Read Sukuma Bible 2015 – Bibilia Ilagano Lya Kale 2015 Yelemia 2 Bible Online

Yelemia 2 - Sukuma Bible 2015 – Bibilia Ilagano Lya Kale 2015 bible

Yelemia 2

¹Ū mhayo go ng'wa SEEBA gūkanizīīla gūniwīla,

²“Jaga ūkahamuke bigwe a bana Yelusalemu;” ūhaye gīkī, “Nakūwizūkagwa ū widohya wako, aho walī ūtaalī ng'walūki; ūmo walī ūnitogelilwe ū mu shikū ja wandījo wa būtoolwa wako, ūmo wanilondeelelaga ū mu sī y'itogolo, īyo ītaalī kūhamvwa shose shose.

³Ū Isilaeli walī nsolwa ng'wela kūlwa ng'wa SEEBA; wal'itwajo lyakwe lya kwandya. Bose abo baakūlyaga ū bebe baagwaga mu kwihīga, baagwīlagwa mayanga,” alīhaya SEEBA.

⁴Bing'we numba ya ng'wa Yakobo, ng'anda jose ja numba ya ng'wa Isilaeli, gwigwagi ū mhayo go ng'wa SEEBA.

⁵Ū SEEBA alībūja gīkī, “A bataale bing'we bakanibona būbi kī ū nene nose būnileka būsegenela gīko, bandya kūlondeela shikolo shitī na ngofyoolo, kūshisha nabo būmala ū ngofyoolo?

⁶Batiwīlile nūūlū gīkī, ‘Alī halī ū SEEBA ūyo akatwīnja mu sī ya Misili, ūyo watūtongeelaga aho tūlī mu sī y'itogolo, sī ya mbaala na mahululu mashimu, sī ya notà na negeeji gwa lūfu; sī īyo batabītaga mo banhū, na atīho nūūlū ūmò wa kwikala mo?’

⁷Ū nene nakang'wenha mu sī ya shilīwa shingī, gīkī mugalūmbe a matwajo gayo, nī shizeeze shamo mushiyegele. Alīyo aho ng'washika mo ng'wīsosohaja ī sī yane, ū wingīji wane ng'ūwīta kūbiza wa malofu.

⁸A bagabīji batabūūgije gīkī, ‘Alī halī ū SEEBA?’ A badīlīīji ba shilagīlo būnijimīlwa, a balang'hani ba banhū būnigomela. A bahangi būyūhanga mu katongeelele ka ng'wa Baalī, kūnū bakūlondeelaga mashiikolile gatī na ngofyoolo.

⁹Alilūūlū, nī haha nataalī nūng'oolomya a bing'we,” alīhaya SEEBA. “Kūshisha na a baana ba baana bing'we nakūboolomya.

¹⁰Kīlagi shi ī nyanza muje Kitimu mukalole, nūūlū mutūme nhūng'wa kūja Kedaali mukagīsīlīje mu welwa ng'holò, mubone ūlū gwabīta kwītwa mhayo gwa mbika yenīyī.

¹¹Līlīho ihanga kī lyose lyose Īlo lyakaabanya bamulungu balyo, nūūlū īkī batī bamulungu? Alīyo a banhū bane bankaabanya ūyo alī Ikūjo lyabo, būlondeela shikolo shitī na solobo.

¹²Bīng'we mapandī g'igūlū, jinjimalagi kūlwa mhayo gwenūyū, detemagi mu kogoha kūtaale,” alīhaya SEEBA.

¹³Nguno a banhū bane bīītile būbi wa mbika ibīlī: Baanilekile ū nene, ūyo nalī lūzwīlo lwa minzī mapanga; būkumba nzwinzī jabo benekīlī, nzwinzī jitandagūkile milala, ījo jitadūgije kūlang'hana minzī.

¹⁴Bing'we, ū Isilaeli ng'witūmamīja? Wabyalīlwa mu būsese? Ni kinehe alī mu būding'wa ī haha?

¹⁵Mashimba gakūzumīīlaga, gakūmpogomelaga na kapogomele ka makanji. Ī haha ī sī yakwe gīyītile kūbiza būyīkī, nī mizengo yakwe yanogotejiwe moto, hama yūlekwa īlī dalali.

¹⁶Banhū ba Memfisi na bana Tahapanesi baalūpaanulile ū lūpanga[3] lwa ntwe gwako.

¹⁷A makoye genaya ūtiyenhelile bebe kūlwa kūneka ū SEEBA Mulungu wako, ūyo wakūtongeelaga ū mu nzīla yako?

¹⁸Ī gīsī īkī wajile Misili kūjūng'wa minzī ga mu Shihooli,[4] ūlīpandīka solobo kī ī haha? Na hangī īlīho nguno kī ya kūja Ashulu kūng'wa minzī ga mu mongo gwa Fulati?

¹⁹Ū būbi wako būkūkūluhya, ū būgomi wako būkūkwenhela makoye. Alilūūlū managa, hangī witegeleje gīkī, ū kūneka SEEBA Mulungu wako gūlī mhayo gwabūbī na gwakūminya no. Ū bebe ūtī na logohano ū kūlī nene, alīhaya Seeba, ū SEEBA wa mabità.

²⁰“Nguno ū bebe walībīnzagūla Ī lijoki lyako, nī nhendele jako ūjitīnagūla; hūna ūhaya, ‘Ū bebe natūkūtūmamīla!’ Na ng'hana wandya kūja hose hose; ūlū washika būlī hene a higūlya ya lūgūlū nūūlū mu mbeho ya lī ntī lya madūūtū mingī, walinhya kwīta mihayo yako ya būmalahya ūkwilamīlījaga kū bamulungu bangī.

²¹Alīyo ū bebe naakūhamba ūlī nzabibu gwawiza, gwa kwīnga mu mbīyū ya nzabibu gūsanyiwe. Hama nibūlī wakenaagūkile gīko, wagalūkile kinehe ūbiza nzabibu mi, gwa mu masaka?

²²Ū bebe oogelaga dūhū a magembya, ūtūmamīle na sabuni ningī, alīyo ī shibi shako shikwikala ho dūhū ū kū būtongi bone,” alīhaya Seeba MULUNGU.

²³Ūdūgije kinehe ū kūhayaga gīkī, “Ū nene natī nsoso, natīnashimīzīla mu nzīla ja Mabaalī?” Yizūkagwe ī nzīla yako īyo Ībītile mu longa, wīyideedeng'hanyī īyo ūkīyītaga moi. Ū bebe ūtikīlile na ndogoosa ya ngamīla īyo īmanīīlile kūja īkūtagaalījaga sagala.

²⁴Ūlī nzobe ya mu matogolo ya kwikala īkūbbehaga lūyaga kūlwa kwikūmvwa kwayo. Nani adūgije kwīlang'hana ūlū īlī ng'wikanza lyayo lya kūpandwa? Ī ng'osha ījo jikwīkoobaga jitī na nguno ya kwikoya, nguno ū ng'wikanza lyayo jikwīpandīka dūhū.

²⁵Oyaga ū kwikala ūkūpeelanyaga nose ūmale shilatū shako sagala; nī lilangū lyako līkalamuke nū gwa kūpya ndūhū. Alīyo ū bebe ūlemile no; ūhayile gīkī, “Gūtīho ū gwa kwīta, ū nene nabatogilwe a bamulugu a bageni, nakūja koi dūhū.”

²⁶Ūmo akagookelaga ng'wibi ūlū ūding'wa, h'ūmo īkūgookela nī numba ya Isilaeli, pye gete a boyi na a batemi babo, na a bataale babo, na a bagabīji na a bahangi babo.

²⁷Nguno nūūlū līntī bakalīwīlaga, “Ū bebe ūlī baba!” Nūūlū iwe dūhū gīkī, “Ū bebe hū wanibyala ū nene!” Alīyo ū nene banitegelile ngongo, Ītī būshū wabo. Lelo ūlū būpandīka makoye bakanigalūkīlaga bandya kūhaya, “Twangūhīlage ūtūgune.”

²⁸Alilūūlū a bamulungu bako abo wibeegeja balī halī? Ni bakwangūhīlage lūūlū, ūlū badūgije kūkūguna ū ng'wikanza lya makoye gako! Nguno ū wingī wa bamulungu bako ū bebe Yuda, būtikīlile nī mizengo yako.

²⁹“Nibūlī lūūlū mukūnidayīīlaga? Tūhaya pye a bose munigomelile,” alīhaya SEEBA

³⁰“A banhū bing'we naabagwisīja misango na misango; nī līlūshū ling'we benekīlī lyabīta ū kūbalya a bahangi bing'we gītī shimba ītuubile! Alīyo ndūhū būhūgūlīle.

³¹Bing'we shibyalīlwe sha lelo, gwideedeng'hanyagi ū mhayo go ng'wa SEEBA. Ī gete, ū nene hamo shi naabizile ibbambasī ū kūlī Isilaeli, nūūlū sī ya giiti sha gamha? Nibūlī a banhū bane bakūhayaga, ‘A bise tūlī na wiyaabī kūja ūko tūtogelilwe, tūtūshoka hangī ū kūlī bebe?’

³²Ū munhya ashikile kwība ngufu gwakwe gwa būlenji, nūūlū ntoolwa kwība shizwalo shakwe sha kwigaliila? Alīyo a banhū bane baanība ū nene, nīyo shikū ningī jitī na būbalīle.

³³Ū bebe ūlī koolī no ū kūbakooba abo bakwikūmbilwe! Na a bakīma a ba nhūngwa ja malofu no no no balangwa ū kūlī bebe.

³⁴A banhū balīyūshibona ī shizwalo shako shidabbalanhile mininga ga būpanga wa bahabī abo batī na shisembo, banhū abo ūtaalī nūūlū kūbadima balīkambūla hanhū hose hose. Alīyo ū mu yose yenīyo,

³⁵ū bebe ūtaalī dūhū ūkūhayaga, ‘Ū nene natī na būbi, atanipelanīlile.’ Kwike ū nene nakūkwinha nsango kūlwa kūhaya gīkī, ‘Ū nene nataalī kwīta shibi.’

³⁶Nibūlī ūkūkwījaga malang'wa na kwikala ūgalūkīja nzīla jako gīko? Ī Misili ūkūgookela ko dūhū, gīt'ūmo ūkagookela Ashulu.

³⁷Nū kwene ūkwīnga widwīkaga makono kū ntwe, nguno ū SEEBA abalemile abo ūkūbasendamīlaga, ūtūpandīka koi shose shose sha kūkūgunanha.”