Read Sukuma Bible 2015 – Bibilia Ilagano Lya Kale 2015 Yelemia 22 Bible Online

Yelemia 22 - Sukuma Bible 2015 – Bibilia Ilagano Lya Kale 2015 bible

Yelemia 22

¹Ū SEEBA alīhaya, “Jaga ū kwikūlū lya ntemi wa Yuda, ūkagūhaye ū mhayo ūyū:

²Ee, ntemi wa Yuda, gwigwage ū mhayo go ng'wa SEEBA, bebe ūyo ūlī h'isumbī lya būtemi lya ng'wa Daūdi; ū bebe na a batūmami bako, pye na a banhū bako abo bakabītaga ū mu mibità yenīyī.

³Ū SEEBA alīhaya gīkī, ‘Ng'ūlamula mu wīma na būtūngīlīja. Ū wa kūnyeekejiwa ngunagi apīle ū kūlī ng'wiboneeji wakwe. Yaya ū kūng'wītīla yabūbi nūūlū kūng'wiboneela ū nobeji nūūlū ūyo atī na ise, nūūlū nchīlwa, hama yaya kwita mininga gatī na shilingo ū ng'wipandī lyenīlī.

⁴Nguno ūlū ng'ūshidima ī shilagīlo shane shenīshi, a batemi abo balī h'isumbī lya būtemi lya ng'wa Daūdi, bakwingīla kūbītīla a ha mibità y'ikūlū lyenīlī, balī mu magogoteni ga būlūgū, na badamhīlile falasa, balī hamò na a bataale ba būsugi wabo, na a banhū babo.

⁵Alīyo ū SEEBA alīhaya gīkī, ūlū mutūyiigwa ī mihayo yenīyī, nalīlahīla mu lina lyane ng'wenekīlī, ī numba yenīyī īkūbiza nsaka.’”

⁶Nguno ī mihayo y'ikūlū lya ntemi wa Yuda, ū SEEBA alīyīhaya gīkī, nūūlū īkī ūbange gītī Gileadi ū kūlī nene, gītī wiza bo Lebanoni; alīyo nakūkūkenaagūla ng'hana, nakūkwīta ūbize gītī itogolo lītī na shose shose, gītī mizengo ītī na bikaji.

⁷Nakūkūbilingīla bayagaja, būlī ng'wene ize na shilanga shakwe; hūna ī mikoola yako ī misoga bakwībbutagūla bīponye mu moto.

⁸“Banhū ba mahanga na mahanga ūlū balībīta bbihī nū nzengo gwenūyū bakūyibūūja, ‘Nībūlī ū SEEBA wagwītīlile mhayo gūlī gīko ū nzengo gwenūyū?’

⁹Ī lishosho līkūbiza gīkī, ‘Īlī kūlwa nguno ya kūlīleka ī lilagane lya ng'wa SEEBA Mulungu wabo, būyūbalamya bamulungu bangī na kūbatūmamīla.’”

¹⁰Ū ntemi ūyo waacha yaya ū kūnīla, nūūlū kūpīnīhala īkī wang'wīnga. Alīyo nīlagi mu kūsaatwa kūtaale ūyo alītwalwa mu būding'wa, nguno atīko kūshoka; na atībona hangī ī sī ya ng'wawe.

¹¹Nguno ū mu mihayo ya ng'wa Shalumu[34] ng'witūnja o ng'wa Yosia, ū ntemi wa Yuda, ūyo akatema hanuma ya ng'wa ise Yosia, alīyo ī haha atīho a h'ipandī lyenīlī, ū SEEBA alīhaya, “Ū ng'wenūyo atūshoka hangī ū kūnū.

¹²Akūchīla mu būding'wa kūko bantwala kwenūko, atī wa kūlībona hangī ī lipandī lyenīlī.”

¹³Alī mu kwihīga ūyo akūzengaga numba yakwe mu nzīla jitī ja būtūngīlīja, ūyo akūsonganījaga chumba kwigūlya mu nzīla ja wiboneji, na kūbatūmamya dalali a bazenganwa biye; kūnū akūlemaga ū kūbalīpa ī mheela ja būtūmami wabo.

¹⁴Akwiwīlaga ng'wenekīlī gīkī, “Nakwizengela numba ngalī; nītūūlīle chumba shigalī ū kwigūlya.” Na ng'hana akwīzenga wītūūlīle na madilisha magalī, nī ndugu jayo ūjitūūlīla mbawa ja mikoola kūlwa būlenji, hūna wīchaaja na langi yaaza kūlwa būbeeleji.

¹⁵“Ū gwa kūkwīja mitī ya mikoola, hū gūkūkwīta ūbize ntemi? Ū so walī atapandīkaga ī shilīwa nī sha kūng'wa, kūnū akwītaga mu wīma na būtūngīlīja? H'ī nguno yene pyī ī mihayo yakwe yajaga chiza.

¹⁶A bahabī na a bagayiwa wabagunījaga, h'ī chene ī mihayo yakwe yajaga chiza. Ī gīko h'ītī kūnimana nene?” Alīhaya SEEBA.

¹⁷Alīyo a miso gako nī ng'holò yako shikalalīlile kū sabo ja būnyeecha na kwita mininga gatī na shilingo na wiboneeji, na kūhongwa.

¹⁸Alilūūlū, ū mu mihayo ya ng'wa Yehoyakimu ng'witūnja o ng'wa Yosia, ū ntemi wa Yuda, ū SEEBA alīhaya gīkī, “Ū ng'wenūyo batūnīla bakūhayaga, ‘Aī twaluha ng'wanong'wise!’ Nūūlū gīkī, ‘Aī twaluha ilūmbū lyane!’ Batūnīla bakūhayaga, ‘Aī baba ntaale wane!’ Nūūlū gīkī, ‘Aī baba nkūjiwa!’

¹⁹Akūjīkwa kajīkīlwe ka nyayobe, bo kūfunyiwa ī hanze ya mibità ya Yelusalemu akūgwesanjiagwa, ūūkaponyiwa kwenūko.”

²⁰Jaga Lebanoni ūkalīle ng'hūngū, Ī lilaka lyako liigwiwe mu Bashani; nī Abalimu jaga ūkatandagūke; nguno pye a bitogwa bako baashikīlile shiki shiki.

²¹Ū nene naakūhūgūla no aho ūtaalī ūkwibonaga gīkī ūlī mhola, nang'ho washosha dūhū, “Yaya ū nene ū kūdegeleka!” H'ūmo ūlī ū bebe kwīngīīla ha walūki wako; ūlemile ū kūliigwa ī lilaka lyane.

²²Ū nyaga gūkūbaheheeja pye a badīīmi bako bashile, a bitogwa bako bakūsolwa batwalwe mu būding'wa. Hūna ūkūgooka na kūding'wa minala kūlwa nguno ya būbi wako ū bose.

²³Bebe ng'wikaji wa Lebanoni,[35] ūyo chanjo shako ūzengellile mu mitī ya mikoola; līkūkūpandīka dūhū ī likanza lya kūlung'wa būsūngū; ūkūlīla no gītī nkīma alī ng'wikanza lya kūbyala!

²⁴Ū SEEBA alīhaya, “Ūmo nene nalī mpanga, ū bebe Konia,[36] ng'witūnja o ng'wa Yehoyakimu, ntemi wa Yuda, nūūlū ni wabiza pete ya lūmeng'ho kū lwala lwa nkono gwane gwa būlyo, nahene ni nakūchūūla nūkwīnja ho.

²⁵Nakūkūtūūla mu makono ga banhū abo ūbogohile, abo bakūbūkoobaga ū būpanga wako; mu makono ga ng'wa Nebukadineza, ntemi wa Babuloni na ga Bakalidayo.

²⁶Ū bebe nakūkūluuta kūle, pyī nū noko ūyo wakūbyala, mukūja kū sī yīngī ūko mutabyalīlilwe; bose mukūjūchīla kwenūko.

²⁷Mutūdūla ū kūshoka hangī ū kū sī īyo mulī na ng'hūmbū ja kwīshokela.”

²⁸Ū munhū ng'wenūyū ū Konia, adalahilwe no gītī nungū ībelekile, abange gītī līlūjo īlo atīho munhū wa kūlikūmvwa? Nibūlī ū wei na a baana bakwe aponyiwe kū sī īyo batīmanile?

²⁹Ee sī! Bebe sī! Sī bebe! Gwigwage ū mhayo go ng'wa SEEBA.

³⁰Ū SEEBA alīhaya gīkī, “Ū munhū ng'wenūyū ng'wisaabage gīkī atī na ng'wana, munhū ūyo atīko kūbbyedecha shose shose ū mu shikū jose ja būlamu wakwe. Nguno ū mu būbyīle wakwe atilonga wa kwīlūkīlwa nūūlū ūmò, atīho wa kwigasha a h'isumbī lya būtemi lya ng'wa Daūdi; nūūlū wa kūsuga hangī ū mu sī ya Yuda.”