Read Sukuma Bible 2015 – Bibilia Ilagano Lya Kale 2015 Bagabīji 8 Bible Online

Bagabīji 8 - Sukuma Bible 2015 – Bibilia Ilagano Lya Kale 2015 bible

Bagabīji 8

¹Ū SEEBA ūng'wīla ū Musa gīkī,

²“Ng'wenhage ū Alooni na a bitūnja bakwe, nī shizwalo shabo, hamò na a maguta ga kūbitīīla, ūyenhe nī nzagamba ya shitambò sha būkenagūji, nī ng'ondi ījo ibīlī, nī shigabbu sha migatī īyo ītī na shibimbya.

³Hanuma bitanage pye a Baisilaeli bikuminge a ha būtongi wa nyango gw'iheema lya kwibilingīla.”

⁴Ū Musa wīta gīt'ūmo akalagīīlīlwa na SEEBA, ī libità libilinga a ha nyango gw'iheema lya kwibilingīla.

⁵Hūna ū Musa ūbawīla a banhū abo baalī bibilinga, “Gūūyū mhayo walagīlile ū SEEBA gīkī gwigelile gwītwe.”

⁶Na lūūlū ū Musa ūng'wenha ū Alooni na a bitūnja bakwe, ūbooja na minzī.

⁷Ūnzwalīkīja ū Alooni ī lishadi lyakwe lya nīmo, ūntunga nū ngwasho ū mu nkīmbīlī gwakwe; ūnzwīka nī ng'hanjo ī nguhī, hanuma nī ng'hanjo ya nyagabīji ī ya makono maguhī. Nū ngwasho gwa ha ng'hanjo ya nyagabīji ya makono maguhī ūyo gūbeejiwe na būgaliili no no no ūgūtunga chiza chiza.

⁸Na a kamfuko ka ha shikuba ūntūūlīla, nī Ulimu nī Tumimu ūshitūūla ū mu kamfuko ka ha shikuba.

⁹Hanuma ya henaho wītūūla ī ngoofiila a ha ntwe go ng'wa Alooni, nī libalala lya zahabu ī lyeela ūlītūūla a ha būtongi wa ngoofiila, gīt'ūmo SEEBA walī wanagīīlīla dūhū ū Musa.

¹⁰Hūna ū Musa ūgasola a maguta ga kūbila, ūlīseeseebela ī lipandī lya kwikala nī shikolo shaamo ī shose, ūsheeja.

¹¹A mininga gamò ūgaseeseebela ha ng'walīlo ng'hangala mpungatī, ūgūbila na maguta ū ng'walīlo nī shikolo sha kūtūmamīla ho pyī ī shose; nī shiseme sha kūkalabīla nī likīndīkīlo lyasho; ūsheeja ī shikolo shenīsho.

¹²Witīīla maguta magehu a ha ntwe go ng'wa Alooni, ūng'witīīla maguta, ūng'weeja kūlwa nguno ya nīmo.

¹³Hanuma ya henaho ūbenha na a bitūnja ba ng'wa Alooni, ūbazwalīkīja a mashadi gabo ga milīmo, ūbatunga nī migwasho yabo, hūna ūbatunga shitambaala ū kū mitwe yabo, gīt'ūmo SEEBA walī wanagīīlīla Musa.

¹⁴Hūna ūyenha ī nzagamba ya shitambò sha shibi, ū Alooni na a bitūnja bakwe būtūūla a makono gabo a ha ntwe gwayo.

¹⁵Ū Musa wīsīnza ī nzagamba yenīyo, ūgasola a mininga gayo magehu ūgabilīja a ha mapembe ga ha ng'walīlo būnè wago, ūgweeja ū ng'walīlo. A mininga ayo gakasaagīīla ūgiita ha sī, aho gwalī gwīmīīlile ū ng'walīlo, ūgwītīla isangī ūgweeja.

¹⁶Ū Musa ūgīnja pye a masazu ayo gakabizaga gakundīkīgije sha mu nda, na a yayo gakundīkīgije hitīma, nī mhīgo hamò na a masazu gajo; ī shose shenīshi ūshipemba ha ng'walīlo.

¹⁷Alīyo ī nyama ya nzagamba nī likūnza, nū ū būūshi wayo, ūshipemba moto hanze ya ng'hambī, gīt'ūmo SEEBA walī wanagīīlīla Musa.

¹⁸Hanuma ūyeenha nī ng'ondi ya shitambò sha kūpemva, ū Alooni na a bitūnja bakwe būtūūla a makono gabo a ha ntwe gwayo.

¹⁹Hūna ū Musa wīsīnza ī ng'ondi yenīyo; a mininga gayo ūgaseeseebela a ha ng'walīlo mhande jago jose.

²⁰Ī ng'ondi wībbutagūla mapingili mapingili; a mapingili genayo ūgoocha mu moto hamò nū ntwe, na masazu gayo.

²¹Ī sha mu nda nī chūūga ūshooja na minzī. Ī ng'ondi yenīyo wīpemba ha ng'walīlo pyī ī yose, yūbiza shitambò sha kūpemva, sha kwenha ng'waso gwawiza, shakwinha sha kūbeejiwa kū būtongi bo ng'wa SEEBA mu nzīla ya moto, gīt'ūmo SEEBA walī wanagīīlīla Musa.

²²Hūna nī ng'ondi ī yīngī ūyeenha, ī ya kūfunyiwa kūlwa kūtūūlwa kwabo ha nīmo; ū Alooni na a bitūnja bakwe bītūūlīla a makono gabo a ha ntwe gwayo.

²³Ū Musa wīsīnza, ūsola mininga gayo magehu ūgabila a ha gūtū go ng'wa Alooni ū gwa būlyo, na a h'ikuulume lya nkono gwakwe gwa būlyo, nī likuulume lya lūpambalà lwa gūgūlū gwa būlyo.

²⁴Ū Musa ūbeegeleja na a bitūnja ba ng'wa Alooni, nabo ūbabila a mininga, būlī ng'wene ū kū gūtū gwakwe gwa būlyo, nū kwikuulume lya nkono gwa būlyo, na h'ikuulume lya kū lūpambalà lwa kū gūgūlū gwa būlyo. Nū ng'walīlo ūgūseeseebela a mininga mhande jago jose.

²⁵Ūgasola a maguta ga ng'ondi yenīyo nū nkīla gwayo ū gwizezele, na a masazu pye ayo gakabizaga gakundīkīgije sha mu nda, na a yayo gakundīkīgije h'itīma, nī mhīgo būbīlī wajo na a masazu gajo, nū kūlūmbū kwa būlyo.

²⁶Hūna ū mu shigabbu sha migatī ītī na shibimbya, īsho shalī kū būtongi bo ng'wa SEEBA, ūsola mo ngatī gūmò, ūsola na gūngī gūbeegije na būsu būsangije maguta, na gūngī ng'ūūmu gītī lūgūkūlū; ī shose shenīshi ūshitūūla hamò na a masazu ga ng'ondi, nū kūlūmbū kwa būlyo.

²⁷Hūna ūshitūūla mu makono ga ng'wa Alooni na bitūnja bakwe, būshiyengeeja kū būtongi bo ng'wa SEEBA, shūbiza shakwinha sha kūyengeejiwa.

²⁸Ūshisola hangī ū Musa kūfuma ū mu makono gabo, ūshipemba ha ng'walīlo, a higūlya ya shitambò sha kūpemva; shūbiza shakwinha sha kūfunyiwa kūlwa kūtūūlwa ha nīmo, sha ng'waso gwawiza, shakwinha sha kūfunyiwa kūlwa ng'wa SEEBA mu nzīla ya moto.

²⁹Ū Musa ūshisola nī shiguuku sha ng'ondi yenīyo, īsho walī ahelelilwe wei ng'wenekīlī, nasho ūshiyengeeja kū bū būtongi bo ng'wa SEEBA, shūbiza shakwinha sha kūyengeejiwa, gīt'ūmo SEEBA walī wanagīīlīla dūhū ū Musa.

³⁰Hūna ū Musa ūsola maguta magehu a ga kūbitīīla batūmami, na mininga magehu kūfuma ha ng'walīlo, ūnseeseebela ū Alooni nī shizwalo shakwe; hamò na a bitūnja bakwe nī shizwalo shabo, ūbiza wang'weeja ū Alooni nī shizwalo shakwe, hamò na a bitūnja bakwe, nī shizwalo shabo.

³¹Hanuma ū Musa ūng'wīla ū Alooni na a bitūnja bakwe, “Ī nyama yenīyī īzugīlagi ha nyango gwa h'iheema lya kwibilingīla, ng'wīlīīle henaho, hamò nī migatī ya mu shigabbu sha migatī ya shakwinha h'ikanza lya kūtūūlwa ha nīmo; h'ūmo nakalagīīlīlwa, gīkī, ‘Ī shenīshi shilī sha kūlyiwa na Alooni na bitūnja bakwe.’

³²Hanuma ī nyama īyo īlashiige hamò nū ngatī, ūkūshipemba mu moto.

³³Hama yaya ū kwīnga a ha nyango gwa hiheema lya kwibilingīla, kūshisha jishike shikū mpungatī, ījo jihelilwe kūlwikanza lya kūtūūlwa kwing'we ha nīmo; ī likanza lya shikū mpungatī īlo līhelilwe kūlwa kūtūūlwa kwing'we ha nīmo.

³⁴Īyo ng'wītīlagwa leelo yenīyī īlagīlilwe na SEEBA, kūlwa kūmubeegeja isangī.

³⁵A ha nyango gwiheema lya kwibilingīla mukwikala ho shikū mpungatī, līīmi na būjikū, mushikīlīje īyo ayīlagīlile ū SEEBA, mutizūcha; nguno h'ūmo naalagīīlilwe.”

³⁶Ū Alooni na a bitūnja bakwe bakīīta pyī ī yose īyo SEEBA walī wabalagīla mu nzīla ya ng'wa Musa.