Read Sukuma Bible 2015 – Bibilia Ilagano Lya Kale 2015 Bagabīji 6 Bible Online

Bagabīji 6 - Sukuma Bible 2015 – Bibilia Ilagano Lya Kale 2015 bible

Bagabīji 6

¹Ū SEEBA ūng'wīla ū Musa gīkī,

²Ūlū munhū wīta shibi, ūng'hūba SEEBA mu nzīla ya kūnyeekeja ng'wiye mu nyasala sala shikolo īsho walī abīkījiwe nūūlū kūbilisīlwa, nūūlū wiba shikolo, nūūlū ūnembalemba ng'wiye ūnsoja shikolo;

³Nūūlū ūbona shikolo sha bangī shijimīīlile hūna ūlomaloma, ūleka ū kūhaya ūko shilī, wandya kwilahīla mihayo ya nyalomolomo, akwītaga ūmo banhū bakīītīlaaga, baagwa mu būhūbi;

⁴Ū munhū ūlū wīta shibi mu mhayo gwabūbi gwa mbika yenīyo, ūbiza wagwa mu kwihīga, akūshishosha īsho wibile, nūūlū īsho wasolile mu nyasala sala, nūūlū īsho walī wabīkījiwa hūna ūshinyeecha; nūūlū īsho shalī shijimīīlile īsho akashibona;

⁵nūūlū shose shose īsho akashihaya mu būlomolomo ūlahīla na kūlahīla. Ī shikolo shenīsho akūshishosha mu lūshikū lwa kūshifunya ī shakwinha shakwe sha kwihīga; nīyo shibize gīt'ūmo shaalī aho washisolelaga. Hanuma akongeja n'īmò ya itanò ya mpango gwasho, hūna ūng'winha ū ng'wenekīlī shikolo.

⁶Ū nsango gwakwe ū munhū ng'wenūyo gūkūbiza kūfunya ng'ondi ya ng'holo kwīnga ng'widaale lyakwe lya mitugo; ībize ītī na būka, nū mpango gwayo gūbize gwigeleelilwe. Akūyenha kūlī ngabīji, īfunyiwe kūlwa ng'wa SEEBA, īfunyiwe kūbiza shakwinha shakwe sha kwihīga.

⁷Ū mu nzīla yenīyī ū ngabīji akūmeegeja isangī ū kūlī SEEBA alekejiwa ū būhūbi bokwe ū mu yose īyo walī wayīta, yūng'wenheleja kūgwa mu kwihīga.

⁸Ū SEEBA ūng'wīla ū Musa,

⁹Shiishi shilagīlo ūg'winhe ū Alooni na a bitūnja bakwe: Ng'wīlage gīkī, “Ī mihayo ya shitambò sha kūpemva īkūja mu kahelele aka. Ī shitambò sha kūpemva, shiigelile kwikala a ha ng'walīlo būjikū pe shilī ha moto, kūshisha ntondo dilū; nū moto gūyūkeeyula gūlībaka ho.

¹⁰Na lūūlū ū ngabīji akūzwala ī lishadi lyakwe lya kitaani, nū ng'wenda gwakwe gwa kitaani ū gwa kūtonja mu gatī, hūna akūgīnja a mabu ga shitambò sha kūpemva īsho shajigaga mu moto, ūgasundīla ha mhelo ya ng'walīlo.

¹¹Hanuma akūshizuula ī shizwalo shenīshi ūzwala shingī, hūna ūgasomba a mabu kūja hanze ya ng'hambī, kū ipandī īlo līlemegije banhū kūja ko sagala sagala.

¹²Ū moto gwa ha ng'walīlo gwiigelile gwikale gūkūbakaga būlī ikanza, gūtizūjima nūūlū hado. Ū ngabīji akūyūgūsoosela būlī lūshikū ī dilū, oongeja mo nī ng'hwi; nī shitambò īsho shilī a ha moto ūshihela hoi chiza chiza, na a masazu ga shitambò sha būsangī ayo galīho, ūgapemba pye gūūjiga gete.

¹³Ū moto gwa ha ng'walīlo gwigelile gūbake būlī gwa, yaya ū kūgūleka gūkajima nūūlū hado.”

¹⁴Ī mihayo ya shitambò sha kūpemva īkūja mu kahelele kaka; a bitūnja ba ng'wa Alooni bakūyūmfunīja SEEBA kū būtongi wa ng'walīlo.

¹⁵Ū ngabīji akūsola būsu būnogu būgehu mu nkono gwakwe, hamò na masazu; nū ū būbbani pyī ū bose ūbo būlī a ha shakwinha sha būsu. Hūna ī shikolo shenīsho akūshipemba mu moto gwa ha ng'walīlo; lībize ibbudīka lya shiizūkījo, kūlwa kwenha ng'waso gwawiza gwa kūnyeja SEEBA.

¹⁶Īsho shilīshiigīīla shikūbiza sha kūlyiwa na Alooni hamò na bitūnja bakwe; alīyo shilī sha kūlyiwa gīko dūhū, yaya kūsanjiwa na shibimbya, nīyo sha kūlīīlwa ng'wipandī lyeela, mu gwalugwa y'iheema lya kwibilingīla.

¹⁷A h'ikanza lya kūzugwa shitizūsanjiwa mo shibimbya na hado yaya. Ī shitambò īsho shikafunyiagwa mu nzīla ya moto nabinhaga boi, kūlwa nguno nasho ī shenīsho shilī sheela no no no, gīt'ūmo shilī shitambò īsho shikafunyiagwa kūlwa shibi, na kūlwa kwihīga.

¹⁸Munhū ose ose ū ngosha ū mu kaya ya ng'wa Alooni ū mu shibyalīlwe ī shose īsho shiliza, azunīlījiwe ū kūshilya; ū gwenūyo gūlī ngabo gwakwe ū mu shitambò īsho shikafunyiagwa kūlwa ng'wa SEEBA mu nzīla ya moto. Ose ose ū wa kūshikuumya wigeleelilwe kūbiza ng'wela.

¹⁹Ū SEEBA ūng'wīla hangī ū Musa gīkī,

²⁰Īshi h'ī shakwinha īsho Alooni na bitūnja bakwe bakūng'wenhela ū SEEBA, a ha lūshikū lwa kwitīīlwa maguta ga kūtūūlwa a ha nīmo, īmò y'ikūmi ya efa ya būsu būnogu. Ī shenīshi shikūbiza shakwinha sha būsu sha kūfunyiwa būlī lūshikū; nusu yaho dilū, ī nusu ī yīngī mhīndī.

²¹Bakūbūguulanya na maguta, hūna ī shakwinha shabo sha būsu būshikalanga h'ikalangīlo, hama būshenha shimenyagūlilwe chiza chiza, būshifunya kūlwa ng'wa SEEBA shibize shakwinha sha ng'waso gwawiza.

²²Ū ng'witūnja ūyo ahelilwe kūbiza ha nīmo gwa būgabīji hanuma ūlū waacha ū ise, hū ng'wene akūshibeeja ī shakwinha shenīshi. Ū gwenūyū gūlī ngabo go ng'wa SEEBA gwa būlī lūshikū; ī shakwinha shenīshi shilī sha kūpemva shūshila ho gete.

²³Būlī shakwinha sha būsu īsho akūfunya ngabīji shiigelile kūpemva shishile ho gete; shitī sha kūlyiwa na munhū ose ose.

²⁴Ū SEEBA ūng'wīla ū Musa,

²⁵Ng'wīlage ū Alooni na a bitūnja bakwe gīkī, “Yīyī mihayo ya kahelele kūlwa shitambò sha shibi. Ī shitambò sha shibi shiigelile shisīnzwe kū būtongi bo ng'wa SEEBA, ng'wipandī īlo shitambò sha kūpemva shikasīnzīlagwa; ī shoi shilī sheela no no no.

²⁶Ū ngabīji wa kūshifunya hū ng'wene ū wa kūshilya, shilī sha kūlīīlwa ng'wipandī lyeela, mu gwalugwa y'iheema lya kwibilingīla.

²⁷Shose shose ī sha kwikuumya nī nyama yenīyo shikūbiza sheela, hama a mininga ga shitambò ūlū gūūsaamukīla ha shizwalo shose shose, shiigelile shifulīlwe ng'wipandī lyeela.

²⁸Ī nungū ja mabūmba ī ja kūtūmamīlwa kwīzuga ī nyama yenīyo shiigelile jibelwe. Alīyo ūlū yūzugīlwa mu shiseme sha shaba, ī shiseme shenīsho ni shiguusagwe mu minzī sheele.

²⁹Ī nyama yenīyo īdūgije kūlyiwa na ngosha ose ose ū wa mu kaya ya ngabīji; ī yoi īlī neela no no no.

³⁰Alīyo būlī shitambò sha shibi īsho mininga gasho gakwenhwa ū ng'wiheema lya kwibilingīla, kūlwa nguno ya kūbeeja isangī ng'wipandī lyeela, ī shenīsho shitizūlyiwa; shilī sha kūpemva mu moto.”