Read Sukuma Bible 2015 – Bibilia Ilagano Lya Kale 2015 Yelemia 41 Bible Online

Yelemia 41 - Sukuma Bible 2015 – Bibilia Ilagano Lya Kale 2015 bible

Yelemia 41

¹Ū Ishimaeli ng'wana Netania, ū ng'wizūkūlū Elishama walī wa būbbyīle bo ng'wikūlū, na ūmò wa bana ng'oma ba ntemi. Mu ng'weji gwa mpungatī aho alī Misipa, akaja ū kūlī Gedalia hamò na banhū ikūmi; lyūshika ikanza bigasha a bose kūlya shilīwa.

²Kwimanīla ū Ishimaeli ng'wana Netania wabūūka hamò na a banhū ikūmi abo walī nabo, būnchimagūla shū ū Gedalia ng'wana Ahikamu, ū ng'wizūkūlū Shafani; būmūlaga ū munhū ūyo walī watūūlwa na ntemi wa Babuloni kūbiza nsugi wa sī yenīyo.

³Nīyo ū Ishimaeli ūbabūlaga na a Bayudaya pye a bose abo baalī hamò na Gedalia ī Misipa, na a bashilikale ba Bakalidayo abo baalīho hoi.

⁴Ha ntondo ya lūshikū lwa kūbūlagwa kwa ng'wa Gedalia, ū mhayo gwenūyo gūtaalī kūkumūka kū banhū,

⁵bagosha makūmi anaane bakiza ī Misipa balīfuma Shekemu, Shilo na Samalia. Bizaga kū numba ya ng'wa SEEBA kwenha shakwinha sha būsu, na būbbani kūlwa shitambò sha kūzuukījiwa. Baalī baamoga ī ndezu jabo, nī shizwalo shabo būtandūla, nī mibīlī yabo bisananga.

⁶Ū Ishimaeli ng'wana Netania akafuma ū mu nzengo gwa Misipa, ūja kūbasūng'wana bataalī ka kūle, kūnū akūlīlaga. Aho wamanhya nabo ūbawīla, “Tūjagi ū kū ng'wa Gedalia ng'wana Ahikamu.”

⁷Aho bashika ū mu nzengo, ū Ishimaeli ng'wana Netania na a biye abo walī nabo kūfuma kale būbabūlaga a banhū benabo; būbaponya ng'wichongo lya lwinzī.

⁸Alīyo banhū ikūmi ū mu benabo bakang'wīla ū Ishimaeli gīkī, “Lekaga ū kūtūbūlaga! Tūlī na ngano na būsīga, hamò na maguta na būūkī; shilī kū matogolo shibisile.” Ng'hana a benabo atababūlagile, ūbabūlaga a bichaabo dūhū.

⁹Ī lichongo ūmo akīponeja ī mibimba ya banhū abo akababūbalaga, nū go ng'wa Gedalia, lyalī lyasīmvwa na ntemi Asa, ng'wikanza lya būlūgū na Baasha ntemi wa Isilaeli; ū Ishimaeli ng'witūnja o ng'wa Netania ūlyokaja mibimba ya banhū.

¹⁰Ū mu banhū abo baalī basaagīīla baalīmo bashīke ba ntemi, hūna na a bangī pye a bose; banhū abo Nebuzaladani ū ntaale wa balang'hani ba ntemi, walī wantūūla Gedalia ng'wana Ahikamu kūbiza nang'hanii wabo. Ū Ishimaelia ng'wana Netania ūbadima pye a banhū benabo, abo baalī basagīīla ū mu nzengo gwa Misipa; būbiza ha sīlīlī yakwe, ūbīīta kūbiza bading'wa bakwe, ūbahadīkīja ūkīla nabo kūja mu sī ya Amoni.

¹¹Alīyo ū Yohanani ng'wana Kalea, na a bataale ba mabità ga bashilikale abo baalī hamò nang'hwe, aho bawigwa pyī ū būbi bo mihayo īyo walī wīyīta ū Ishimaeli ng'wana Netania,

¹²būbabilinga pye a banhū babo, būnkūūbīja ū Ishimaeli ū ng'wana Netania, kūjamba būlūgū nang'hwe. Būmpandīkīla hihī n'ilambo itaale lyalī mu sī ya Gibeoni.

¹³Pye a banhū abo walī wabadima ū Ishimaeli bakayega no aho bamona ū Yohanani ng'wana Kalea, na a bataale ba mabità ga bashilikale abo walī nabo.

¹⁴A banhū benabo walī wabadimīla Misipa ū Ishimaeli ūbīīta kūbiza bading'wa bakwe, bakagalūka būshoka balīnondeela Yohanani ng'wana Kalea.

¹⁵Kwike ū Ishimaeli ng'wana Netania akapūlūgūka na banhū bakwe banaane; būnshiga ū Yohanani būpeelela kū sī ya Baamoni.

¹⁶Hūna ū Yohanani ng'wana Kalea, na a bataale ba mabità ga bashilikale bose pye abo baalī hamò nang'hwe, būbajana pye a banhū abo baalī basaagīīla Misipa, abo akabīnja mu makono ga ng'wa Ishimaeli ng'wana Netania, ūyo akamūlaga Gedalia ng'wana Ahikamu, baalīmo bashilikale, bakīma, baana, na batūmami ba ng'wikūlū, abo walī wiza nabo kūfuma Gibeoni.

¹⁷Būduta bajile Misili, būūkatūūla ng'hambī Geluti Kimuhamu hihī na Betelehemu.

¹⁸Babapeelaga Bakalidayo, bakabogoha kūlwa nguno ū Ishimaeli ng'wana Netania akamūlaga ū Gedalia ng'wana Ahikamu, ūyo ntemi wa Babuloni walī wantūūla kūbiza nsungi wa sī yenīyo.