Read Sukuma Bible 2015 – Bibilia Ilagano Lya Kale 2015 Yelemia 21 Bible Online

Yelemia 21 - Sukuma Bible 2015 – Bibilia Ilagano Lya Kale 2015 bible

Yelemia 21

¹Ū mhayo go ng'wa SEEBA gūkiza kūlī Yelemia, aho ntemi Sedekia akantūma Pashuli ng'wintūja o ng'wa Malikīya, na ngabīji Sefania ng'witūnja o ng'wa Maaseya; bakang'wile ū Yelemia gīkī,

²“Tūbūūgījage ū kūlī SEEBA, nguno ū ntemi Nebukadineza wa Babuloni wizile kūtūdumīla. Hamo ū SEEBA akūtwītīla ya kūkumya gīt'ūmo akīītīlaga na kale, ū Nebukadineza atwīngīle.”

³Alīyo ū Yelemia ūbashokeja, “Ū Sedekia mukūng'wila gīkī,

⁴‘Ū SEEBA, ū Mulungu wa Isilaeli, alīhaya, Nalī hihī kūmugalūkīja bing'we ī shilanga sha būlūgū īsho mushidimile mu makono ging'we, īsho mukūshitūmamīlaga kwilwisha būlūgū na ntemi wa Babuloni, na Bakalidayo abo balī hanze ya ndugu bamugobanīlile. Nīyo nakūbakobya pyī bize ū mu nzengo gwenūyū.

⁵Ū nene ng'wenekīlī nakūgūgoloola ū nkono gwane, nilwishe ning'we mu būdūla na būpelanu wane; mu būkalī, na būdaki būtaale.

⁶Hama a bikaji ba mu nzengo gwenūyū nakūbatūla, py'a banhū bakūmalwa ihūūya lyabūbi; būyaga nī mitugo.

⁷Ū SEEBA alīhayagīkī, Hanuma ya henaho ū Sedekia ū ntemi wa Yuda, na a batūmami bakwe na a banhū ba mu nzengo gwenūyū, abo bakūlekeelwa ihūūya na līlūshū na nzala, nakūbatūūla mu nkono go ng'wa Nebukadineza, ū ntemi wa Babuloni; na kū banishi babo abo bakūbūkoobaga ū būpanga wabo. Akūbabūlaga na līlūshū; atūbachīla shigongo nuūlū kūbakūlīlwa, atūbalekeja yaya.’

⁸“Hama hangī bawīlage a banhū benaba, ‘Ū SEEBA alīhaya, Managi gīkī ū kū būtongi wing'we nalīhela nzīla ya būpanga na nzīla ya kūcha.

⁹Ū wa kwikala ū mu nzengo gwenūyū akūcha bo līlūshū na nzala n'ihūūya. Alīyo ū wa kūfuma ū mu nzengo, ūja kūbagwīīla mu magūlū a Bakalidayo abo bamugobanīlile, akūpīla abūpīje ū būpanga wakwe.

¹⁰Ū nene naalamulile gīkī, ū nzengo gwenūyū nakūgwenhela mihayo mibi, ītī misoga yaya, alīhaya SEEBA. Gūkūtūūlwa mu makono ga ntemi wa Babuloni agūkenaagūle na moto.’

¹¹“Hama na a ba numba y'ikūlū lya Yuda bawīlage gīkī, ‘Gwigwagi ū mhayo go ng'wa SEEBA.’

¹²Ee numba ya ng'wa Daūdi, ū SEEBA alīhaya gīkī, ‘Būlī lūshikū ng'ūfunya būlekanya mu būtūngīlīja; ū wa kūnyeekejiwa ngunagi apīle ū kūlī ng'wiboneeji wakwe. Ūlū ītī chene ū būpelanu wane būkūpembeka būbake gītī moto; būkūbaka kūlwa nguno ya shītwa shing'we shabūbi, na atilonga wa kūbūpoja.

¹³Ee Yelusalemu, nalī na wilwisha nang'ho ū bebe, alīhaya SEEBA, bebe ūyo wikalo wako būlī ha ngūlya gwa mawe mu sī ya ntubīlo; bebe ūyo ūkahayaga gīkī, “Nani ū wa kwilwisha nise? Nani adūgije kūshika a ha wikalo wise?’

¹⁴Nakukwinha nsango kūlenganīla nū mumo shilī ī shītwa shako; alīhaya SEEBA. Nakūbacha moto ū mu mapoolu gako, gūshinogoteje pyī īsho shikūpīndije kose kose.”