Read Sukuma Bible 2015 – Bibilia Ilagano Lya Kale 2015 Yelemia 42 Bible Online

Yelemia 42 - Sukuma Bible 2015 – Bibilia Ilagano Lya Kale 2015 bible

Yelemia 42

¹A bataale ba mabità ga bashilikale nū Yohanani ū ng'wana Kalea, na Yezania ng'wana Hoshaya, na a banhū a bangī pye bado na bataale, būng'wegeela

²ū ng'hangi Yelemia būng'wīla, “Tūdegelekage baba ū kūlīla kwise, ūnombe ū SEEBA Mulungu wako, ūlīlombele ī libità pyī īlo lyashiigīīlile lyenīlī. Nguno nū bebe ūlībona na miso gako, gīkī nūūlū īkī twalī bingī ī kale, alīyo ī haha twasaagile bagehu no.

³Nombage ū SEEBA Mulungu wako atoolekeje ī lipandī ī lya kūja; nī yīyo ītwigelile kwīyīta.”

⁴Ū ng'hangi Yelemia ūbashokeja, “Nang'wigwaga ū nene nakūmulombela ū kūlī SEEBA Mulungu wing'we gīt'ūmo mulīlombela, na būlī mhayo ūyo ūgūhaya ū SEEBA nakūmuwīla; natūmubisa mhayo gose gose.”

⁵Nabo būng'wīla ū Yelemia, “Ūlū tūleka ū kwīta ūmo īlī pyī īyo SEEBA Mulungu wako alakūtūme kwiza kūtūwīla, ū SEEBA hū ng'wene ū nkaanīji wise wa ng'hana na nsanyiwa.

⁶A bise nūūlū gūtūbeelele, nūūlū gūtūbipīle ū mhayo go ng'wa SEEBA Mulungu wise ūyo tūlīkūtūma kūja kūlī we, nahene tūkūng'wigwa dūhū; ū mu gīko ī mihayo yise īkūgololoka; nguno a bise shiigelile tūng'wigwe ū SEEBA Mulungu wise.”

⁷Aho jabīta shikū ikūmi ū mhayo go ng'wa SEEBA gwiza ū kūlī Yelemia.

⁸Hūna ūng'witana ū Yohanani ng'wana Kalea, na a bataale ba mabità ga bashilikale abo baalī hamò nang'hwe; na a banhū pye a bose, bado na bataale.

⁹Ūbawīla, “Ū SEEBA, ū Mulungu wa Isilaeli, ūyo ng'walī ng'wanitūmile kūntwalīla kūlomba kwing'we, alīhaya gīkī,

¹⁰‘Ūlū ng'wikala ū mu sī yenīyī, ū nene nakūmuzenga, natūmukambagūla; nakūmuhamba, natūmudubbūla; nguno naapīnīhalile no kūlwa mayanga ayo naamugwisīgije.

¹¹Mutang'ogohage ū ntemi wa Babuloni, ūyo alīng'ogohya ī haha. Lekagi ū kūng'ogoha.’ Alīhaya SEEBA. ‘Nguno nalī hamò ning'we, nakūmupīja nang'wīnje ū mu nkono gwakwe.

¹²Nakūmuchīla shigongo, nū wei nakūng'wīta amuchīle shigongo a bing'we, amushoshe hangī ū mu sī ying'we.’”

¹³Alīyo ūlū ng'ūhaya gīkī, “A bise tūtikalaga ū mu sī īyī, hūna muleke ū kūng'wigwa ū SEEBA Mulungu win'gwe,

¹⁴nūūlū ng'ūhaya, ‘Yaya shi ī gīko, a bise tūkūja tūkikale Misili, ūko tūtūbona būlūgū nūūlū kwigwa ilaka lya nhaaninga ja būlūgū, nūūlū tūtūūkoyiwa nzala kūlwa kūgayiwa shilīwa,’

¹⁵Bing'we būshiigo wa banhū ba Yuda, ūlū mulīīta gīko gwigwagi lūūlū ū mhayo go ng'wa SEEBA; ū SEEBA wa mabità, ū Mulungu wa Isilaeli alīhaya gīkī, ‘Ūlū mubize ng'hana mumalīīlile kūja Misili kūjiikala ko,

¹⁶managi gīkī ī līlūshū īlo mulīīlīpeela līkūmupandīka koi, nī nzala īyo yamupambūlile ū kūnū īkūmulondeja ko ī Misili; mukūja mukashile kūcha koi.

¹⁷Nīyo pye abo bagaabīlile kūja Misili, kūjiikala kwenūko bakūshila kūcha kūlwa līlūshū, nzala na mahūūya; atilonga nūūlū ūmò ū wa kūpīla nūūlū kūbūpūlūgūka ū būkenaagūji ūbo nakūbenhela.’

¹⁸Ū SEEBA wa mabità, ū Mulungu wa Isilaeli alīhaya gīkī, ‘Ūmo būpelanu na būkalī bone būkabidīkīla abo bikalaga mu Yelusalemu, na a bing'we ūlū mulaaje Misili būkūng'wihoolekela gīko ū būpelanu wane. Mukūbiza shikolo sh'izumo, igekemaja, banhū ba kūyilembekejiwa mihayo, na kwibengelejiwa; ī lipandī lyenīlī mutalalībona hangī.’

¹⁹“Ee bing'we būshiigo wa Yuda, ū SEEBA wamuwīlile gīkī, ‘Mutizūja ī Misili.’ Alilūūlū deebelagi, ī lelo yenīyī nalīmuhūgūla ū nene;

²⁰gīkī, ng'walī ng'wahūbile ū kūnitūma ū kūlī SEEBA Mulungu wing'we, mulīniwīla, ‘Tūlombelage ū kūlī SEEBA Mulungu wise; ūlatūwīle pyī īyo alayīhaye, nise tūkwīyīta.’

²¹Ī lelo yenīyī namuwīla, alīyo mutūng'wigwaga ū SEEBA Mulungu wing'we, ū mu yose īyo wanilagīlile kūmumanīkīja.

²²Hūna lūūlū, ī haha managi gīkī mukūmalwa līlūshū na nzala, na mahūūya, ū kwipandī īlo mulītogwa kūja kwikala.”