Read Sukuma Bible 2015 – Bibilia Ilagano Lya Kale 2015 Yelemia 26 Bible Online

Yelemia 26 - Sukuma Bible 2015 – Bibilia Ilagano Lya Kale 2015 bible

Yelemia 26

¹Mu shikū ja wandījo wa būsugi bo ng'wa Yehoyakimu ng'witūnja o ng'wa Yosiya, ntemi wa Yuda, ū mhayo ūyū gūkiza kūfuma kūlī SEEBA:

²“Ū SEEBA alīhaya gīkī, Jaaga ūkīmīīle ū ng'wibindo lya numba ya ng'wa SEEBA, ūlūngalūnge nabo a banhū ba Yuda a bose, abo bakīngaga kū mizengo yabo kwiza kūlamya ū mu numba ya ng'wa SEEBA. Ūkūbawīla pyī ī mihayo īyo nalīkūlagīla; ūtizūlekeela mhayo nūūlū gūmò.

³Hamo bakwigwa bagalūke, būlī ūmò wabo īnge ū mu nzīla yakwe ī yabūbi. Ū mu gīko nakūgalūcha a maganiko gane, natizūbenhela ū būkenaagūji ūbo nabūhelile kūlwa nguno ya būbi wa shītīle shabo.

⁴Lūngalūngaga nabo ūbawīle, ‘Ū SEEBA alīhaya gīkī, Ūlū mutūniigwa mushilondeele ī shilagīlo shane īsho naamutūūlīla,

⁵hama ng'ūlema nū kwīdīlīla ī mihayo ya batūmami bane a bahangi, abo nakamutūmīlaga ng'hangala na ng'hangala, (nūūlū īkī mutadīlīlaga),

⁶Ī numba yenīyī nakwīyīta ībize gītī Shilo, lelo ū nzengo gwenūyū, ū gwene nakūgwīta gūbize gw'izumo kū mahanga gose ga mu sī.’”

⁷A bagabīji na bahangi na a banhū a bose bakang'wigwa ū Yelemia aho alīyomba ī mihayo yenīyī ū mu numba ya ng'wa SEEBA.

⁸Ū Yelemia aho wamala ū kūbawīla pye a banhū būlī mhayo ūyo walī walagīlwa na SEEBA kwīhaya, a bagabīji na bahangi, na a banhū a bose būndima; būng'wīla, “Shiigelile ūche ū bebe!

⁹Nibūlī ūlīhanga mu lina lya ng'wa SEEBA gīkī ī numba yenīyī īkūbiza gītī Shilo, nū nzengo gwenūyū gūkūkenaagūlwa na gūkūbiza dalali?” Pye a banhū būng'witinja ū Yelemia ū mu numba ya ng'wa SEEBA.

¹⁰A bataale ba būsugi wa Yuda baalī kwikūlū, aho bīyigwa ī mihayo yenīyī bīnga koi, būja ū kū numba ya ng'wa SEEBA; būūkigasha ha Mita Mpya gwa numba ya ng'wa SEEBA, būlī ng'wene h'ipandī lyakwe.

¹¹Hūna a bagabīji na a bahangi būbawīla a bataale ba būsugi na a banhū pye a bose, “Ū munhū ng'wenūyū igeleelilwe nsango gwa kūcha, kūlwa nguno ya kūgūhangīla ū nzengo gwenūyū. Bing'we benekīlī ng'wigwaga na matū ging'we.”

¹²Nang'hwe ū Yelemia ūbawīla a bataale ba būsugi na a banhū pye a bose gīkī, “Ū SEEBA wanitūmaga kwīhangīla ī numba yenīyī nū nzengo gwenūyu pyī ī mihayo īyo ng'wīyigwaga.

¹³Alilūūlū, galūchagi ī nzīla jing'we nī shītīle shing'we, mubize biigwi ū kwilaka lya ng'wa SEEBA Mulungu wing'we. Hūna nang'hwe ū SEEBA akūmulekeja, atūwenha ū būkenaagūji ūbo wabūhayile kūlwa nguno ying'we.

¹⁴Alīyo ūlū ū nene ng'wene, nalī mu makono ging'we ī haha; nīītīlagi ūyo mulīgūbona gīkī gūlī gwawiza na gūtūngīlīgije ū kū bing'we.

¹⁵Kwike shiigelile ng'witegeleje gīkī, ūlū mulanibūlage, a bing'we benekīlī mukwiyenhela nsango, nū nzengo gwenūyū, pye na a bazengi baamo; kūlwa kwita mininga ga munhu atī na shilingo. Nguno ū nene wanitūmaga ng'hana ū SEEBA ū kū bing'we nize namusomboolele pyī ī mihayo yenīyī, ng'wīyigwe na matū ging'we.”

¹⁶Hūna a bataale ba būsugi na a banhū pye a bose būbawīla a bagabīji na a bahangi, “Ū munhū ng'wenūyū atigeleelilwe nsango gwa kūbūlagwa; nguno wayombaga nise mu lina lya ng'wa SEEBA Mulungu wise.”

¹⁷Bamò na bamò ū mu banamhala ba sī bīmīīla, būbawīla pye a banhū abo baalī bibilinga gīkī,

¹⁸“Mu shikū ja ng'wa Hezekia ntemi wa Yuda, Mika muna Moleshesi akahanga, ūbawīla pye a banhū ba sī ya Yuda, ‘Ū SEEBA wa mabità alīhaya gīkī, Ī Sayuni īkūlīng'wa gītī ilaale, Ī Yelusalemu īkūbiza matūūgo ga makambagūkīle, ū lūgūlū lwa hekalu gītī shigūlū shokalīīlwa masaka.’

¹⁹“Angū ū Hezekiya ntemi wa Yuda, nūūlū ūngī ose ose ū mu Yuda, bakamulaga ū Mika? Ū Hezekiya atidohije dūhū ū kūlī SEEBA ūnomba kūbachīla shigongo? Ū SEEBA nang'hwe atalekegije ūleka ū kūwenha ū būkenaagūji ūbo walī wabūhaya kūlwa nguno yabo? Ī haha a bise tūlī hihī kwiyenhela mayanga mataale no!”

²⁰Alīyo walīho na munhū ūngī, Ūlia ng'witūnja o ng'wa Shemaya muna Kiliati-yelimu; nang'hwe akahanga mu lina lya ng'wa SEEBA; ūgūhangīla ū nzengo gwenūyū nī sī yenīyī mihayo ya mbika gītī yenīyī, ūmo wītīlaga Yelemia dūhū gīkī.

²¹Ū ntemi Yehoyakimu na a batūmami bakwe, hamò na a bataale ba būsugi wakwe aho bīyigwa ī mihayo ya ng'wa Ūlia, būbona gīkī bamūlage. Alīyo ū wei aho wigwa ogoha, ūpeelela Misili.

²²Kwike ū ntemi Yehoyakimu ūntūma Elinasani ng'witūnja o ng'wa Akiboli, ūja ī Misili hamò na bagosha bangī;

²³būūkang'wenha ū Ūlia kūfuma ī Misili, būntwala ū kūlī ntemi Yehoyakimu; ūlagīja ūbūlagwa bo līlūshū, ū mimba gwakwe gūūkajīkwa kwipandī īlo bakajīkīlagwa banhū batī n'ikūjo ū ng'wihanga.

²⁴Hama hangī akilonga ngosha ūngī, Ahikamu ng'witūnja o ng'wa Shafani. Ū ngosha ng'wenūyo ūng'wīmīīla ū Yelemia gīkī wikale mhola atizūtūūlwa mu makono ga banhū bamūlage.