Read Sukuma Bible 2015 – Bibilia Ilagano Lya Kale 2015 Yelemia 11 Bible Online

Yelemia 11 - Sukuma Bible 2015 – Bibilia Ilagano Lya Kale 2015 bible

Yelemia 11

¹Ū mhayo ūyū gūkiza kūlī Yelemia kūfuma kūlī SEEBA:

²“Īdegelekage ī mihayo y'ilagane īlī, ūbamanīkīje a banhū ba Yuda na a bazengi ba mu Yelusalemu.

³Bawīlage gīkī, ū SEEBA, ū Mulungu wa Isilaeli, alīhaya; ‘Azumilwe ū munhū wa kūleka kwīdīlīla ī mihayo y'ilagane īlī,

⁴Ī mihayo īyo nakabalagīla bakūlūgenji bing'we ng'wikanza lya kūbīnja mu sī ya Misili; aho naabafunyaga ng'wichongo lya moto gwa kwaabīja chūma.’ Nakabawīla gīkī, ‘Niigwagi nene, nī yīyo nalīmulagīla ng'wīshikīlīje pyī ī yose; ū mu gīko mukūbiza banhū bane, nū nene nakūbiza Mulungu wing'we.

⁵A henaho hū nakwīshikīlīja īyo nakabalahīlīla bakūlūgenji bing'we, gīkī nakūbinha sī ya būhondo, ī sī īyo īlī ying'we ī haha.’” Nane nūnshokeja, “Alichene SEEBA.”

⁶Ū SEEBA nang'hwe ūniwīla, “Ī mihayo īyī īkumūchage hose pyī ū mu mizengo ya Yuda, nū mu mapanda ga Yelusalemu. Bawīlage, ‘Ī mihayo y'ilagane lyenīlī yiigwagi, na ng'wīyīte.

⁷Kwīngīīla ikanza lya kūbīnja Misili a bakūlūgenji bing'we kushisha lelo īyī, naabahūgūlaga ng'hangala na ng'hangala nalībawīla, “Bīng'we nigwagi.”

⁸Kwike batadegelekile nūūlū kūdīlīla yaya, a ha ng'wanya gwaho būyūshimīzīla mu būgang'hanazu wa ng'holò jabo jabūbi dūhū; H'ī nguno yene naabenhelile pyī ī mihayo y'ilagane lyenīlī, īyo naalī naabalagīla kwīyīta, alīyo batīyītile.’”

⁹Hūna ū SEEBA ūniwīla, “Būlīho būgomi ū mu banhū ba Yuda, na a bikaji ba Yelusalemu.

¹⁰Baashokile hangī ū kū būbi ūbo wītagwa na bakūlūgenji babo, abo baalī balemile ū kwīyiigwa ī mihayo yane. Bandije kūbalondeela bamulungu bangī kūbatūmamīla. Ī numba ya Isilaeli nī numba ya Yuda, jose būbīlī wajo jalīkenaagūlile ī lilagane lyane, īlo nakabeeja na bakūlūgenji babo.

¹¹Alilūūlū, ū SEEBA alīhaya gīkī, ‘Nakūbenhela būkenaagūji ūbo batūdūla kūwiliga. Nūūlū būnilīlīīla natūbadegeleka.

¹²A banhū ba mu mizengo ya Yuda na a ba Yelusalemu, bakūja bakabalīlīīle a bamulungu babo, abo bakūbazuukījaga būbbani; alīyo batūbagunanha nūūlū hado ūlū būgwīlwa mayanga.

¹³Ee Yuda, ūmo būlī ū wingī bo mizengo yako, na bamulungu bako h'ūmo balī; nī myalīlo ya kūzuukīja būbbani kūlwa Lībaalī, ī līmulungu ly'igisha minala, nayo mingī gīt'ūmo jilī ī nzīla ja mu Yelusulemi.’

¹⁴Alilūūlū, lekaga ū kūbalombela a banhū benaba, nūūlū kūnilīlīīla na kūnidayīla kūlwa nguno yabo; nguno natūbigwa nūūlū bakanitana ng'wikanza lya makoye gabo.

¹⁵Ū ng'witogwa wane akūkoobaga kī ū mu hekalu yane? Alī na bingī no abo akīītaga nabo ya malofu. Ū bebe angū wīyegelile ī ya malofu. Ūliganika ī nyama ja shitambò jikūgūgalūcha ū nsango gwako?”

¹⁶Ū bebe ū SEEBA wabīta kūkwitana gīkī, “Ūlī nzeituni gūfulumile, ntī gwa matwajo masoga.” Alīyo gūkūhuuyembelwa nyaga gabīnzagūke na a matambī gago, hūna agūpembeele moto.

¹⁷Ū SEEBA wa mabità, ū ng'hambi wako wakūhelelile mhayo gwa kūkūkenaagūla; nguno ī numba ya Isilaeli nī numba ya Yuda, ī jose jītile yabūbi jūniikoloosha na kūnisaayīcha, nguno ya kūpemba būbbani kūlwa kūnzuukīja Baalī.

¹⁸Ū SEEBA akanimanīīkīja īyo balomanaga nīmana, nguno ū ng'wikanza lyenīlo akanoolekeja īyo bīyītaga.

¹⁹Ū nene naalī gītī ng'holo nembeezu īlītwalwa kūsīnzwa; naalī natadeebile gīkī baalī baanihooyela bakwiwīlaga, “Tūgūkenaagūlagi ū ntī na a matwajo gago, tūmbutagi tūmponye kūle, Īnge ū mu sī ya bapanga, atizigela wa kūlizūkwa hangī Ī lina lyakwe.”

²⁰Kwike Ee SEEBA wa mabità, bebe ūyo ūlī namuji ntūngīlīja, ūyo ūkagīsīlījaga ng'holò na maganiko, nolekejage ī shiilī īyo ūlībamalīla naane nībone, nguno nakūtūūlīlile bebe Ī mihayo yane.

²¹Alilūūlū, ū SEEBA alīhaya mhayo gūūyū ū kū bana Anasosi, abo bakūbūkoobaga būpanga wako; kūnū būhaya gīkī, “Ūtahangage mu lina lya ng'wa SEEBA, ūlū ītī chene tūkūkūbūlaga”

²²Ū SEEBA wa mabità alīhaya gīkī, “A benabo nakūbinha nsango; a baana babo a basūmba bakūshilīla mu būlūgū; a bitūnja na a bashīke babo bakūmalwa nzala.

²³Batūlekeelelwa nūūlū būshiigo bose bose; nguno ū mu ng'waka gwa kūbinha nsango a bana Anasosi nakūbagwisīja mayanga mataale no.”