Read Sukuma Bible 2015 – Bibilia Ilagano Lya Kale 2015 Bagabīji 9 Bible Online

Bagabīji 9 - Sukuma Bible 2015 – Bibilia Ilagano Lya Kale 2015 bible

Bagabīji 9

¹Ū mu lūshikū lwa kanaane, ū Musa ūng'witana ū Alooni na a bitūnja bakwe, na a banamhala ba Baisilaeli.

²Ūng'wīla ū Alooni, “Solaga mūūga ya nzagamba ya ng'ombe, ya kūfunya kūlwa shitambò shako sha shibi, na ng'ondi ya ng'holo ya shitambò sha kūpemva; ī jose būbīlī wajo jibize jitī na būka, hūna ūjenhe kū būtongi bo ng'wa SEEBA.

³Hanuma ūbawīle a Baisilaeli gīkī, ‘Solagi ngulyati ya mbūli ya kūfunya kūlwa shitambò sha shibi. Musole na ndama ya ng'waka gūmò, na ng'holo ya ng'waka gūmò, nī jene jibize jitī na būka. Jikūbiza ja kūfunyiwa shitambò sha kūpemva.

⁴Hanuma mukūsola na ng'ombe hamò na ng'ondi ya ng'holo, ja kūmfunīja SEEBA shakwinha sha būsangī; mukūfunya na shakwinha sha būsu shisangije maguta. Nguno ī lelo ū SEEBA akwiyoolecha ū kū bing'we.’”

⁵Ī shikolo īsho Musa akabalagīla būshitwala kū būtongi wiheema lya kwibilingīla; hūna pye a Baisilaeli ibità igima beegeela būshika bīīmīīla kū būtongi bo ng'wa SEEBA.

⁶Na lūūlū ū Musa ūhaya, “Ū mhayo gweūyū walagīlile SEEBA gīkī mugwīte, hū mukūlībona ī likūjo lyakwe.”

⁷Hanuma ū Musa ūng'wīla ū Alooni, “Egeelaga a ha ng'walīlo ūfunye shitambò sha shibi na sha kūpemva, kūlwa nguno yako; ūbeeje isangī kūlwa nguno yako na a banhū. Bafunījage shakwinha a banhū, ūbīītīle isangī, gīt'ūmo SEEBA alagīlile.”

⁸Ū Alooni wegeela a ha ng'walīlo, wīsīnza ī mūūga ya nzagamba ya ng'ombe, ī ya shitambò sha shibi kūlwa nguno yakwe.

⁹A bitūnja bakwe būgabūūcha a mininga būng'wegelegeja a ha ng'walīlo, ūsombya lwala ū mu mininga genayo, ūgabilīja a ha mapembe ga ha ng'walīlo. Ayo gakashiiga ūgiita ha sī aho gwalī gwīmīīlile ū ng'walīlo.

¹⁰A masazu nī mhīgo ūjipemba a hang'walīlo, na a masazu pye ayo gakundīkīgije itīma lya shitambò sha shibi; bakīīta gīt'ūmo SEEBA walī wanagīīlīla ū Musa.

¹¹Ī nyama nī likūnza ūshipemba hanze ya ng'hambī.

¹²Hanuma ya henaho wīsīnza nī ya shitambò sha kūpemva. A bitūnja bakwe būng'wegelegeja hangī a mininga, ūgūseeseebela ū ng'walīlo mhande jago jose.

¹³Būyūng'winha ī shitambò sha kūpemva ipingili līmò līmò; pyī nū ntwe, ūshipemba ha ng'walīlo.

¹⁴Ī sha mu nda nī chūūga ūshooja tame, hūna ūshitūūla higūlya ya shitambò sha kūpemva a ha ng'walīlo, ūshipemba.

¹⁵Hūna ū Alooni ūshenha nī shakwinha īsho shalī shihelilwe kūlwa nguno ya banhū. Wīsola ī mbūli yabo ya shitambò sha shibi; wīsīnza, wīfunya kūbiza shitambò sha shibi, gīt'ūmo walī wayītīla ī ya kwandya.

¹⁶Ūyeegeleja nī ya shitambò sha kūpemva, nayo wīfunya gīt'ūmo īlagīlilwe.

¹⁷Nī shakwinha sha būsu ūsheegeleja, ūsapūla mo tūgehu mu nkono, ūtūpemba ha ng'walīlo hamò nī shitambò sha kūpemva ī sha dilū.

¹⁸Ī ng'ombe nī ng'ondi ūjisīnza, ūjifunya kūbiza shakwinha sha būsangī kūlwa banhū. A bitūnja bakwe būng'wegelegeja a mininga, ūgūseeseebela ū ng'walīlo pyī ī mhande jago.

¹⁹Būūng'wegelegeja na a masazu ga ng'ombe na a ga ng'ondi, nī likīla ī lizezemu, na a masazu ga ha mhīgo na a ga h'itīma.

²⁰Pyī ī shenīshi būshitūūla hamò na shidali, hūna ū Alooni ūgapemba a maguta ha ng'walīlo.

²¹Ū Alooni ūshiyengeeja kū būtongi bo ng'wa SEEBA ī shiguuku nū gūlūmbū go nīīla; shūbiza shakwinha sha kūyengeejiwa, gīt'ūmo Musa walī walagīīlīla.

²²Hanuma ya henaho ū Alooni ūbūūcha makono ūbafuuha a banhū. Aho wamala ū kūfunya ī shitambò sha shibi, nī shitambò sha kūpemva, hamò nī sha kwinha sha būsangī, wika a ha ng'walīlo.

²³Hūna ū Musa nū Alooni bingīla ū ng'wiheema lya kwibilingīla; aho bafuma mo būbafuuha a banhū; kwimanīla ī likūjo lya ng'wa SEEBA lyilonga balolile pye a banhū.

²⁴Moto gūūfuma kūlī SEEBA, gūshijija ī shitambò sha kūpemva, na a maguta ayo gaalī a ha ng'walīlo. A banhū aho bagūbona ū moto būyoganya kūlwa būyegi, hanuma būgwa bachimīgije hasī ū būshū.