Read Sukuma Bible 2015 – Bibilia Ilagano Lya Kale 2015 Yelemia 30 Bible Online

Yelemia 30 - Sukuma Bible 2015 – Bibilia Ilagano Lya Kale 2015 bible

Yelemia 30

¹Ū mhayo ūyū gūkiza kūlī Yelemia kūfuma kūlī SEEBA:

²“Ū SEEBA, ū Mulungu wa Isilaeli, alīhaya gīkī, ‘Ī mihayo īyo nakūkūwīlaga yandīkakage mu shitabo pyī ī yose.

³Nguno shikū jikūshika,’ alīhaya SEEBA, ‘ja kūbenha a banhū bane a Baisilaeli na a Bayudaya kūfuma ū kū būding'wa wabo, nabashoshe hangī ū mu sī īyo naalī nabisagīja bakūlūgenji babo gīkī īkūbiza yabo,’ alīhaya SEEBA.”

⁴Ī mihayo īyī ū SEEBA akīhaya kūlwa sī ya Isilaeli na Yuda:

⁵“Ū SEEBA alīhaya gīkī, ‘Īkwigwiagwa yoge kūlwa kūbbaha, līlīho idetemya banhū, ī mhola ītīho.’

⁶Būūjagi mukūbona ūmo īlī ī mihayo: Ū ngosha adūgije kūbyala ng'wana? Hama ni kinehe nalībona būlī ngosha wa nguzu idimile makono mu nkīmbīlī, gītī nkīma alīlung'wa būsūngū; na būlī būshū būmining'halile?

⁷Ū lūshikū lwenūlo lūkūbiza lwa lyogohya no! Lūtī na shigemelo, līkūbiza ikanza lya mayanga ū kūlī Yakobo; kwike akūlīpūlūgūka.”

⁸“Ū SEEBA wa mabità alīhaya gīkī, ‘Ū mu lūshikū lwenūlo nakūlībīnzagūla ī lijoki nalyīnje ū mu nhingo jabo; nī minyololo yabo nakwītīnagūla, batalabiza basese kū mahanga gangī hangī.’

⁹A ha ng'wanya gwaho bakūntūmamīla SEEBA Mulungu wabo, na ntemi wabo wa lūganda lo Daūdi, ūyo nakūngūngūhya nabatūūlīle.

¹⁰‘Hūna lūūlū lekaga kogoha ū bebe ntūmami wane Yakobo. Ee Isilaeli, yaya ū kūtawa tawa,’ alīhaya SEEBA. ‘Nakūkūpīja kwīnga kūle; Ī shibyalīlwe shako nakūshīnja ū mu sī ya būding'wa washo. Ū Yakobo akūpandīka mhola na būlembeezu hangī; na atilonga wa kūng'ogohya.

¹¹Nalī hamò nang'ho nakūkūpīja, alīhaya SEEBA. Nūūlū nagakenaagūle gashile gete a mahanga ūko nalīmusambaagīja, alīyo ū bebe natūkūmala ho gete; ū kūkūhūgūla nakūkūhūgūla, kwike mu būtūngīlīja; natūleka ū kūkwinha ū nsango.’

¹²“Ū SEEBA alīhaya gīkī, ‘Ī lilonda lyako lītī lya kūlagūlwa, ī ligulaagīje lyako lītīko kūpīla.

¹³Ū mu mihayo yako atīho wa kūkūgunīja, ī ligulaagīje lyako lītī lya kūpīla; Ītīho nzīla ya kūkūpīgīja.

¹⁴Pye a bitogwa bako baakwībile, boyile ū kūkūdīīlīla. Ū bebe naakūtūlile gītī nalītūla ng'wanishi, nūkwinha nsango gītī nalī ng'wiboneeji; nguno ū būbi wako būtaale no, nī shibi shako shingī no.

¹⁵Nibūlī līlīkūlīja Ī ligulaagīje lyako, ū kūsaatwa kwako ūyo kūtī na nzīla ya kūpīlīla? Ī yenīyī naakwītīlile kūlwa nguno ya būtaale wa būhūbi wako, na wingī wa shibi shako.’

¹⁶Alīyo abo bakūkūlya ū bebe, nabo bakūliiwa pye a bose; pye a banishi bako bakūja mu būding'wa. Abo būkūtaaja sabo jako bo nguzu nabo bakūtaajiwa bo nguzu ī jabo; na a ba kūkūkenaagūja shako nane nakūbakenaagūja ī shabo.

¹⁷Alīyo ū bebe nakūkūshokeja Ī mhola yako; na a magulaagīje gako nakūgapīja. Alīhaya SEEBA, ‘Nguno bakakūhayaga ūlī neng'wa, Sayuni īyo ītī na ndīlīji.’

¹⁸Ū SEEBA alīhaya gīkī, ‘Nakūjishokeja ī ng'hambī ja ng'wa Yakobo, nabūchīle shigongo ū wikalo bokwe; ū nzengo gūkūzengwa hangī a ha makambagūkīle gago, nī likūlū līkwīmīīla a h'ipandī lyalyo aho liigeleelilwe.

¹⁹Mīmbo ga kūkumīlīja na būyegi gakūyigwiwa kūfuma mo. Nakūbongeja ū wingī wabo, batūgeha na hado yaya; hama nakūbīīta babize bakūjiwa, batūbiza banhū ba kwibengelejiwa.

²⁰A baana babo bakūbiza gīt'ūmo baalī mu shikū ja kale; ū būsugi wabo būkwīmīīla na nguzu ū kū būtongi bone. A biboneeji babo nakūbīnha nsango pye a bose.

²¹Ū ntongeeji wabo akūbiza ūmò wabo boyi benekīlī; ū nsugi wabo akwigela kūfuma mubo. Nakūng'wegeleja nene, na ng'hana akūbiza bbihī na nene, Ī gīsī alīho nani ū wa kūgima kwifunya kūnegeela nene? Alīhaya SEEBA.

²²A bing'we mukūbiza banhū bane, nū nene nakūbiza Mulungu wing'we.’

²³Managi gīkī gūkwiza nshūūlūlū kūfuma kūlī SEEBA; gūkwiza gwidosile mu būdaki būtaale, gūkūbikīīla ha mitwe a babūbi.

²⁴Ū būpelanu bo ng'wa SEEBA būtaale no; būtūshila kūshisha ayīshikīlīje Īyo ayīhelile mu ng'holò yakwe. Ī yenīyī mukwīyitegeleja kū shikū ja kū būtongi.