Read Sukuma Bible 2015 – Bibilia Ilagano Lya Kale 2015 Yelemia 43 Bible Online

Yelemia 43 - Sukuma Bible 2015 – Bibilia Ilagano Lya Kale 2015 bible

Yelemia 43

¹Ū Yelemia aho wamala kūbawīla a banhū pyī ī mihayo ya ng'wa SEEBA Mulungu wabo, pye pye pye gete, īyo SEEBA walī wantūma kūbawīla,

²ū Azalia ng'wana Hoshaya, nū Yohanani ng'wa Kalea, na a banhū a bangī a bikumīlīja, būng'wīla ū Yelemia gīkī, “Ū bebe ūlītūlemba, ū SEEBA Mulungu wise atakūtūmile kwiza kūtūwīla gīkī, ‘Yaya a bing'we ū kūja ī Misili kwikala kwenūko.’

³Ū Baluki ng'wana Nelia hū ng'wene akūkūsamīlījaga, gīkī ūtūtūūle mu makono ga Bakalidayo, batūmale kūtūbūlaga nūūlū batūsaamīje Babuloni kū būding'wa.”

⁴Hūna ū Yohanani ng'wana Kalea na a bataale ba mabità ga bashilikale pye a bose, na a banhū a bangī pye, būbiza baalema ū kūshiigwa ī shilagīlo sha ng'wa SEEBA ū mu mhayo gwa kwikala mu sī ya Yuda dūhū.

⁵A ha ng'wanya gwaho ū Yohanani ng'wana Kalea, na a bataale ba mabità ga bashilikale pye a bose, būbajaana pye a banhū ba Yuda abo baalī bashiigīīla, abo bakashoka kūfuma kū mahanga gose ūko baalī bapeelela, gīkī bize kwikala mu sī ya Yuda.

⁶Būbajaana na a banhū abo Nebuzaladani ū ntaalea wa balang'hani ba ntemi, walī wabaleka bikale na Gedalia ng'wana Ahikamu, ū ng'wizūkūlū Shafani. Baalī bagosha na bakīma na baana, na a bashīke ba ntemi. Nū ng'hangi Yelemia bakanjaana, pyī nū Baluki ū ng'wana Nelia.

⁷Bakaja Misili kūlwa kūngomela ū SEEBA, būūkashikīla ipandī lya Tahapanesi, bikala kwenūko.

⁸Ū Yelemia aho alī Tahapanesi gūkang'wizīīla ū mhayo go ng'wa SEEBA:

⁹“Solaga mawe mataale ūje nago a Bayudaya balībona, ūkagasīmbīle ūgafukīīle hasī, h'ibīndo lya madafaali, a ha wingīlīlo bo ng'wikūlū lya ng'wa Falao īlo līlī Tahapanesi.

¹⁰Hūna ūbawīle, ‘Ū SEEBA wa mabità, ū Mulungu wa Isilaeli, alīhaya gīkī, Ū ntūmami wane ū Nebukadineza ntemi wa Babuloni nakūnagīlīja ize; ī lisumbī lyakwe lya būtemi nakūntūūlīla a ha mawe ayo naagafukīīla aha; ī liheema lyakwe lya būtemi akūlītūūla a higūlya yago.

¹¹Akwiza ayīdumīle ī Misili, abenhele icha abo bahelelilwe icha, būding'wa abo bahelelilwe kūja mu būding'wa, na kūchīla mu būlūgū abo bahelelilwe kūchīla mu būlūgū.

¹²Ī hekalu ja bamulungu ba Misili akūjipemba moto, ī hekalu jabo akūjikūbīka moto, a bamulungu babo abajane mu būding'wa. Ūmo ndīīmi akikonzeelaga ng'wenda gwakwe, nū wei akwīyikonzeela ī Misili ha mīlī gwakwe, īnge nayo atī na ng'hami.

¹³A mawe ga kwilamīlīgīja ga Heliopoli ya Misili akūgatobagūla, ī hekalu ja bamulungu ba Misili akūjikūbīka moto.’”