Read Sukuma Bible 2015 – Bibilia Ilagano Lya Kale 2015 Yelemia 34 Bible Online

Yelemia 34 - Sukuma Bible 2015 – Bibilia Ilagano Lya Kale 2015 bible

Yelemia 34

¹Ū ntemi Nebukadineza wa Babuloni walī nalyo ī libità lyakwe pyī ī lyose, na mabità ga mabūtemi pye ayo gaalī ha sīlīlī yakwe, na banhū bangī abo walī abasugile. Lyalī ikanza lya kūgūdumīla ū nzengo gwa Yelusalemu nī mizengo ī yose īyo īgūpīndije; ū mhayo ūyū gwiza kūlī Yelemia kūfuma kūlī SEEBA; gūhaya:

²“Ū SEEBA, ū Mulungu wa Isilaeli, alīhaya gīkī, Jaga ū kūlī Sedekia ū ntemi wa Yuda ūkang'wīle, ‘Ū SEEBA alīhaya gīkī, Ū nzengo gwenūyū nalī hihī kūgūtūūla mu makono ga ntemi wa Babuloni, ūyo akūgūtwima moto.

³Nū bebe ūtūpūlūgūka, ūkūdingwa dūhū ūtūūlwe mu makono gakwe. Ūkūmona ū ntemi wa Babuloni na miso gako bebe ng'wenekīlī; nang'hwe akūlūngalūnga nang'ho ng'wilolaga gīkī būshū kū būshū. Hanuma ya henaho ūkūtwalwa Babuloni.

⁴Alīyo nahene, Ee Sedekia ntemi wa Yuda, gwigwage ū kwisagīja kwa ng'wa SEEBA, ‘Ū mu mihayo yako ū bebe, ū SEEBA alīhaya gīkī, Ūtūchīla ū mu būlūgū.

⁵Ū kūcha mu būlembeezu; ūmo banhū bakapembela moto ha lūfu kūlwa kūbakūja ba so, abo baalī batemi aho bebe ūtaalī kūbiza ho, na h'ikanza lyako bakūpemba moto kūlwa kūkūkūja,’ na bakūlīla balīhaya, ‘Aa baba watūleka!’ Nene ng'wenekīlī nalīkwisagīja ū mhayo gwenūyū, alīhaya SEEBA.”

⁶Hūna ū ng'hangi Yelemia ūng'wīla pyī ī mihayo yenīyī ū Sedekia, ū ntemi wa Yuda, walī mu Yelusalemu.

⁷Ū ng'wikanza lyenīlo a mabità ga ntemi wa Babuloni galwaga būlūgū nū nzengo gwa Yelusalemu, nī mizengo ya Yuda ī yīngī īyo yalī ītaalī ū kūgwishiwa, gītī nzengo gwa Lakishi na Azeka. Ī yenīyī h'ī mizengo iyene īyo yalī yasaagīīla īpīndīlīgije ndugu ū mu Yuda.

⁸Ū ntemi Sedekia akabeeja būlagane na a banhū ba Yelusalemu pye a bose, kūlwa kūbinha wiyaabī abo baalī mu būsese; aho wamala ū kwīta ī gīko, mhayo gwiza kūlī Yelemia kūfuma kūlī SEEBA.

⁹Yūbiza būlī munhū ūyo alī na nsese Ng'hebulania, ngosha nūūlū nkīma, ang'winhe wiyaabī; walī atīho wa kūntūūla mu būsese Nyudaya ng'wiye.

¹⁰Na ng'hana pye a bataale na a banhū a bangī abo bakingīla ū ng'wilagane lyenīlī būzūnya gīkī bakūbinha wiyaabī a basese babo, a bagosha na a bakīma; batikala babatūūlile mu būsese.

¹¹Kwike a ha numa ya henaho bakagalūcha a maganiko gabo; būbadima a basese abo baalī nabo, būbashosha mu būsese hangī.

¹²Hūna ū mhayo go ng'wa SEEBA gwiza ū kūlī Yelemia; gūng'wīla:

¹³“Ū SEEBA, ū Mulungu wa Isilaeli, alīhaya, ‘A bakūlūgenji bing'we aho naabīnja ī Misili, ū mu sī ya būsese, nakabeeja nabo ilagane;’ nūbawīla gīkī,

¹⁴‘Būlī ng'waka gwa mpungatī, būlī ng'wene ū mu bin'gwe ang'winhe wiyaabī Ng'hebulaniya ng'wiye ose ose, ūyo wijinja kūlī we kūbiza nsese; ūlū ūntūmamīla kūshisha myaka itandatū, shiigelile anekele aje, abize mu wiyaabī.’ Alīyo a bakūlūgenji bing'we batanidegelekīle, nūūlū kūnidīlīla yaya.

¹⁵Haha haha dūhū ng'walī ng'wagalūkile, ng'wīta mhayo nsoga no kū būtongi bone; būlī ūmò wing'we ūng'winha wiyaabī ndūgūye. N'ilagane ng'ūbeeja kū būtongi bone, mu numba īyo īkitanīlagwa kū lina lyane.

¹⁶Alīyo hangī ng'wagalūkile, ng'ūbiza basosohaja ba lina lyane; nguno būlī ūmò wing'we wanshokije mu būsese hangī, ngosha nūūlū nkīma ūyo walī wang'winha wiyaabī aje ūko atogelilwe. Ng'wabahadīkile hangī kūbiza basese bing'we.”

¹⁷Hūna lūūlū ū SEEBA alīhaya gīkī, “A bing'we mulemile ū kūniigwa ū nene; mutaalī kūbinha wiyaabī a badūgū bing'we. Alilūūlū, ī haha nalīng'winha ‘wiyaabī’ a bing'we, alīhaya SEEBA; ‘wiyaabī’ mu kūbūlagwa bo līlūshū, na mahūūya, na nzala. Nakūng'wīta mubize na saalaala ū kū mabūtemi ga mu sī pye a gose.

¹⁸A banhū abo baalīkenaagūlile ī lilagane lyane, būleka ū kwīdima īyo īhelilwe kūlwa kūlīshikīlīja ī lilagane lyane, īlo bakalībeeja kū būtongi bone, a benabo nakūbīītīla ūmo bakīyītīla ī ndama īyo bakīītandūla habīlī; hūna būbīta a ha gatīgatī ya mabudīka gayo.

¹⁹Baalīho a batongeeji ba mu sī ya Yuda, na ba nzengo gwa Yelusalemu, bataale ba ng'wikūlū, bagabīji, na a banhū a bangī pye abo bakabīta ha gatī gatī ya mabudīka ga ndama yenīyo.

²⁰Pye a benabo nakūbatūūla mu makono ga banishi babo, abo balī na ng'hūmbū ja kūbīngīja būpanga wabo. Ī mibimba yabo īkūbiza shilīwa sha noni ja kūlala, na shiinū ja mu matogolo.”

²¹Ū Sedekia, ū ntemi wa Yuda na a bataale ba mu būsugi wakwe, nakūbatūūla mu makono ga banishi babo, abo balī na ng'hūmbū ja kūbīngīja būpanga wabo; a b'ibità lya ntemi wa Babuloni, īlo lyalī lyīngile, lyoya ū kūmudumīla.

²²Nakūfunya shilagīlo, alīhaya SEEBA, nakūbashosha hangī ū kū nzengo gwenūyū. Bakwilwisha nago būlūgū bagūdime, hūna bagūtwime moto. Ī mizengo ya mu Yuda nakwīyīta ībize dalali, atizilonga wa kwikala mo.