Read Sukuma Bible 2015 – Bibilia Ilagano Lya Kale 2015 Yelemia 48 Bible Online

Yelemia 48 - Sukuma Bible 2015 – Bibilia Ilagano Lya Kale 2015 bible

Yelemia 48

¹Ī mihayo īyī īlī kūlwa nguno ya Moabu: Ū SEEBA wa mabità, ū Mulungu wa Isilaeli, alīhaya gīkī, “Ī Nebo īlī mu kwihīga nguno Īkūkenaagūka. Ī Kiliataimu īkūding'wa īgooke. Nī numba ya kūpīlīla īkūkambagūlwa īpondwe soni.

²Ī Moabu ītikala īkūkumīlījiagwa; bana Heshiboni bīsīīgile kwīgwisha ī sī yenīyo; bakwiwīlaga gīkī, ‘Bing'we tūmpyagūlagi ū munihanga ng'wenūyo ashile gete!’ Ee, bebe nzengo gwa Madimeni ūkūhuumūjiwa; līlūshū līkūkūkūūbīlīja.

³Alidegelekagi ī Holonaimu, yazulung'hanije ko ng'hūngū, kūlīla kūlwa kūzwangana kūtaale na būkenaagūji.

⁴Ī Moabu yakenaagūlilwe; Ī ng'hūngū yamo īligwiwa kūshisha Zoali.

⁵Bakūlinha ngūlya bajile bashike Lūhītī bakūtūlaga ng'hūngū. Ū kū ntulumenho gwa Holonaimu yigwiwe ng'hūngū mbi no kūlwa būkenaagūji.”

⁶Bing'we, peelagi! Ipījagi ū būpanga wing'we, mubize gītī mpumbula ndoto ng'witogolo ikalamuku.

⁷A bing'we īkī musanije milīmo ying'we na būsabi wing'we mukūsolwa mutwalwe mu būding'wa; nū Kemoshi akūsaamiwa, pye na a bagabīji bakwe, būyaga na a batūmami bakwe.

⁸Nyagaja akwīdumīla pyī ī mizengo, gūtūpūlūgūka nzengo nūūlū gūmò. A malago gakūbipiwa no, nī mbūga jikūyugūūlwa, nguno h'ūmo wahayīlile ū SEEBA.

⁹Īpumunhīlagi mamunhu ī Moabu, nguno lyashika ī likanza lya kūkenaagūlwa kwayo; Ī mizengo yamo īkūbiza dalali, ndūhū wa kwikala mo.

¹⁰“Azumilwe ū wa kūtūmama nīmo go ng'wa SEEBA mu būtūdīlīla. Azumilwe ū wa kūleka kūtūmamīla līlūshū lyakwe kwita mininga!

¹¹Ū Moabu alī sele sele kūfuma shikū ja ha būdinha bokwe, alembeelile gītī divai īlekilwe na ndigo digo[48] gwayo, īyo ītaalī kūsaamiwa kūfuma shiseme īshi kūja mu shingī. Ū Moabu ataalī kūja mu būding'wa; ū būsandūku wakwe būtaalī h'ū waho na kale, nū ng'waso gwakwe gūtaalī ū kūgalūka.”

¹²Alīyo ū SEEBA alīhaya gīkī, “Jikūshika shikū ja kūntūmīla basaamya, bakūnsaamya gītī divai kūfuma mu shiseme shimò kūja mu shingī; akwidīka ashile gete ū mu shiseme shakwe shibize dalali, hanuma bashibelagūle.

¹³Hūna ū Moabu akūgooka kūlwa ng'wa Kemoshi, ūmo īkagookela numba ya Isilaeli kūlwa kūsanya īyo yalī mu nzengo gwa Beseli.

¹⁴A bing'we mudūgije ginehe ū kūhaya gīkī, ‘Tūlī bashilikale, tūlī bagosha ba mbagashūūla mu būlūgū?’”

¹⁵Ū Ntemi, ūyo lina lyakwe alī SEEBA wa mabità, alīhaya gīkī, “Ū Moabu akūkenaagūlwa, nī mizengo yakwe īkūdumīlwa; a baana bakwe a basūmba bakondooku bakūtwalwa kwisīnzīlo.

¹⁶Ī likanza lya kūgwa kwa ng'wa Moabu lyashikaga; a mayanga ga kūmpīnīhaja gatūdīīla ū kūmpandīka.

¹⁷Nīlagi pye a bing'we abo mumpīndije; bose pye abo mulūmanile ū lūkumo lwakwe; hayagi gīkī, ‘Yee alīyo būlī, ū nang'ha gwa būdūla gwabīnzīka, gūtī na nīmo ī haha!’”

¹⁸Bing'we bikaji ba Diboni, Īngagi a h'ikūjo ling'we; ikagi ng'wifudīke hasī ng'witogolo ikalamuku; nguno ū nkenaagūji wa Moabu akūmusanga ize ajikambagūle ī ng'hambī jing'we ja kūpīlīla.

¹⁹Bing'we bana Aloeli, Īmīīlagi ng'hīga ng'hīga mu nzīla mulole; mūjagi ū ngosha ūyo alīpeela, nū nkīma ūyo wapūlūgūkaga; babūūjagi gīkī, “Yajaga ginehe ko?”

²⁰Ī Moabu yagookile kībi kībi, nguno yakenaagūkile no, līlagi mutūle ng'hūngū! Bakumūkījagi a ba kū mbalama ya Alinoni, gīkī ī Moabu yabipiwe no.

²¹Ī sī ja mbūga jagwīlilwe nsango; pyī ī jose kwandīja: Holoni, Yahaza, Mefasi,

²²Diboni, Nebo, Beti-dibulasaimu;

²³Kiliasaimu, Beti-gamuli nī Beti-meoni,

²⁴Kelioti na Bozila; pye gete ī mizengo ya Moabu, ībize hihī nūūlū īlī kūle na kinehe.

²⁵Ū SEEBA alīhaya gīkī, “Ū Moabu wabīnzagūjiwe ī lipembe[49] lyakwe, nū nkono gwakwe gwabīnzilwe.

²⁶Ng'wishagi shikoji aleewe, nguno andalahile no ū SEEBA; nekagi agala gale mu malūki gakwe, abize wa kwineenelegejiwa.

²⁷Ū Isilaeli walī atī shikolo sha kwineenelegejiwa ū kūlī bebe? Ūkashingishaga ntwe ūlū ūlīnyomba, wabīta kūnsangīla ng'wigele lya biibi adimilwe hamò nabo?

²⁸Fumagi ū mu mizengo ying'we bing'we bana Moabu, peelelagi mu mapilinga ga mawe, mukibise ng'wenūmo. Bizagi gītī mhunda, ūmo īkabeegejaga chanjo shayo mu ndugu y'ihalo.

²⁹Twawigwile ū wikumīlīja bokwe ū Moabu, ū wikūmīlīja bokwe ū būtaale nū būdooshi bokwe; ū wigīmba gīmbi nū wikūja bokwe, pyī nū wigūngūhya bo ng'holò yakwe.”

³⁰Ū SEEBA alīhaya gīkī, “Nabūmanile ū būdaki bokwe, alīyo nahene būtī na gwa kūpya; nū kwigīmba gīmba kwakwe kūtī na fiilū nūūlū hado.

³¹Hūna lūūlū nalīyīlīla ī Moabu, nalī na ng'hūngū kūlwa kwīlīla ī Moabu pyī ī yose. Nalībalīla a banhū ba Kili-heleseti.

³²Bing'we mizabibu ya Sibuma nalīmulīla gītī ng'hūngū ya Yazeeli, nalīgalīla a matambī ging'we ayo galandaalile kūshisha kū nyanza; ayo gashikile kū nyanza ya Yazeeli. Ū nyagaja wagikīīlile pye a matwajo ging'we ayo gapiile, nī shisuumo sha mizabibu ying'we.

³³Ū būyegi nū būzalabanu shashilile ū mu migūnda, shitīmo ū mu malaale ga Moabu. Ū gwa divai kwikala īkūhūūmaga mu makamīlo naagūlemile; atīho wa kūpandagīla mizabibu kūnū akūtūlaga kaluulu ka būyegi; Ī yogè ī yene īlīho, alīyo ītī yogè ya būyegi.

³⁴A malaka ga kūlīla kwabo gakwigwiagwa kūfuma Heshiboni kūshisha Eleale na Yahazi, kūfuma Zoali kūshisha Holonaimu na Egilasi-shelishiya. Nguno na a minzī ga mongo gwa Nimulimu gaakamile.”

³⁵Ū SEEBA alīhaya gīkī, “Nakūbamala ī Moabu pye abo bakatambīkīīlaga kū mapandī ga higūlya, na kūbazuukīja būbbani bamulungu babo.

³⁶H'ī chene ī ng'holò yane Īlīīlīla gītī mbiilūlū kūlwa kūbalīla bana Moabu; na a bana Kili-haleseti īlībalīla gītī mbiilūlū. Nguno pyī ī sabo ījo baalī bapandīka jajimīīlile.

³⁷Hama būlī ntwe gwahalūlilwe ipala, nī ndezu pyī ī jose jūmoogwa; a makono nago gookalile salago pa; Ī mikīmbīlī pyī ītungilwe shizwalo sha magūnīla.

³⁸Ū kwigūlya ya numba ja Moabu nū mu gwalugwa ja mu mizengo, shitīho shose shose ūlū ītī ng'hūngū dūhū; nguno ī Moabu nībelagūlile gītī shiseme shitī na ng'wenekīlī,” alīhaya SEEBA.

³⁹“Ī sī yenīyo yakenaagūkile no! Lolagi dūhū ūmo balīīlīlīla! Gūūyo mhayo gwa magooke, Ī Moabu yabinhīla ngongo a banishi! Yabiza shikolo sha kwineenelegejiwa, na sh'igekemaja kū bose abo bīpīndije.”

⁴⁰Ū SEEBA alīhaya gīkī, “Ng'hoonà īlīkwelemuka yambaga manana gayo kwīyikīīla ī Moabu.

⁴¹Ī Keliosi īkūding'wa, nī ng'hambī ja kūpīlīla jikūsolwa. Ū mu lūshikū lwenūlo ī ng'holò ja bagosha ba mbagashūūla ba Moabu jikūbiza gītī ng'holò ya nkīma alīlung'wa būsūngū.

⁴²Ī Moabu īkūkenaagūlwa kūlwa nguno ya kūndalaha ū SEEBA, lītūbiza ihanga hangī.

⁴³Banhū ba Moabu mulindīīlilwe lyogohya, na machongo na lūtu,” alīhaya SEEBA.

⁴⁴“Ūyo ūlīpūlūgūka ī lyogohya, akūjūgwīla ng'wichongo; ūyo ūlinha kūfuma ū ng'wichongo akūgwashiwa lūtu. Nguno ī Moabu nakwīyenhela ū ng'waka gwa nsango gwayo,” alīhaya SEEBA.

⁴⁵A babūngi balī Heshiboni, bakūkoobaga kūgunwa; kwike batī na gwa kwīta, nguno gwabakile moto ī Heshiboni, gūlīligima moto ī Sihoni; Ī mitwe ya bayombo ba Moabu īlīnogotela, būlī lūpanga lwa bikumīlīja.

⁴⁶Bebe Moabu wagwīlwa mayanga! A banhū ba ng'wa Kemoshi balīshila; a bitūnja bako balītwalwa mu būsaamiwa, a bashīke bako balītwalwa nding'wa.

⁴⁷“Alīyo ū kū shikū ja kū būtongi, Ī Moabu nakwīshokeja ī jayo,” alīhaya SEEBA. Ū wenūbū hū būkalīkījo wa nsango gwa Moabu.