Read Sukuma Bible 2015 – Bibilia Ilagano Lya Kale 2015 Yelemia 4 Bible Online

Yelemia 4 - Sukuma Bible 2015 – Bibilia Ilagano Lya Kale 2015 bible

Yelemia 4

¹Ee Isilaeli, ūlū ūlīshoka shokaga kūlī nene, alīhaya SEEBA. Ūlū ūshīnja ī shiikolile shako sha malofu ū kū būtongi wane, hūna oya ū kūtagaalīja,

²hama ūyilahīla mu ng'hana, na wīma na būtūngīlīja gīkī, “Ūmo SEEBA alī mpanga, a mahanga akūgīīlūkīla mbango, hangī gakūyegela no ū mulī we.”

³Nguno ū SEEBA alībawīla a banhū ba Yuda na a bikaji ba Yelūsalemu; alīhaya, “Ng'ūgatūlagūja a magengeli ū mu magūndūle ging'we; nī mbīyū yaya ū kūjibība mu ming'hwa.

⁴Bing'we banhū ba Yuda na bikaji ba Yelusalemu, iyeejagi[7] ū kūlī SEEBA, jeejagi[8] ī ng'holò jing'we; ūlū ītī chene ū būpelanu wane būkūbaka kūlwa nguno ya būbi wa shītwa shing'we. Būkūmunogoteja gītī moto, na atīho wa kūgūjimya.”

⁵Hamukagi ū mu sī ya Yuda, tūlagi kaluulu ī Yelusalemu; hayagi gīkī, “Fuulagi nhaaninga hose pyī ū mu sī!” Hamukagi n'ilaka lya higūlya; hayagi gīkī, “Ibilingagi hamò! Tūpeelelagi kū mizengo īpīndīlīgije ndugu!

⁶Nunjagi lūbembeela mujile Sayuni, peelagi ng'wipīje, yaya ū kwigedya gedya; nalenha mayanga kūfuma sukuma, būkenaagūji būtaale.”

⁷Nguno ī shimba yapulukile ng'wisaka lyayo, nkenaagūji wa mahanga alī mu nzīla; wabūūkile ūko akikalaga, aliza kwīkenaagūla ī sī yako; Ī mizengo yako īkūbiza misaka ītī na bikaji mo.

⁸Kūlwa yenīyī itungagi shizwalo sha magūnīla, līlagi mutūle ng'hūngū; nguno ū būpelanu bo ng'wa SEEBA būkalī no, hama būtaalī ū kūgalūka būtwīngīle.

⁹Ū SEEBA alīhaya gīkī, “Ū mu lūshikū lwenūlo, ū ntemi na a bataale ba būsugi bakūcha idedebaja. A bagabīji bakūkumya no, na a bahangi bakūkaamaala.”

¹⁰Hūna nūhaya, “Ee Seeba MULUNGU, ka wabalembile lūūlū a banhū benaba nī Yelusalemu ū kūbawīla gīkī, ‘Mukwikala mhola dūhū,’ alīyo tūlīsīnzwa bo līlūshū.”

¹¹Ū ng'wikanza lyenīlo a banhū aba nī Yelusalemu bakūwīlwa, “Nyaga nsebu gwa kūfuma kū matogolo ga magūlya makalamuku gūkūbahuyembela a banhū bane, kwike gūtī gwa kūheheeja shikolo nūūlū kwīnja meela;

¹²ū nyaga ūyo nalīgūtūma gūlī na nguzu no ū kū yenīyo. Ī haha nalīgūfunya ū nsango gwabo.”

¹³Managi gīkī ū wei akwiza gītī malunde, a magogoteni gakwe gabange nshūlūlū gwa widose. Ī falasa jakwe mheeji no kūtinda kūlala kwa ng'hoonà. Ī haha twagwa mu makoye! Twashila!

¹⁴Ee Yelusalemu, yoojage ī ng'holò yako ū būsoso ūpīle. Ūkwikala na maganiko ga malofu gīko kūshisha nanalī?

¹⁵Ilaka līkūhamukaga kwīngīīla Dani, līlīkumūcha mihayo ya būkenaagūji kūfuma mu lūgūlū lwa Efulaimu.

¹⁶“Gawīlagi a mahanga ī yenīyī, Īkumūchagi ū mu Yelusalemu; hayagi gīkī, ‘Ibità lya banishi[9] līliza kūfuma sī ya kūle, līkwīlīgījaga ng'wano ī mizengo ya Yuda.

¹⁷Balīyīgobanīla gītī balang'hani ba ngūnda, kūlwa nguno alemile ū kūniigwa;’” alīhaya SEEBA.

¹⁸“Ī nzīla jako nī shītwa shako h'īsho shakwenhelegije īkūgwīle ī yenīyī. Ū gwenūyū nsango gwako; nsango ndito no, gūlīkwingīla kūshisha mu gatī ya ng'holò yako.”

¹⁹Ee, mayanga gane, mayanga gane! Nalīkoya na kūsaatwa kūtaale. Yee, ī ng'holò yane īlīsaatwa no! Ū mu gatī īlītininhīla ī ng'holò, nalīlemeelwa ū kūhuumūla. Naliigwa ilaka lya nhaaninga ya būlūgū, naliigwa ng'wano gwa būlūgū.

²⁰Būkenaagūji būkwilondeelaga lwīsī lwīsī, ī haha ū mu sī būlī kwene misaka yike; a maheema gane gaakenaagūlwa ng'wikanza iguhī, ū būpīlīlo bone ng'wikanza lya kūgabbya ngohe.

²¹Nakwikala nalībona lūbembeela lwa būlūgū na kwigwa ilaka lya nhaaninga kūshisha nanalī?

²²“A banhū bane babbūūlī no, batanimanile ū nene. Balī baana bachilū, hangī batī na witegeleja. Bakoolī mu kwīta ya malofu, Ī yawiza batamanile ū kwīyīta.”

²³Aho nīlola ī sī nībona īlī dalali hangī ītī na wiza bose bose;[10] nūlola nū kwigūlū, lyalī lītīko ī lisana.

²⁴Nūjilola nī ngūlū ī ndo nī nhaale, nūjibona jikūtinginaga na kūyengeela kūnū na kūnū.

²⁵Aho nilalangīja kūbalola a banhū, natabonile nūūlū ūmò; nī noni jalī ndūhū ū ng'wigūlya, pye jalī jalala jīnga.

²⁶Aho naalola kūnū na kūnū nūbona Ī sī īyo yalī ya shilīwa shingī lyabizaga itogolo ikalamuku; Ī mizengo yamo nayo ū kū būtongi bo ng'wa SEEBA yabizaga misaka yike, kūlwa nguno ya būpelanu bokwe.

²⁷Nguno ū SEEBA alīhaya gīkī, “Pyī ī sī īkūkenaagūka, kwike natīmala īshile pye gete.

²⁸Hūna lūūlū ī sī īkūlīla ng'hūngū, nū kwigūlya ī ligūlū līkūhīndīhala nguno nahayaga nene; na natūgalūcha, h'ūmo naalamulīlaga, natīko kūshoka numa.”

²⁹Būlī kwene balīyīpeela ī mizengo kūlwa malaka ga bashilikale ba falasa na balasi. Balīpeelela kū masaka, bangī balīkalinha kū mashiganga; pyī ī mizengo īlīlekwa būyīkī, ndūhū wa kwikala mo.

³⁰Ū bebe ūlī nsaka dūhū, ūlīīta mhayo kī ū gwenūyo? Īlīho fiilū kī ū mu kūzwalīla shizwalo sha būlenji,[11] na kwigaliila na mawe ga mpango ntaale na zahabu? Īlīho solobo kī ū kwichaaja na wanja kū miso? Ūlījimīīja makanza gako dūhū ū kwigaliila; a batogwa bako baakūdalahile, Ī haha balīkooba bakwīngīje ū būpanga wako.

³¹Nguno nigwiile ilaka lya kūlīla, gītī nkima alīlung'wa būsūngū, kalīlīle gītī ka nkīma akūpīīmīlaga, alī ng'wikanza lya kūbyala ng'wana wakwe wa kwandya. Ū nshīke ū Sayuni akūheezelaga wapelagwa myūyī. Akūgoloolaga makono gakwe alīhaya, “Mayū nene! Naacha; naachīla mu makono ga babūlagi.”