Read Sukuma Bible 2015 – Bibilia Ilagano Lya Kale 2015 Yelemia 1 Bible Online

Yelemia 1 - Sukuma Bible 2015 – Bibilia Ilagano Lya Kale 2015 bible

Yelemia 1

¹Ī yenīyī mihayo ya ng'wa Yelemia ng'witūnja o ng'wa Hilikia, ūmò wa bagabīji ba Anasosi, mu sī ya Benjamini.

²Ū mhayo go ng'wa SEEBA gūkang'wizīīla mu ng'waka gw'ikūmi n'idatū gwa būsugi bo ng'wa Yosia, ng'witūnja o ng'wa Amoni ntemi wa Yuda;

³na mu shikū ja ng'wa Yehoyakimu ng'witūnja o ng'wa Yosia ntemi wa Yuda, kūshisha mu ng'weji gwa katanò, ng'waka gw'ikūmi na gūmò gwa būsugi bo ng'wa Sedekia ng'wintūnja o ng'wa Yosia ntemi wa Yuda; ikanza lya banhū ba Yelusalemu kūsaamiwa na kūtwalwa mu būding'wa.

⁴Ū mhayo go ng'wa SEEBA gūkanizīīla gūlīhaya gīkī,

⁵“Nakūmanile[1] kwīngīīla kale, kwīngīīla haho nataalī kūkūbeeja ū mu nda ya ng'wa mayū wako;[2] naakūkoma ūtaalī nū kūbyalwa nūkūsola kūbiza ng'hangi kū mahanga.”

⁶Nane nūshosha; “Seeba MULUNGU, ū nene nataalī nīgīnī no, natamanile nū kūyomba!”

⁷Alīyo ū SEEBA ūnishokeja alīhaya, “Ūtahayage gīkī, ‘Ū nene nataalī nīgīnī.’ Nguno shikwigeleelilwe ūje kū bose abo nakūkūtūma kūjūbawīla yose yose īyo nalīkūlagīla.

⁸Yaya ū kūbogoha, nguno ū nene nalī hamò nang'ho kūlwa kūkūpīja,” alīhaya SEEBA.

⁹Hūna ū SEEBA ūgoloola nkono gwakwe, ūnikuumya ū nomo gwane; ūniwīla, “Ī haha naatūūla mihayo yane ū mu nomo gwako.

¹⁰Managa gīkī ī lelo īyī naakwinhaga būdūla higūlya ya mahanga na mabūsugi, kūlwa kūdubbūla na kūkambagūla, kūkenaagūla na kūgwisha, kūzenga na kūhamba.”

¹¹Ū mhayo go ng'wa SEEBA gūnizīīla gūlīhaya, “Yelemia ūlībona kī?” Nūshosha, “Nalībona'itambī lya ntī gwa mulozi.”

¹²Ū SEEBA ūniwīla, “Wabona ūmo īlī gete, nguno nalolile kūshisha nagūbone ū mhayo gwane gūlīshikīīla.”

¹³Ū mhayo go ng'wa SEEBA gūnizīīla hangī; gūniwīla, “Ūlībona kī?” Nūshosha, “Nalībona nengelo īlīsībūkīla, yiinīkile kūfuma sukuma.”

¹⁴Ū SEEBA ūniwīla, “Būkenaagūji būkwiza kwīngīīla sukuma, būbidīkīle pye a bikaji ba mu sī īyī.

¹⁵Nalī hihī kūgitana pye a mahanga ga banhū ba sukuma.” Alīhaya SEEBA. “A batemi babo bakwiza būlī ng'wene n'isumbī lyakwe lya būtemi, bīyigasīīje ī mibita ya Yelusalemu; Ī ndugu jayo bakūjigobanīla na mabità, nī mizengo ya mu Yuda ī yose.

¹⁶Hūna nakūbalamula a banhū bane nguno ya būhūbi wabo, kūlwa kūnīība na kūbafunīja shitambò sha kūpemba bamulungu bangī, na kūlamya milīmo īyo babeeja na makono gabo.

¹⁷“Alilūūlū igolanyage ūmalīīle! Īmīīlaga ūbawīle būlī gwene ūyo nalīkūlagīla. Ū bebe yaya ū kūbogoha, natizūkwīta ūbize wa kwikala wibakīla wabogohaga.

¹⁸Managa gīkī ī lelo yenīyī naakwītaga ū bebe kūbiza gītī nzengo gūpīndīlīgije ndugu, gītī ng'hīngī ya chuma, na gītī ndugu ya chuma sha shaba, kūlwa kwilwisha na būdumīlwa kūfuma hose hose ū mu sī; kwilwisha na batemi na bataale ba Yuda, na a bagabīji baamo; na a banhū ba mu sī yenīyī.

¹⁹Bakūkūdumīla alīyo batūkūheeba; nguno ū nene nalī hamò nang'ho, nakūkūpīja.” Alīhaya SEEBA.