Read Sukuma Bible 2015 – Bibilia Ilagano Lya Kale 2015 Yelemia 16 Bible Online

Yelemia 16 - Sukuma Bible 2015 – Bibilia Ilagano Lya Kale 2015 bible

Yelemia 16

¹Ū mhayo go ng'wa SEEBA gūkanizīīla hangī gūniwīla,

²“Ū bebe yaya ū kūtoola, ūtizūbyala baana bagosha na bakīma ū ng'wipandī lyenīlī.”

³Nguno ū mhayo go ng'wa SEEBA ūyo alīgūhaya kūlwa baana a bagosha na a bakīma abo bakūbyalagwa ū ng'wipandī lyenīlī, na a bakīma a baninabo, na a bagosha a basabo; gūlī gīkī,

⁴“Bakūbūlagwa mabūsatu mabi; atilonga wa kūbalīla nūūlū kūbajīka; bakūbiza gītī ndeelya jisambaalile sagala sagala ū mu mabbaala. Bakūcha bo lūshū na nzala; ī mibimba yabo īkūbiza shilīwa sha noni ja kūlala na sha mashiinū ga mu masaka.”

⁵Nguno ū SEEBA alīhaya, “Yaya kwingīla mu numba ūmo balīīlya shilīwa sha ha lūfu, nūūlū ūtizūja kūbalangamīla na kūlīla ng'hūngū, nūūlū kūboolekeja kūsaatwa kwako; nguno a banhū benabo naabīngīgije ī mhola nū būtogwa, nī shigongo shane.” Alīhaya SEEBA.

⁶Bose pye, bataale na bado, bakūshila kūcha ū mu sī yenīyī; alīyo batūjīkwa, na atilonga wa kūbalīla, nūūlū wa kwisananga, nūūlū kwihalūla ipala kūlwa nguno yabo.

⁷Atilonga wa kūfunya shilīwa shakwe kūlwa kūbalūngūja abo balīīlīla ng'hūngū; nūūlū ni kūbinha sha kūng'wa kūlwa kūbageheja būpīna nguno ya kūchīlwa baninabo nūūlū basaabo.

⁸Nūūlū mu numba ya shigukulu yaya ū kwingīla, gīkī ūkigashe kūlya na kūng'wa hamò nabo.

⁹Nguno ū SEEBA wa mabità, ū Mulungu wa Isilaeli alīhaya gīkī, A malaka ga būyegi na seko, na a ga batooji na batoolwa, nakūgahuumūja ū mu shikū jing'we jenīji mulībona hape hape; gakooya ū kwigwiwa ū ng'wipandī lyenīlī.

¹⁰A banhū benaba ūlū ūbasomboolela pyī ī mihayo yenīyī bakūkūbūūja gīkī, “Nibūlī ū SEEBA watūtūūlīlile mayanga mabi gīko? Twankenije kī? Ū SEEBA Mulungu wise twang'wītīlile shibi kī?

¹¹A henaho ūkūbawīla gīkī, ‘Īlī kūlwa nguno a bataale bing'we baalī banileka ū nene,’ alīhaya SEEBA, ‘būlondeela bamulungu bangī būyūbatūmamīla na kūbalamya. Ū nene būnīība, nī shilagilo shane booya ū kūshidima.

¹²Alīyo a bīng'we hū mukwītaga ya malofu no, kūtinda īyo bīītaga a bataale bing'we. Manīlagi dūhū ī gīkī būlī ūmò wing'we akūshimīzīlaga mu būgang'hanazu wa ng'holò yakwe yabūbi, a ha ng'wanya gwa kūniigwa ū nene.

¹³Alilūūlū, nakūmuponya ng'winge ū mu sī yenīyī, muje kū sī īyo mutīmanile a bing'we, pye na bataale bingwe baalī batīmanile. Hūna ū kwenūko mukūyūbatūmamīla bamulungu bangī līīmi na būjikū; nguno ū nene natūmuchīla shigongo.’”

¹⁴Kwike ū SEEBA alīhaya, “Jikūshika shikū, a banhū bakooya ū kūhaya gīkī, ‘Ūmo SEEBA alī mpanga ūyo akabenha Baisilaeli kūfuma mu sī ya Misili.’

¹⁵Alīyo bakūyūhaya, ‘Ūmo SEEBA alī mpanga ūyo akabenha Baisilaeli kūfuma kū sī ya sukuma, na kūfuma kū sī jose ūko walī wabaponya!’ Nguno nakūbashosha ū mu sī yabo īyo naalī nabinha bakūlūgenji babo.

¹⁶Kwike ī haha nakūlagīja bazubi bingī babazube, alīhaya SEEBA, hanuma ya henaho nakūtūma bahwīmi bingī bize baje bakūbahwīmaga hose pyī ū mu ngūlū ī nhaale nī ndo, nū mu mahalo ga shiganga.

¹⁷A miso gane gajibonile pyī ī nzīla jabo; jitibisile ū kūlī nene, nūūlū ī shibi shabo shitashīkījiwe ū kū miso gane.

¹⁸Īyo ībigeleelilwe kūlwa būbī na shibi shabo nakūbashokeja nīyo na kūtinda ho. Nguno ī sī yane bīsosohaja na mibimba ya shiikolile shabo sha malofu; ū wingīji wane būbookaja shiitongelegejo shabo sh'ipelanya.”

¹⁹Ee SEEBA, bebe ūlī nguzu jane n'ibūngīlo lyane; ūl'ipeelelo lyane mu makanza ga makoye, a mahanga gakwiza kūlī bebe kūfuma hose hose ū mu sī; gakuhaya, “Shalī shitīmo shose shose ū mu wingīji wa bataale bise, ūlū ītī būlomolomo dūhū, mashiikolile gatī na solobo ayo gatī na gwa kūpya.

²⁰Ū munhū ashikile kwibeegeja bamulungu? Ee, ashikile ū kwīta gīko, alīyo nahene batī bamulungu!

²¹Alilūūlū, nakūbalanga; ū lūkangala lwenūlū nakūboolekeja ī nguzu jane nū būdūla bone. Hūna bakūdeeba gīkī ī lina lyane nalī SEEBA.”