Read Sukuma Bible 2015 – Bibilia Ilagano Lya Kale 2015 Yelemia 40 Bible Online

Yelemia 40 - Sukuma Bible 2015 – Bibilia Ilagano Lya Kale 2015 bible

Yelemia 40

¹Mhayo gūkang'wizīīla ū Yelemia kūfuma kūlī SEEBA; yalī hanuma ya ng'wa Nebuzaladani ū ntaale wa balang'hani ba h'ikūlū kūnsanga ū Yelemia alī Lama, ūng'winha wiyaabī. Akampandīkīla henaho atungilwe nhendele hamò na a batungwa a bangī, a ba kūfuma Yelusalemu na Yuda; pye a bose baalī bahelelilwe lūgendo lwa kūtwalwa Babuloni bakikale ko mu būding'wa.

²Ū ntaale wa balang'hani ba ntemi aho wampandīka ū Yelemia, ūng'wīla, “Ū SEEBA Mulungu wing'we walī alīhelelile a mayanga genaya ī lipandī lyenīlī.

³Ī haha ū SEEBA washikīlījaga, wītaga gīt'ūmo walī wahayīla gīkī akwīta. Pyī ī yenīyī yajile gīko kūlwa nguno a bing'we ng'wang'wītīla shibi ū SEEBA; kūlwa kūlema kūng'wigwa.

⁴Alīyo ī lelo yenīyī nalīkūtungūla nakwīngīje ī nhendele ījo ūtungilwe mu makono gako. Tūjage bose ī Babuloni ūlū ūlībona īlībeelela, nakūjūkūlang'hana; alīyo ūlū ūtūtogagwa, ndūhū ū mhayo, lekaga ū kwiza. Ūlīyībona ī sī yīyī īlī kū būtongi wako, jaga hose hose ūko ūlatogwe kūja bebe ng'wenekele.”

⁵Ū Yelemia aho ataalī kūgalūka aje,[45] ū Nebuzaladani ongeja, “Ī gete shokaga ūje kūlī Gedalia, ng'wana Ahikamu ng'witūnja o ng'wa Shafani, ūyo ntemi wa Babuloni wansolile abize nsugi wayo ī mizengo ya mu Yuda. Jaga ko ūkikale nang'hwe ū mu banhū abo balīko, nūūlū ūje hose hose ūko ūlatogwe kūja.”

⁶Ū Yelemia ūja Misipa h'ūko walī ū Gedalia ng'wana Ahikamu, ūūkikala nang'hwe ū mu banhū abo baalī basaagīīla ū mu sī.

⁷A bataale ba mabità ga bashilikale na a banhū babo abo baalī bataalī kū matogolo bakigwa, gīkī ū ntemi wa Babuloni wantūūlile Gedalia ng'wana Ahikamu, kūbiza nsugi wa sī; ūnsola na kūbiza ntaale wabo pye a bagosha na a bakīma na a baana, abo baalī batatwalilwe Babuloni kū būding'wa; abo baalī bakuuneese ba bakuuneese ū mu sī.

⁸Na lūūlū a bataale benabo būbūūka kūja ī Misipa, ū kūlī Gedalia. Baalīmo, Ishimaeli ng'wana Nesania, na Yohanani na Yonasani bitūnja ba ng'wa Kalea; na Selaya ng'wana Tanhumeti, na bitūnja ba ng'wa Efai muna Netofa, na Yazania ng'witūnja wa muna Maaka; baalī hamò na banhū babo.

⁹Ū Gedalia ng'wana Ahikamu, ng'wizūkūlū Shafani akilahīla kū būtongi wabo hamò na a banhū babo, ūbawīla, “Yaya ū kogoha ū kūbatūmamīla a Bakalidayo, ikalagi dūhū ū mu sī yenīyī muntūmamīle ū ntemi wa Babuloni; īkūgololoka ī mihayo ying'we.

¹⁰Ū nene nakwikala ī Misipa, nayūhooya nabo a Bakalidayo ūlū biza ū mu sī yise; a bing'we bene ikalagi dūhū ū mu mizengo ying'we īyo ng'wīdimile, muje nago ū nīmo gwa kūbilinga ī divai nī shisuumo sha mu makanza ga chū, pye na a maguta; shose shenīshi ng'ūshibīka mu shiseme shing'we.”

¹¹Na a Bayudaya abo baalī Moabu, Amoni, Edomu nū ū mu sī ī jingī pyī ī jose, aho bigwa gīkī ū ntemi wa Babuloni walekeelile būshiigo wa banhū ū mu sī ya Yuda, ūnsola Gedalia ng'wana Ahikamu ng'wizūkūlū Shafani kūbiza nsugi wabo,

¹²pye bakashoka mu sī ya Yuda, kwīngīīla hose hose ū kū sī ījo baalī bapeelela, būja ī Misipa ū kūlī Gedalia. Nabo būyūbilinga ī divai nī shisuumo sha mu shikū ja chū, nīyo bakakwīja no.

¹³Hūna ū Yohanani ng'wana Kalea, na a bataale ba mabità ga bashilikale abo baalī kū matogolo būshika ī Misipa ū kūlī Gedalia.

¹⁴Biza būng'wīla, “Bebe ūtamanile gīkī ū ntemi wa Baamoni ū Baalisi, wantūmile Ishimaeli, ū ng'witūnja o ng'wa Netania kwiza kūkūbūlaga?” Alīyo ū Gedalia ng'wana Ahikamu atagūzunije ū mhayo gwabo.

¹⁵Kwike ū Yohanani ng'wana Kalea aho alī Misipa, akang'wīla mhayo ū Gedalia balī babīlī dūhū; ūhaya, “Nizunīlījage naje nakamūlage ū Ishimaeli ū ng'wana Netania; atīho munhū ose ose wa kūgūdeeba ū mhayo gwenūyū. Nibūlī akūbūlage, abenheleje kūsalang'hana pye a Bayudaya abo bizile aha kūkwibilingīla, na a banhū abo basaagīīlile mu Yuda bayagaale?

¹⁶Alīyo ū Gedalia ng'wana Ahikamu ūng'wīla ū Yohanani ng'wana Kalea, ‘Yaya lekaga ū kwīta mhayo gūlī gīko, īyo ūlīng'haya ū Ishimaeli ītī ya ng'hana.’”