Read Sukuma Bible 2015 – Bibilia Ilagano Lya Kale 2015 Yelemia 5 Bible Online

Yelemia 5 - Sukuma Bible 2015 – Bibilia Ilagano Lya Kale 2015 bible

Yelemia 5

¹Bīta bītagi pye hose hose ū mu mapanda ga Yelusalemu, jagi ng'ūlola būlī kwene, kūnū mukwideedeng'hanyaga; gīsīlījagi hose pyī ū mu magūlilū gaamo. Ūlū ng'ūpandīka munhū nūūlū ūmò ūyo akīītaga mihayo mu būdeeba na kūkooba ng'hana, nakūgūlekeja ū nzengo gwenūyo.

²Nguno nūūlū bakahaya gīkī, “Ūmo SEEBA alī mpanga, nahene numho balilahīla mu būlomolomo dūhū.”

³Ee SEEBA, tūhaya a miso gako gakīkoobaga ī ng'hana? A benaba wabīta ū kūbatūla, alīyo ndūhū ū kūshingimūka; nū gwa kūyūbabūlaga wagūbītīla, alīyo nahene balemile ū kūhang'wa. Ū būshū wabo būdimu no kūtinda iwe; balemile gete ū kūgalūka.

⁴Hūna nūyiganika nakwiwīlaga, “A benaba angū batī na gwabo, nīyo hangī babbūūlī ba babbūūlī; nguno batīmanile ī nzīla ya ng'wa SEEBA, Īyo ayīhayile ū Mulungu wabo.

⁵Ī gete nakūja ū kū batongeeji, nakalūngalūnge nabo; hamo a bene bīmanile ī nzīla ya ng'wa SEEBA, īyo ayīhayile ū Mulungu wabo.” Alīyo nahene na a boi bizunīlīja mu būsangī būmò būlībīnzagūla Ī likondejo, na a matungījo būgatīnagūla.

⁶Alilūūlū, shimba īkūfuma kū masaka yize kūbadumīla, mhūge ya kūfuma kū matogolo Īkwiza ībakenaagūle. Ū mu mizengo yabo sūbī Īkūbibandīīla, ose ose ūyo ūpuluka yūntandagūla; nguno ū būkenaagūji wabo wingī no, nū būgomi wabo būkīlanīgije.

⁷Nakūdūla kinehe ū kūkūlekeja? A baana bako baanileka ū nene, bakwilahīlaga mu lina lya bamulungu abo batī bamulungu. Naabinha pyī ī shiigunaanīlo, alīyo hū bongeja kūbiza bashihani, būyikala bisūmbyaga mabità mabità mu numba ja bamalahya.

⁸Batikīlile na ng'osha ja falasa jalya jigūta, jūyikala jikūkoyiagwa lwahahi lwa kūpanda; būlī ng'wene akikalaga ūlīlīīla nke o nzenganwa ng'wiye.

⁹A benaba naleke kūbinha nsango kūlwa mihayo yenīyī? Alīhaya SEEBA. Naleke kwimalīla shiilī kwihanga lya mbika īyī?

¹⁰Jagi ko mubīte hose hose ū mu migūnda yamo ya mizabibu, muje mukwīsengagūlaga; kwike mutizūmala pye pye pye gete. Na a matambī gakongoolagi, nguno a banhū benaba batī ba ng'wa SEEBA.

¹¹Ī numba ya Isilaeli nī numba ya Yuda jaanigomela kībi no, alīhaya SEEBA

¹²Ūlū bakūng'hayaga SEEBA bakilembagūlaga bakwiwīlaga, “Atī na mhayo gose gose gwa kwīta, būtīho būbi bo kūtūgwīla; tūtīko kūbona būlūgū, nī nzala ndūhū.

¹³A bahangi bene lūyaga dūhū, nū mhayo batī nago ū mu bo; īyo bakikalaga bīhayaga yenīyo ni ībagwīlage bo benekīlī.”

¹⁴Alilūūlū, ū SEEBA Mulungu wa Būdūla bose alīhaya gīkī, “A banhū benaba īkī bakūyombaga mihayo īlī gīko, ī mihayo īyo īkūfumaga mu nomo gwako nakwīyīta ībize moto, lelo a banhū benaba bakūbiza ng'hwi ja kūpemvwa ū mu moto gwenūyo.

¹⁵Ee numba ya Isilaeli, nakūkwenhela ihanga kūfuma sī ya kūle lize līkūdumīle.” Alīhaya SEEBA. Ihanga lya nguzu hama lya kale; banhū ba lūlīmi ūlo mutalūmanile a bīng'we, abo mutūdūla kwīyitegeleja īyo bakwīhayaga.

¹⁶Ū ntana gwa masonga gabo gūbange gītī shigila shasamile; bose pye bagosha ba mbagashūūla.

¹⁷Būlī shene īsho mukūgesaga bakūshibuluuja, nī shilīwa shing'we pyī ī shose, a bitūnja bakūbajana pye, na a bashīke bing'we kū lūkūbo. Būyaga na a madaale ging'we ga ng'holo na ng'ombe bakūgamala; Ī mizabibu ying'we nī mitini nayo bakwīlya pyī īshile. Ī mizengo ying'we īyo ng'wīsanije nguno īpīndīlīgije ndugu bakwīkenaagūla, bo shilanga sha būlūgū.

¹⁸Kwike nahene nūūlū ū mu shikū jenījo. Alīhaya SEEBA, natūmukenaagūla mushile pye gete.

¹⁹A banhū ūlū būbūūja gīkī, “Nibūlī ū SEEBA Mulungu wise atwītīle mihayo īlī gīko?” Ūkūbashokeja ūbawīle gīkī, “Ūmo ng'wanilekela ū nene ng'wūyūbatūmamīla bamulungu bageni ū mu sī ying'we ūmu, h'ūmo mukūjūbatūmamīla banhū ba mahanga kū sī ītī ying'we.”

²⁰Gūkumūchagi ū mhayo gwenūyū ū kū ba numba ya ng'wa Yakobo, gūhamukagi higūlya ū mu sī ya Yuda; hayagi gīkī,

²¹“Degelekagi bīng'we babbūūlī na bangaya masala, abo mulī na miso alīyo mutabonaga, na a matū mulī nago alīyo mutigwaga.

²²A bing'we mutadūgije gete ū kūnogoha ū nene?” Alīhaya SEEBA. Mutīko kūdetema ū kū būtongi bone? Ī nyanza nītūūlīla ng'walo go maseni, hū lūbīmbī lwayo lwa būja na būja, Ītīko kūlūkīlanhya. A mahuuli h'ūmo gabūūkīle, gatīko kūkīlanhya ho na hado yaya; nūūlū gahuyembe na kinehe, nahene gatīko ū kūbīta ho.

²³Kwike a banhū benaba nambu no ī ng'holò yabo, hangī bashitiigwa kībi no; baagalūkīla kūngī būng'ula bajile.

²⁴Ū mu ng'holò jabo batiwīlaga gīkī, “Tūng'ogohagi ū SEEBA Mulungu wise, ūyo akatūtūmīlaga mbula makanza gayo, ī ya mu mīsa nī ya kū būkalīkījo bo ng'waka; hū ng'wene atūlang'hanīgije makanza ga kūbilinga shilīwa.”

²⁵Ū būbi wing'we būkwīhangījaga Ī yenīyī, ī shibi shing'we shikūmulechaga Ī yawiza.

²⁶Ū mu banhū bane balīmo bamò babūbi no, bakibandīīlaga bichabo gītī abo bakategaga mitego ya kūgwasha banhū.

²⁷Ūmo ngono gūkookalīlaga noni jagwashiagwa, nī numba jabo jookalīlile būnyeecha gīko; h'ūmo bakasabīlaga na kongeja kūbiza na būdūla būtaale.

²⁸Hama nīyo bagīnu no, nī mibīlī yabo misheeku. Nū mu kwīta ī mibi batī na lūbīmbī, batabagunanhaga a bapīna ū mu mabanza, gīkī nabo bapandīke būtindi. Na a bahabī batabagunījaga ū kū mihayo īyo ībigeleelilwe.

²⁹A benaba naleke kūbinha nsango kūlwa mihayo yenīyī? Alīhaya SEEBA. Naleke kwimalīla shiilī kwihanga lya mbika īyī?

³⁰Ū mu sī īyī gwilongile mhayo mi no, hangī gwa kūkamaaja:

³¹A bahangi babizilūhanga ya būlomolomo, a bagabīji nabo bakūsugaga mu būdūla wabo benekīlī; hama a banhū bane nabo batogilwe Ībize gīko ī mihayo yenīyo. Alīyo lūūlū ū kū ng'halīlo mukwīta kinehe?