Read Sukuma Bible 2015 – Bibilia Ilagano Lya Kale 2015 Yelemia 45 Bible Online

Yelemia 45 - Sukuma Bible 2015 – Bibilia Ilagano Lya Kale 2015 bible

Yelemia 45

¹Mu ng'waka gwa kanè gwa būsugi bo ng'wa Yehoyakimu ng'witūnja o ng'wa Yosia ntemi wa Yuda, ū ng'hangi Yelemia wahayaga mihayo, Baluki ng'wana Nelia wīyandīka mu shitabo; hanuma ya henaho ū Yelemia ūng'wīla ū Baluki kwīyandīka ī mihayo īyī,

²“Ū SEEBA, ū Mulungu wa Isilaeli alīkūwīla ū bebe Baluki gīkī,

³Ū bebe ūkūdaayaga ūhaya gīkī, ‘Yee Naaluha būlī! Ū SEEBA akūmanagūnongeja būpīna a higūlya ya mayanga gane; nose naaseedeekile kūlwa kwikala nūpīīmīla, ndūhū na wifuulīlo.’”

⁴Ū SEEBA alīhaya, “Ng'wīlage gīkī, ‘Ū SEEBA alīhaya, Pye a hose ū mu sī nakūshigwisha īsho naashizenga, nī shisho nashihamba nakūshidubbūla.

⁵Ū bebe mmho ūtaalī ūkwikoobelaga mihayo mitaale dūhū? Oyaga ū kwīkooba ī yenīyo. Nguno nakwenha mayanga kūlwa banhū bose pye, alīhaya SEEBA; alīyo ū bebe nakūkūlang'hana būlī kwene ūko ūkūja, būpīle ū bapanga wako.’”