Read Sukuma Bible 2015 – Bibilia Ilagano Lya Kale 2015 Yelemia 25 Bible Online

Yelemia 25 - Sukuma Bible 2015 – Bibilia Ilagano Lya Kale 2015 bible

Yelemia 25

¹Mu ng'waka gwa kanè gwa būsugi bo ng'wa Yehoyakimu, ng'witūnja o ng'wa Yosiya ntemi wa Yuda, ūyo gwalī ng'waka gwa kwandya go ng'wa Nebukadineza ntemi wa Babuloni, mhayo gūkiza kūlī Yelemia kūlwa banhū bose ba Yuda.

²Ū ng'hangi Yelemia ūbinha ū mhayo gwenūyo pye a banhū ba Yuda, na a bikaji ba mu Yelusalemu bose pye.

³Kwīngīīla mu ng'waka gwikūmi n'idatū gwa būsugi bo ng'wa Yosia ng'witūnja o ng'wa Amoni ntemi wa Yuda, kūshisha lelo īyī, yashikaga myaka makūmi abīlī n'idatū. Ū mhayo go ng'wa SEEBA gūkamanagiza ū kūlī nene ng'hangala na ng'hangala, nane namuwīla, alīyo a bing'we yaya ū kūdegeleka.

⁴Nūūlū īkī ū SEEBA wikalaga wishokeela ng'hangala na ng'hangala kūmutūmīla pye a batūmami bakwe a bahangi, alīyo nahene a bing'we ng'walī mulemile ū kūdegeleka nū kūdīlīla.

⁵Baamuwīlaga, “Bing'we galūkagi ī haha, būlī ūmò wing'we īnge ū mu nzīla jakwe ī jabūbi, nī shītīle ī sha malofu, hū mukwikala ū mu sī īyo SEEBA wang'winha a bing'we, na a bakūlūgenji bing'we, ībize ying'we ya būja na būja.

⁶Lekagi ū kūlondeela bamulungu bangī kūbalamya na kūbatūmamīla; yaya ū kūnikoloosha kūshisha munipelanye mu nzīla ya shikolo īsho mukabeejaga na makono ging'we. Ū mu gīko hū natūmukenaagūla.

⁷“Alīyo mutanidīlīlile, ‘Alīhaya SEEBA,’ ng'ongeja dūhū kūniikoloosha mu nzīla ya shikolo īsho mukabeejaga bing'we benekīlī na makono ging'we, kūlwa kwiyenhela mayanga bing'we benekīlī.”

⁸Alilūūlū, ū SEEBA wa mabità alīhaya, “Īkī mukalema ū kwīdīlīla ī mihayo yane,

⁹nakūbalaalīka pye a banhū ba ng'anda ja sukuma, nū ntūmami wane ū Nebukadineza, ū ntemi wa Babuloni.” Alīhaya SEEBA. “Nakūbenha bize bīdumīle ī sī yenīyī na a bazengi baamo, na a ba mu mahanga ayo galī hihī hiī. Nakūbakenaagūla pye gete, nabīīte kūbiza shikolo sh'igekemaja na kūdalahwa; bakūkenaagūka ilalī.

¹⁰Hama nakūbīngīja a malaka ga seko, na a ga mhūndū ja būyegi; nakūbīngīja a malaka ga būyegi wa ntoji na wa ntolwa, na ga mihilimo ya mawe ga kūsheela, pyī nū būng'weku bo tala.

¹¹Ī sī yenīyī īkūbipa no, nīyo īkūlekwa īlī dalali pyī ī yose; na a mahanga genaya gakūntūmamīla ū ntemi wa Babuloni ikanza lya myaka makūmi mpungatī.

¹²“Alīyo ī myaka makūmi mpungatī ūlū yūkwīndanha, ū ntemi wa Babuloni nakūng'winha nsango nī līhanga lyakwe, ī sī ya Bakalidayo. Alīhaya SEEBA. Ī sī yenīyo nakwīyīta ībize dalali ilalī.

¹³Ī sī yenīyo nakwītūmīla pye a mayanga ayo naagahaya gīkī nakwīyenhela, gose pye ayo gandīkilwe ū mu shitabo īshi, ayo Yelemia agahangīlile mahanga gose.

¹⁴A banhū benabo nabo bakūtūūlwa mu būsese ha sīlīlī ya mahanga mingī na batemi bataale. Nakūbinha mheela ya kūlenganīla na shītīle shabo, nī milīmo ya makono gabo.”

¹⁵Ū SEEBA, ū Mulungu wa Isilaeli akaniwīla mhayo ūyū; gīkī, “Shanukūlage ī shikombe shenīshi kūfuma ū mu nkono gwane; ī shoi shokalile divai ya būpelanu bone, ūje ūlībang'wisha pye a banhū ba mahanga ūko nalīkūtūma.

¹⁶Ūlū bīng'wa bakūyūlelengeta, hangī nīyo bakūsala kūlwa nguno ya būlūgū ūbo nakūbatūmīla.”

¹⁷Ng'hana nūshanukūla ī shikombe shenīsho kūfuma ū mu nkono go ng'wa SEEBA, nūja nalīgang'wisha pye a mahanga ūko walī wanitūma.

¹⁸Nakandīja Yelusalemu nī mizengo ya Yuda, na a batemi baamo, na a bataale. Nakīyīta yūbiza misaka yike na shikolo sh'igekemaja na sha kwibengelejiwa, na sh'izumo gīt'ūmo īlī kūshisha na lelo īyī.

¹⁹Nū Falao, ū ntemi wa Misili, na a batūmami bakwe, na a bataale ba selekali yakwe, na a banhū bakwe pye a bose.

²⁰Na a ba kūfuma sī ja hanze pye a bose abo balī ng'wenūmo; a batemi ba Uzi pye, na a batemi ba Bafilisiti pye a bose (banhū ba kūfuma Ashikeloni, Gaza, Ekuloni, na a ba būshiigo kūfuma mu bana Ashidodi);

²¹na a bana Edomu na Moabu na Amoni;

²²na a batemi ba Tulo na Sidoni pye a bose; na a batemi ba kū sī ja nkīlo ya nyanza kū mbalama yaho,

²³gītī Dedani, Tema, Buzi, na a ba kū mapandī ga kūle pye a bose;

²⁴a batemi ba sī ja Baalabu pye a bose, na a batemi ba banhū ba mu sī ja nhogolo pye a bose.

²⁵Kūja kū batemi bose ba sī ja Zimuli, Elamu na Būmeedi.

²⁶Na a batemi ba kū sī ja sukuma pye pye pye; ījo jilī kūle nī ja hihī, mabūsugi na mabūsugi ga mu sī, būlī lyene līkūshing'wa. Hanuma ūlū būkalīka pye a benabo, nū ntemi wa Sheshaki[40] ūshing'wa nang'hwe.

²⁷“Alilūūlū bawīlage, ‘Ū SEEBA wa mabità, ū Mulungu wa Isilaeli, alīhaya gīkī, Ng'wagi muleewe, mulūke na kūlūka; hama mugwe hasī ilalī mutizūbūūka hangī, kūlwa nguno ya līlūshū īlo nakūmutūmīla.’

²⁸Alīyo ūlū būlema ū kūshanukūla na kūshing'wa ī shikombe īsho shilī ū mu nkono gwako, ūkūbawīla; ‘Ū SEEBA wa mabità alīhaya gīkī, Mukūshing'wa dūhū!

²⁹Nguno ī haha nandyaga kwenha būkenaagūji ū mu nzengo ūyo gūkitanīlagwa kū lina lyane. Muliganika a bing'we hū mukūgwiliga ū nsango? Mutūgūpūlūgūka ū nsango na hado yaya; nguno nalīlagīja līlūshū kūlwa banhū ba mu sī jose, alīhaya SEEBA wa mabità.’

³⁰“Hūna lūūlū ī haha bahangīlage pyī ī mihayo yenīyī; ūbawīle: ‘Ū SEEBA akūzuumīīla kūfuma kwigūlya; akūpalalūka kūfuma kwipandī lyakwe lyela, akwīzuumīīlīla ī sī yakwe n'ilaka lya nguzu. Akūyoganya gītī bapandagīji ba mizabibu, akūbayogeela pye a bikaji ba mu sī.

³¹Ī yogè yenīyo īkwigwiwa pye a hose ū mu sī, nguno ū SEEBA agapelanīlile a mahanga; akūbalamula pye a banhū, a babūbi akūbabūlaga bo līlūshū,’” alīhaya SEEBA.

³²Ū SEEBA wa mabità alīhaya, “Managi gīkī ng'henaagūka īliza, īkūkūmbanīja mahanga na mahanga; nshūlūlū gūlīfeefenya gūfumile kū mapandī ga ngelelo ya sī.”

³³Ū ng'wikanza lyenīlo abo akūbabūlaga ū SEEBA bakūbiza bingī no, basalang'hanile būlī kwene, kūfuma kū wandījo bo sī kūshisha kū būkalīkījo wayo. Batūūlīlwa, hama ndūhū nūūlū kūbilingwa; yaya nū kūgung'wa, bakūbiza gītī ndeelya jisambaalile mu malaale.

³⁴Bing'we badīīmi, līlagi mutūle ng'hūngū; galagalagi mu lūbuubu a bing'we balang'hani b'idaale, nguno ī shikū ja kūsīnzwa kwing'we jashika; mukūgwa muyūbelagūka gītī nungū.

³⁵A badīīmi batūpandīka ha kūpeelela; a balang'hani b'idaale batī na ha kūpūlūgūkīla.

³⁶Kūdegelekagi ū kūlīla kwa badīīmi, ī ng'hūngū ya balang'hani b'idaale, nguno ū SEEBA alīgakenaagūla a madīīmīlo gabo.

³⁷A madīīmīlo a malembeezu gakūbiza dalali, kūlwa nguno ya būpelanu būtaale bo ng'wa SEEBA.

³⁸Akwīnga gīt'ūmo shimba īkīngīlaga ng'wihalo lyayo, hūna ī sī yabo īkūbiza dalali, kūlwa nguno ya līlūshū lya ng'wiboneeji, na kūlwa nguno ya būpelanu būtaale bo ng'wa SEEBA.