Read Sukuma Bible 2015 – Bibilia Ilagano Lya Kale 2015 Yelemia 47 Bible Online

Yelemia 47 - Sukuma Bible 2015 – Bibilia Ilagano Lya Kale 2015 bible

Yelemia 47

¹Ū mhayo ūyū gūkafuma kūlī SEEBA gwiza kūlī ng'hangi Yelemia kūlwa Bafilisiti, aho ataalī ū Falao kūgūdumīla ū nzengo gwa Gaza.

²Ū Seeba alīhaya gīkī, “Ihūūma lya minzī līliza kūfuma sukuma, gakūbiza ng'hūūmo ntaale. Gakwīkundīkīja pyī ī sī nī shose īsho shilīmo, Ī mizengo na a bikaji baamo. A banhū bakūlīla; pye a bikaji ba mu sī bakūlīla ng'hūngū,

³kūlwa nguno ya mitindo ya chūga sha falasa jikūgidingagaga, kūlwa yoge ya magogoteni ga būlūgū, na shibagato sha madandali gago. A babyaji bakūlemeelwa nūūlū kūgunanha baana babo; nguno a makono gabo gakūnogoleka.”

⁴Ū lūshikū lwa kūyagajiwa Bafilisiti bose lwashikaga, ū lwa kūbamala pye abo balashiige kūlwa kūbagunanha bana Tulo na Sidoni. Ū SEEBA alī hihī kūbayagaja a Bafilisiti, ū būshiigo wa banhū ba Kuleti.[47]

⁵A banhū ba Gaza bakūhalūla mapala ī mitwe yabo kūlwa būpīna; ū nzengo gwa Ashikeloni gūkūbiza sele sele. Bing'we būshiigo wa banhū ba kū mbūga, mukwikala mukwisanangaga kūshisha nanalī?

⁶“Ī haha mukūlīlaga ng'ūhaya, ‘Ee līlūshū lya ng'wa SEEBA, ūkwifuula nanalī? Shokaga mu shilalo shako, oyaga ūlembeele.’

⁷Līkūdūla kinehe ū kūlembeela alīyo ū SEEBA walinhile nīmo, ūlīlagīla kwīdumīla ī Ashikeloni nī sī ja kū mbalama ya nyanza?”