Read Sukuma Bible 2015 – Bibilia Ilagano Lya Kale 2015 Yelemia 37 Bible Online

Yelemia 37 - Sukuma Bible 2015 – Bibilia Ilagano Lya Kale 2015 bible

Yelemia 37

¹Ū Sedekia akatemiwa na ntemi Nebukadineza wa Babuloni, ūbiza ntemi wa Yuda a ha ng'wanya go ng'wa Konia ng'witūnja o ng'wa Yehoyakimu.

²Alīyo nū wei ū Sedekia atīdīlīlile ī mihayo īyo SEEBA wīhayaga mu nzīla ya ng'hangi Yelemia, nūūlū a batūmami bakwe batīdīlīlile; pye na a banhū ba sī yenīyo.

³Kwike a hene ū ntemi Sedekia akantūma Yehukali ng'wana Shelemia, na ngabīji Sefania ng'witūnja o ng'wa Maaseya, baje ū kūlī Yelemia bakandayīīle gīkī, “Tūlīkwikūmbīlīja ūtūlombele ū kūlī SEEBA Mulungu wise.”

⁴Ū ng'wikanza lyenīlo ū Yelemia walī ataalī na wiyaabī bo kūyeela yeela ū mu banhū; nguno walī ataalī ū kūponyiwa mu jeela.

⁵Ibità lya bashilikale ba ng'wa Falao lyūbūūka kwīnga ī Misili; a Bakalidayo abo baalī baagūgobanīlile ū nzengo gwa Yelusalemu, aho bajiigwa ī ng'hūlū j'ibità lyenīlo bīnga ī Yelusalemu, būgūleka ū kūgūdumīla ū nzengo gwenūyo.

⁶Hūna mhayo go ng'wa SEEBA gwiza ū kūlī ng'hangi Yelemia; gūhaya:

⁷“Ū SEEBA, ū Mulungu wa Isilaeli alīhaya gīkī, ‘Ū ntemi wa Yuda ūyo wamutūmaga kwiza kūnibūūja,’ jagi mukang'wīle gīkī, ‘Ī libità lya bashilikale ba ng'wa Falao īlo līlī mu lūgendo kwiza kūmugunanha, līkūshoka Misili, kū sī yalyo.

⁸A Bakalidayo bakūshoka bagūdumīle ū nzengo gwenūyū bagūdime, bagūpembe moto.’

⁹Ū SEEBA alīhaya, Lekagi ū kwilemba muliganika gīkī, ‘A Bakalidayo bakūtūleka dūhū.’ Yaya batūmuleka!

¹⁰Nguno nūūlū mukalītūla pyī ī libità lya Bakalidayo īlo līlīmudumīla, ū mu ng'hambī jabo būsaaga mo balabūkile dūhū, alīyo nahene a benabo bakūpuluka bize bagūtwime moto ū nzengo gwenūyū.”

¹¹A Bakalidayo aho bīnga ī Yelusalemu kūlwa kūlyogoha ibità lya ng'wa Falao,

¹²ū Yelemia ūbūūka nang'hwe īngile ī Yelusalemu, aje kū sī ya Benjamini akanukūle ngabo go malaale gakwe kūfuma ū kū banhū ba kwenūko.

¹³Alīyo aho washika ha Mita gwa Benjamini, walīho hoi nang'hani wa mita ī lina lyakwe witanagwa Iliya ng'wana Shelemia, ng'witūnja o ng'wa Hanania; ū nang'hani ng'wenūyo akandima ū Yelemia ūng'wīla, “Ū bebe ūlītoloka ūkisangīje na Bakalidayo!”

¹⁴Ū Yelemia ūshosha, “Ītī gīko na hado yaya! Natūtolokaga kūja kwisangīja na Bakalidayo.” Alīyo ū Iliya atandegelekile ū Yelemia, ūndima dūhū ūntwala kū bataale.

¹⁵Bakampelanīla no ū Yelemia, būlagīla ūtūlwa mbooko na kūlugalīlwa mu numba ya ng'wandīki Yonasani, baalī bīgalūcha yūbiza jeela.

¹⁶Ū Yelemia aho watūūlwa ū mu jeela, ūponyiwa mu chumba sha ng'wichongo ū mu gatī ya jeela ng'wenūmo; akikala moi ikanza lya shikū ningī.

¹⁷Ū ntemi Sedekia ūnagīlīja wenhwa ū kwikūlū, ūmūja mihayo balī boi babīlī dūhū; ūhaya, “Gūlīho mhayo gose gose gwa kūfuma kūlī SEEBA?” Ū Yelemia ūshosha, “Gūlīho ng'hana; ū bebe ūkūtūūlwa mu makono ga ntemi wa Babuloni!”

¹⁸Hanuma yaho ū Yelemia ūng'wīla ū ntemi Sedekia, “Ū nene ng'waniponije mu jeela; naahūbile kī ū kūlī bebe, nūūlū ū kū batūmami bako, nūūlū ū kū banhū aba?

¹⁹Ī gīsī lūūlū balī halī a bahangi bako abo baalūkūhangīlaga gīkī, ‘Ū ntemi wa Babuloni atūkūdumīla ū bebe, nūūlū ī sī yenīyī’?

²⁰Alilūūlū baba ntemi, nalīkwikūmbīlīja ūnidegeleke. Gūūyū mhayo nalīkūlomba, Ūtizūnishosha hangī ū mu numba ya ng'wa Yonasani ū ng'wandīki, nguno nakūjūchīla mo.”

²¹Hūna ū ntemi Sedekia ūlagīla gīkī ū Yelemia atūūlwe ng'wibīndo lya balang'hani; hama būlī lūshikū ayinhwa ngatī kwīngīīla mu lūgali lwa boocha bayo; kūshisha īshile pyī ī migatī ū mu nzengo. Hūna ū Yelemia ūyikala mu gwalugwa ya balang'hani.