 2015 bible

Bagabīji 4

¹Ū SEEBA ūng'wīla ū Musa gīkī,

²A Baisilaeli bawīlage ī mihayo īyī, ūlū munhū wīta shibi mu mhayo gose gose mu būtūmana, wīta mhayo gūlemejiwe mu shilagīlo shose shose sha ng'wa SEEBA,

³Ūlū ngabīji ūyo abililwe maguta wīta shibi, ūbenheleja a banhū kwingīla mu kwihīga, akwenha ū kū būtongi bo ng'wa SEEBA mūūga ya nzagamba ya ng'ombe, īyo ītī na kabi. Akwīfunya ībize shitambò sha shibi,[1] kūlwa shibi īsho wītaga.

⁴Ī mūūga ya nzagamba yenīyo akwīyenha kū būtongi bo ng'wa SEEBA, kū nyango gw'iheema lya kwibilingīla. Hūna ūtūūla nkono gwakwe a ha ntwe gwayo, hanuma wīsīnza kū būtongi bo ng'wa SEEBA.

⁵Hanuma ya henaho, ngabīji ūyo abililwe maguta akūsola mininga gamò, a ga ng'ombe yenīyo; wingīla nago ū ng'wiheema lya kwibilingīla.

⁶Ūlū ūshika mo akūsombya lwala ū mu mininga geneyo agasaamagūlīle ng'hangala mpungatī kū būtongi bo ng'wa SEEBA, a h'itundubaali ly'isenge ū ng'wipandī lyeela.

⁷Hūna ū ngabīji ng'wenūyo, akūgabila a mininga gamò ha mapembe ga ng'walīlo gwa kūzuukīja būbbani, ūyo gūlī kū būtongi bo ng'wa SEEBA, ū ng'wiheema lya kwibilingīla. A mininga ga nzagamba yenīyo ayo galasaage, akūgiita ha sī aho gwīmīīlile ū ng'walīlo gwa shitambò sha kūpemva; a ha nyango gw'iheema lya kwibilingīla.

⁸Hanuma ī nyama ya shitambò yenīyo akūyīngīja pye a maguta ayo gakundīkīgije sha mu nda, na a gangī ayo galīmo.

⁹Nī mhīgo būbīlī wajo akūjīnja, na a maguta ga ha ngongo, na a yayo gakundīkīgije h'itīma; ī shose shenīshi akūshīnja hamò nī mhīgo.

¹⁰Akūgīnja gīt'ūmo bakīngījaga maguta ga ng'ombe ya kūfunyiwa kūbiza shitambò sha būsangī. Ī shenīshi ū ngabīji akūshipemba ha ng'walīlo gwa shitambò sha kūpemva.

¹¹Alīyo ī likūnza lya nzagamba yenīyo nī nyama, pyī nū ntwe na a magūlū, nū būla nū būūshi wayo,

¹²hū kūhaya pyī ī shilīshiiga a ha nzagamba yenīyo, sha kūtwalwa hanze ya ng'hambī, ipandī lya kwitīla mabu, ūko banhū balemegije kūshika sagala sagala. Akwīpemba ūko gakitīlagwa mabu, ha moto gwa magogo.

¹³Ūlū pyī ī libità lya Baisilaeli lyīīta shibi mu būtūmana, lyīīta shibi mu mhayo ūyo gūlemegije mu shilagīlo shose shose sha ng'wa SEEBA; nūūlū bakabiza batadeebile gīkī baakenaagūlile, alīyo nahene bakūbalīlwa būhūbi.

¹⁴Hūna lūūlū ūlū būshiitegeleja ī shibi īsho baashītile, ī libità lya banhū ī lyose līkwenha mūūga ya nzagamba ya ng'ombe ū kwiheema lya kwibilingīla, ībize shitambò sha shibi.

¹⁵A banamhala a batongeeji balyo ī libità bakūtūūla a makono gabo a ha ntwe gwa nzagamba yenīyo, kū būtongi bo ng'wa SEEBA; hūna ī nzagamba īkūsīnzwa kū būtongi bo ng'wa SEEBA.

¹⁶Hanuma ngabīji ūyo abililwe maguta, akūsola mininga gamò a ga ng'ombe yenīyo; wingīla nago ū ng'wiheema lya kwibilingīla.

¹⁷Ūlū ūshika mo akūsombya lwala ū mu mininga genayo, agasaamagūlīle ng'hangala mpungatī kū būtongi bo ng'wa SEEBA, a h'itundubaali lya h'isenge.

¹⁸Mininga gamò akūgabilīja a ha mapembe ga ng'walīlo ūyo gūlī kū būtongi bo ng'wa SEEBA, ū ng'wiheema lya kwibilingīla. A mininga ayo galaasaage akūgiita ha sī, aho gwīmīīlile ū ng'walīlo gwa shitambò sha kūpemva, a ha nyango g'wiheema lya kwibilingīla.

¹⁹A maguta gayo akūgīnja pye a gose agapembe ha ng'walīlo.

²⁰Ī nzagamba yenīyo akwīyītīla gīt'ūmo yigelile kwītīlwa nzagamba ya shitambò sha shibi. Ū mu nzīla yenīyo ū ngabīji akūbeeja isangī kūlwa nguno yabo, balekejiwe.

²¹Hanuma ya yose, akwīsola ī nzagamba wītwaale hanze ya ng'hambī akīpembe moto gīt'ūmo alayītīle ī ya kwandya. Ī shenīshi shilī shitambò sha shibi sh'ibità lya banhū bose.

²²Ūlū ntongeeji wīta shibi mu būtūmana, wīta mhayo ūyo gūlemegije mu shilagīlo shose shose sha ng'wa SEEBA Mulungu wakwe, ū ng'wenūyo ng'hūbi.

²³Na lūūlū ūlū oolekejiwa ī shibi shakwe ūshideeba, akwenha ngulyati ya mbūli ītī na būka, ībize shitambò shakwe.

²⁴Ūlū ūyenha, akūtūūla nkono gwakwe a ha ntwe gwa mbūli yenīyo, hūna wīsīnza kū būtongi bo ng'wa SEEBA, a h'ipandī īlo shitambò sha kūpemva shikasīnzīlagwa. Ī shenīsho shilī shitambò kūlwa nguno ya shibi.

²⁵Hūna ū ngabīji akūsola mininga gamò a ga shitambò shenīsho ūgabilīja na lwala lwakwe a ha mapembe ga ng'walīlo gwa shitambò sha kūpemva; ayo galaasaage akūgiita ha sī, aho gwīmīīlile ū ng'walīlo gwenūyo.

²⁶A maguta a gene akūgapemba pye ha ng'walīlo, gīt'ūmo akūgapembela a maguta ga shitambò sha būsangī. Ū mu nzīla yenīyo ū ngabīji akūbeeja isangī kūlwa nguno ya shibi shakwe ū ntongeeji, alekejiwe.

²⁷Ūlū munhū ūngī ose ose ū ng'wibità lya banhū wīta shibi mu būtūmana, wīta mhayo ūyo gūlemegije mu shilagīlo shose shose sha ng'wa SEEBA, ū ng'wenūyo ng'hūbi.

²⁸Ūlū oolekejiwa ī shibi shakwe ūshideeba, akwenha mbūli ng'hīma ītī na būka, ībize shitambò kūlwa shibi shakwe īsho wītile.

²⁹Ūlū ūyenha, akūtūūla nkono gwakwe a ha ntwe gwa mbūli ya shitambò yenīyo, hūna wīsīnzīla h'ipandī īlo shitambò sha kūpemva shikasīnzīlagwa.

³⁰Hūna ngabīji akūsola mininga gamò a ga shitambò shenīsho ūgabilīja na lwala lwakwe a ha mapembe ga ng'walīlo gwa shitambò sha kūpemva; ayo galaasaage akūgiita ha sī, aho gwīmīīlile ū ng'walīlo gwenūyo.

³¹A maguta akūgīnja pyī, gīt'ūmo gakīngījiagwa ha shitambò sha būsangī; hūna ū ngabīji akūgapemba a ha ng'walīlo, kūlwa nguno ya ng'waso gwa kūnyeja SEEBA. Ū mu nzīla yenīyo ū ngabīji akūbeeja isangī kūlwa nguno yakwe ū munhū ng'wenūyo, alekejiwe.

³²Ū nkenaagūji ūlū wenha ng'holo, gīkī ībize shitambò kūlwa shibi shakwe, ni enhage ng'hīma ītī na būka.

³³Hūna akūtūūla nkono gwakwe a ha ntwe gwayo, hanuma wīsīnza kūlwa shitambò sha shibi h'ipandī ūko shikasīnzīlagwa shitambò sha kūpemva.

³⁴Hūna ngabīji akūsola mininga gamò a ga shitambò shenīsho ūgabilīja na lwala lwakwe a ha mapembe ga ng'walīlo gwa shitambò sha kūpemva; ayo galaasaage ūgiita ha sī, aho gwīmīīlile ū ng'walīlo gwenūyo.

³⁵Pye a maguta akūgīnja gīt'ūmo gakīngījiagwa a ha ng'holo ya shitambò sha būsangī; hanuma ū ngabīji akūgapemba ha ng'walīlo; higūlya ya shitambò īsho alīfunījiwa SEEBA mu nzīla ya moto. Ū ngabīji akūbeeja isangī kūlwa shibi shakwe ū munhū ng'wenūyo mu nzīla yenīyo, nang'hwe akūlekejiwa.