Read Sukuma Bible 2015 – Bibilia Ilagano Lya Kale 2015 Yelemia 38 Bible Online

Yelemia 38 - Sukuma Bible 2015 – Bibilia Ilagano Lya Kale 2015 bible

Yelemia 38

¹A ba Shefania ng'wana Matani, Gedalia ng'wana Pashuli, Yehukali ng'wana Shelemia, na Pashuli ng'wana Malikīya, bakīyigwa ī mihayo ya ng'wa Yelemia, īyo walī wabawīla pye a banhū; aho wahayaga:

²“Ū SEEBA alīhaya gīkī, ‘Ūyo ūsaaga ū mu nzengo ūyū akūbūlagwa bo līlūshū, nūūlū nzala nūūlū mahūūya; alīyo ūyo ūja kūbagwīla mu magūlū a Bakalidayo, akwikala mpanga; akūbūpīja ū būpanga bokwe; akūpīla.’

³Ū SEEBA alīhaya gūūyū mhayo, ‘Ū nzengo gwenūyū shiigelile gūtūūlwe mu makono ga ba shilikale ba ntemi wa Babuloni agūdime.’”

⁴Hūna lūūlū a basugi benabo būng'wīla ū ntemi, “Ū munhū ng'wenūyū shiigelile abūlagwe, nguno a bashilikale abo basaagīīlile ū mu nzengo gwenūyū na a banhū a bangī pye a bose alībagwisha ng'holò, kūlwa mamihayo gakwe ayo akwikalaga ūbawīla. Ū munhū ng'wenūyū atūbakoobelaga misoga a banhū benaba, ūlū ītī kūbakoobela makoye dūhū.”

⁵Ū ntemi Sedekia ūbawīla, “Ū ng'wenūyo alī mu makono ging'we, ū ntemi atadūgije kūmulemeja mhayo gose gose.”

⁶Hūna būnsola ū Yelemia būkantūūla ng'wichongo lya lwinzī lwa ng'wa Malikīya, ng'witūnja wa ntemi; lyalī mu gwalugwa ya balang'hani. Būng'wicha bo ngoye ū ng'wichongo lyenīlo, gaalī gatīmo minzī; boolīmo būlolo dūhū, ū Yelemia ūdidibīla ū mu būlolo wenūbo.

⁷Kwike walīho muna Esiopia ntūmami[44] wa hikūlū, witanagwa Ebedimeleki; akigwa ī gīkī ū Yelemia bantūūlaga ng'wichongo. Ū ntemi akasangwa alī ng'wibanza kū Mita gwa Benjamini.

⁸Hūna ū Ebedimeleki ūfuma ū ng'wikūlū wihuuta ū kūlī ntemi, ūūkang'wīla gīkī,

⁹“Baba wanyama, a banhū benaba bīītaga mibi no ī haha, kūtinda pyī īyo bang'wītīla ū ng'hangi Yelemia. Bamponyaga ng'wichongo lya lwinzī; ūlū shilashile ī shilīwa ū mu nzengo akūcha bo kūnanulwa nzala.”

¹⁰Ū ntemi ūnagīla ū Ebedimeleki ū muna Esiopia; ūng'wīla, “Ū mu banhū abo ūlī nabo aha solaga makūmi adatū, ūje nabo mukang'wīnje ū Yelemia ū ng'wichongo kūko ataalī kūcha.”

¹¹Ū Ebedimeleki ūbasola a banhū benabo ūja nabo, ūūkingīla ū mu numba y'ikūlū, ūja mu chumba shimò shaho sha kūbīkīla shikolo ū ng'wikūlū ng'wenūmo. Ūshika ūsola madaaso daaso na mamyenda makūlūkūlū; biza nago; hūna būgiicha bo lūgoye ū ng'wichongo ūmo walī ū Yelemia.

¹²Ū Ebedimeleki ū muna Esiopia ūng'wīla ū Yelemia, “Gapagage mu mangwa a mamyenda na a madaaso daaso genayo; ī ngoye jize a higūlya yaago jitizūkūsha.” Ū Yelemia wīta chene ng'hana.

¹³Būnduta bo ngoye jenījo, būmfunya ū ng'wichongo. Ū Yelemia akikala ū ng'wibīndo lya balang'hani ng'wenūmo.

¹⁴Ikanza līngī hangī ū ntemi Sedekia akanagīlīja ū ng'hangi Yelemia, wenhwa kū nyango gwa kadatū gwa kwingīlīla mu numba ya ng'wa SEEBA. Ū ntemi ūng'wīla ū Yelemia, “Bebe gūūyū mhayo nakūbūūje, kwike ūtizūnibisa shose shose!”

¹⁵Ū Yelemia ūnshokeja ū ntemi Sedekia ūhaya, “Ūlū nūkwinha ī lishosho lya ng'hana ūtūnibūlaga? Nguno nūūlū nūkūganikīla nahene ūtūnidegeleka.”

¹⁶Ū ntemi Sedekia ūng'wīlahīlīla ū Yelemia mu mbisīla; ūng'wīla, “Ūmo SEEBA alī mpanga, ū meeja wa ng'holò jise, natūkūbūlaga, nūūlū natūkūtūūla ū mu makono ga banhū abo balī na ng'hūmbū ja kūkūbūlaga.”

¹⁷Hūna ū Yelemia ūng'wīla ū Sedekia, “Ū SEEBA Mulungu wa mabità, ū Mulungu wa Isilaeli, alīhaya gīkī, ‘Ūlū ūbagwīla mu magūlū a basugi ba ha sīlīlī ya ntemi wa Babuloni, ū būpanga wako būkūpīla, nū nzengo gwenūyū gūtūtiing'wa moto; hama ū bebe nī kaya yako mukwikala mhola.

¹⁸Alīyo ūlū ūtūbagwīla mu magūlū a basugi ba ha sīlīlī ya ntemi wa Babuloni, ū nzengo gwenūyū gūkūtūūlwa mu makono ga Bakalidayo bagūtiime moto; nū bebe ng'wenekīlī ūtūpūlūgūka ū mu makono gabo.’”

¹⁹Ū ntemi Sedekia ūng'wīla ū Yelemia, “Nalībogoha a Bayudaya abo bapeelelile kū Bakalidayo. Nguno a Bakalidayo badūgije kūnitūūla mu makono gabo; bakūnīītīla yabūbi no.”

²⁰Ū Yelemia ūshosha ūng'wīla, “Batūkūtūūla ū mu makono ga Bayudaya, ū bebe ng'wigwage ū SEEBA, wīte ūmo nalīkūwīlīla. Ī mihayo yako īkūgololoka, nū būpanga wako būkūpīla.

²¹Alīyo ūlū ūlema ū kūbagwīla mumagūlū, ū SEEBA wamalaga kūnolekeja mhayo gūūyū:

²²‘Pye a bakīma abo baalekeelilwe ū ng'wikūlū lya Yuda bakūfunyiwa hanze, batwalwe kū basugi ba mu selekaali ya ntemi wa Babuloni.’ A bakīma benabo bakūkūwīla gīkī, ‘A banwani biyo abo ūbasanije baakūlembagūlile būkwibanga. Ī haha watīnije, a magūlū gako galī mu tembe; a banwani biyo baakūlekanīgije.’

²³A bake bako na a baana bako bakūfunyiwa pye a bose, batwalwe kū Bakalidayo. Nū bebe ng'wenekīlī ūtūpūlūgūka ū mu makono gabo, ū ntemi wa Babuloni akūkūdima dūhū; ū nzengo gwenūyū ūkūgwenheleja gūtiing'we moto.”

²⁴Hūna ū Sedekia ūng'wīla ū Yelemia, “Atizilonga munhū nūūlū ūmò wa kwīdeeba īyo twīhooyela yenīyī; nguno ūshikile kūbūlagwa.

²⁵A basugi ūlū bigwa gīkī nahooyaga nang'ho, hūna biza kūkūwīla, ‘Tūwīlage īyo wang'wīla ū ntemi, nī yīyo wakūwīla ū bebe; ūtizūtūbisa, ūlū ītī chene tūkūkūbūlaga,’

²⁶a henaho ūkūbawīla gīkī, ‘Nalūng'wikūmbīlījaga ū ntemi atizūnishosha ū kū numba ya ng'wa Yonasani, kūjūchīla ko.’”

²⁷Na ng'hana pye a basugi būng'wikuunūkīla ū Yelemia bandya kūmūja, nang'hwe ūbawīla pyī īyo ntemi walī wanagīla kūhaya. Būhuumūla dūhū būneka, nguno walī atīho nūūlū ūmò ūyo walī wagiigwa a mahooya gakwe nū ntemi.

²⁸Ū Yelemia akikala ū mu gwalugwa ya balang'hani kūshisha lūshikū lwa kūding'wa ū nzengo gwa Yelusalemu.