Read Sukuma Bible 2015 – Bibilia Ilagano Lya Kale 2015 Yelemia 51 Bible Online

Yelemia 51 - Sukuma Bible 2015 – Bibilia Ilagano Lya Kale 2015 bible

Yelemia 51

¹Ū SEEBA alīhaya, “Managi gīkī, nakūsamīlīja moyo gwa nkenaagūji, kūlwa kwilwisha nayo ī Babuloni na a banhū ba Lebu-Kamai.[52]

²Nakwītūmīla bahehi ī sī ya Babuloni; bakūfuma sī ja kūle, bize bīhehe nī shikolo pyī ī shose bīyīngīje īsaage dalali; ū mu lūshikū lwa mayanga gayo bakwīdumīla kūfuma mhandī jose.

³Ū nasi yaya ū kūneka ikale akūdadīlaga būta bokwe, yaya ū kūnola dūhū alīzwalīla shizwalo shakwe sha būlūgū. A basūmba baamo yaya ū kūbachīla shigongo nūūlū hado; bamalagi pye gete a bashilikale b'ibità lyakwe.

⁴Bakūgwa mu sī ya Babuloni bachīle ng'wenūmo; bakūlabūkīla mu mapanda gaamo.

⁵Kūlwa nguno ū Mulungu, ū SEEBA wa mabità atabaponije a banhū bakwe, a ba sī ya Isilaeli na Yuda; nūūlū īkī ī sī yabo yokala būhubi ū kū būtongiwa bokwe, ū Ng'wela wa Isilaeli.

⁶Peelagi ng'wīnge ī Babuloni! Fumagi moi ng'wipīje! Mutizūbūlajiwa shibi shaamo; Ī likanza īlī lya shiilī ya ng'wa SEEBA, akwīyinha ī Babuloni īsho yigeleelilwe kūpandīka.

⁷Ī Babuloni yalī shikombe sha zahabu mu nkono go ng'wa SEEBA, pyī ī sī jashing'wa jūleewa. A mahanga gīng'wa ī divai yenīyo, h'ī chene ī haha galī na lūsalo.

⁸Ī Babuloni īkwisanganījiwa, Īkūgwa ībīnzagūke. Īlīlagi ng'hūngū! Īkoobelagi būgota bo kwīyīngīja ū kūsaatwa kwayo, hamo īdūgije kūpīla.

⁹Ī Babuloni nitwīlagūlile, kwike dūhū ītī na būlagūlīle; twīlekagi tūje, būlī ng'wene aje kū sī yakwe. Nguno ū nsango gwayo ntaaleno, gūlī kwigūlya no kū malunde.

¹⁰Ū SEEBA wīyoolekije hape Ī ng'hana yise, tūjagi tūkagūkumūche ū mu Sayuni ūyo wagwītile ū SEEBA ū Mulungu wise.”

¹¹Ganoolagi a masonga, mujibūūche nī mūda! Ū SEEBA wabasamīlīgije a batemi ba Bameedi, nguno atogilwe kwīkenaagūla ī Babuloni. Ū SEEBA akūmala shiilī, shiilī kūlwa nguno ya hekalu yakwe.

¹²Nunjagi lūbembeela lwa būlūgū mukajidumīle ī ndugu ja Babuloni. Gūguzuhyagi ū nīmo gwa būlang'hani, Tūūlagi balindi; solanhyagi ba kūgwibandīīla ū nzengo! Nguno ū SEEBA alīgūshikīlīja ūyo agūhelile kūlwa bikaji ba Babuloni.

¹³Ū bebe ūyo wikalo wako būlī kū ng'hilimvwa ya minzī mingī, hangī ūlī nsabi wa shikolo, Ī ng'halīlo yako yashikaga, ī likanza lya kūsengwa kwako.

¹⁴Ū SEEBA wa mabità wilahīlile mu lina lyakwe wei ng'wenekīlī, gīkī, Nakūkwenhela banhū bingī, bize bakwibbūpe gītī njige; bakūkūpyena bayūkwanīīla balīhaya,

¹⁵“Hū ng'wene wīsūmba ī sī na būdūla bokwe, nī shiseeng'wa ī shose ūshibeeja na masala gakwe we; nī ligulu walyamba wei mu witegeleja bokwe.

¹⁶Ūlū ūpalalūka gakahilimaga[53] a minzī ū kwigūlū, a malunde akagenhaga kūfuma kū būgelelo bo sī. Ī mbula akīyenhaga na ndabi jayo, nū nyaga akagwitanaga kūfuma mu mabīkīlo gakwe.

¹⁷Pye a banhū batī na gwa kwīta, hangī batī na witegeleja; bulī nsuji wa zahabu akagookaga kūlwa shiikolile shakwe. Nguno ī shiikolile shakwe shitī na gwa ng'hana, ū mugatī yasho ndūhū myūyī.

¹⁸Shitī na ngofyoolo nūūlū hado, Ī shoi shilī shikolo sha kūdalahwa; ūlū lyūshika ī likanza lya nsango gwasho shikūkenaagūlwa.

¹⁹Ūyo alī Inong'ho lya ng'wa Yakobo atī gīt'ūmo galī a genayo, nguno ū wei hū Meeja wa shose; hū ng'wene wameeja nū Isilaeli, ūyo alī lūganda lwa wingīji bokwe; SEEBA wa mabità, h'īlina lyakwe.

²⁰Ū bebe ūlī mhūūjo yane mu būlūgū, shilanga shane sha būlūgū, īsho nakatobagūlīlaga mahanga, nakakūtūmamīlaga kūgwisha mabūtemi.

²¹Nakakūtūmīlaga kūbīnzangūla falasa na badamhīji bajo, hama nakakūtūmamīlaga na kūkenaagūla magogoteni ga būlūgū, hamò na bendeesha baago.

²²Nakakūtūmīlaga kūyagaja banhū ba būlī mbika, bagosha na bakīma, banamhala na baalūki; basūmba na banhya.

²³Nakakūtūmīlaga kūyagaja badīīmi na madaale gabo, balīmi na nzīkū jabo ja kūlīmīla. Nakakūtūmamīlaga kūyagaja basugi na batūmami ba selekali

²⁴Ī Babuloni na a bazengi baamo nakwīmalīla shiilī ūlībona, kūlwa būbi bose ūbo baawīta mu Sayuni,” alīhaya SEEBA.

²⁵“Bebe lūgūlū lūkenaagūji, ūyo ūlī nkenaagūji wa sī yose, ū nene nalī ng'wilwisha wako.” Alīhaya SEEBA. “Nakūkūgoloolela nkono gwane, nakūholomole kūfuma ū kwigūlya ya shiganga, nakwīte kūbiza lūgūlū lūpiile moto.

²⁶Ū mulī bebe lītilonga iwe nūūlū līmò lya kūgoloolela nzenga, nūūlū lītigela iwe lyose lyose lya kūzengela nsingi; nguno ūkūbiza itogolo lītī na shose shose ilalī,” alīhaya SEEBA.

²⁷“Nunjagi lūbembeela lwa būlūgū ū mu sī yenīyo; mugalīgīje ipembe a mahanga! Gakomelejagi gansange kūndumīla, galwe nang'hwe būlūgū. Gasamīlagi a mahanga aya gansange: Alalati, Mini, na Ashikenazi. Tūūlagi līmakalwe (itaale lya mabità ga būlūgū) lya būlūgū līnsange kūlwa nang'hwe; tūmagi falasa ningī jilamatīle koi gītī njige.

²⁸Gakomelejagi a mahanga gigolanye kūja kwilwisha būlūgū nang'hwe; a batemi ba Bamedi ni bizage, na a basugi na a batūmami ba selekali jabo; nī sī pyī ījo jilī ha sīlīlī ya būsugi wabo.

²⁹Ī sī īlīdetema na kūtingina, nguno ūyo agūhelile ū SEEBA kwīyītīla sī ya Babuloni gūtaalī ū kūgalūka, ū gwa kwīgalūcha ī sī ya Babuloni ībize buyīkī, ītī na bikaji.

³⁰A bashilikale ba Babuloni booyaga ū kūlwa, balemelaga mu ng'hambī jabo, jashilaga pyī ī nguzu basedeekaga, baabizaga gītī bakīma. Ī numba jaamo jaakūbīkagwa moto; na a malugalīlo ga ha mibita gabīnzagūlagwa.

³¹Batwaji ba mhola na batūmījiwa bakwibisanyaga bo nhambo; balīng'wenhela mhola ū ntemi wa Babuloni, gīkī pyī ū nzengo gwadimagwa.

³²A mapandī ga ha būkīlīlo bo myongo gaadimagwa; a masaka ga madete gapembagwa moto; a bashilikale babbahaga no.”

³³Ū SEEBA wa mabità, ū Mulungu wa Isilaeli, alīhaya gīkī, “Ī Babuloni ītikīlile na lūbūūga lwa kūtūlīla būsīga ng'wikanza lya batūji kūlūtūmamīla; Ī likanza lya kūgeswa ī sī yenīyo līlī hihī.”

³⁴“Ū ntemi Nebukadineza wa Babuloni wanilya, ūnileka naagunzagūkaga, nazwanganile natī na shose shose; nalī gītī shisaabo shilī dalali. Akanimila gītī naamilwa iyoka, ī nda yakwe yookala shizeeze shane, hanuma wigaafula ūshiswa.”

³⁵Būlī ng'wikaji wa Sayuni akūhaya: “Ū wiboneeji ūbo nīītīlwa nene ni būngwīlage ū Babuloni. Ī Yelusalemu īhaye, ‘Ī shiilī ya mininga gane leka Ībize ha mitwe ya bana Babuloni.’

³⁶Alilūūlū, ū SEEBA alīhaya: ‘Managi gīkī nakūkūgunīja, nakūbamalīla shiilī kūlwa nguno yako. Ī nyanza yakwe nakwīkamya, nī nzwīīlo jakwe nakūjūūmīcha kūlū.’

³⁷Ī Babuloni īkūbiza matūūgo ga makambagūkīle, ībize būtūūgījo bo jidīvī,[54] sī y'igekemaja na kūdalahwa; ipandī lītī lya kwikala mo banhū.

³⁸A banhū ba ng'wene pye a bose bakūyūpogoma gītī shimba songi; bakūng'ang'aala gītī mamunda ga shimba.

³⁹Bakūseba kūshisha babakīle; hūna ū ng'wikanza lyenīlo nakūbabeegeja shigukulu, nakūbang'wisha shikoji baleewe bayūhooyoka seko dūhū; hanuma bakūgwa balaale ilalī,” alīhaya SEEBA.

⁴⁰Nakūbicha nabatwale kwisīnzīlo gītī baana ba ng'holo; gītī ng'ondi ja ng'holo na ngulyati ja mbūli.

⁴¹Ī Sheshaki[55] yasolilwe na banishi, Ī sī īyo yalī īkumīlījiwe kūheeba sī jose yadimilwe! Ī Babuloni yabizile shikolo sh'igekemaja ū kū mahanga.

⁴²Ī Babuloni yaseesekelilwe nyanza, yakundīkījiwe mahuuli yūlibīla.

⁴³Ī sī yenīyo ī haha itogolo lyūmu, Ī mizengo yamo īlī dalali, sī ītī ya kwikala mo banhū, na atīho wa kūgima kūbīta mo.

⁴⁴Ū Beli nakūng'winhīla nsango mumo sī ya Babuloni, nakūngogoola shifume īsho washimila. A mahanga gakooya ū kūpeelela ū kūlī we. Ee, nī ndugu ja Babuloni jikūgwa.

⁴⁵“Bīng'we banhū bane, fumagi mo ū mulī we! Peelagi ng'wipīje ū būpanga wing'we! Būpeelagi ū būpelanu bo ng'wa SEEBA.

⁴⁶Yaya ū kūgwa ng'holò, nūūlū kogoha kūlwa kwigwa ng'humo ū mu sī yenīyo; ū ng'waka ūyū mukwigwa lūkumo ūlū, ng'waka gūngī lūkumo lūngī hangī; ng'humo ja wiboneeji ū mu sī, na ja basugi na basugi kwilwisha.

⁴⁷Nguno līkūshika ikanza lya kūshinha nsango ī shiikolile sha Babuloni; Ī sī yenīyo īkūgooka pyī ī yose, ī mibimba ya banhū bakwe abo bakūbūlagwa īkūgwīla mumo ng'wenūmo.

⁴⁸Ī ngūlū nī sī nī shose īsho shilīmo shikūtūla mhūndū kūlwa būyegi nguno ya kūkenaagūlwa kwa Babuloni; a bakenaagūji abo bakwiza kwīdumīla bakwīngīīla sukuma.” Alīhaya SEEBA.

⁴⁹“Ī Babuloni shiigelile īgwe kūlwa nguno ya Isilaeli, gīt'ūmo banhū bingī baagwīla mu sī jose, kūlwa nguno ya Babuloni.

⁵⁰Bīng'we abo ng'wapūlūgūkile, Īngagi, yaya ū kwigedya gedya! Ng'wizūkagwi ū SEEBA nūūlū īkī mulī mu sī ya kūle, yiganikagi ī Yelusalemu.”

⁵¹“Twagookile no nguno ya kūdūkagūlwa, tūlīcha soni nū kūbūūcha ū būshū wise, kūlwa nguno banishi bingīlile ū ng'wipandī lyeela lya numba ya ng'wa SEEBA.”

⁵²“Alīyo jikūshika shikū,” alīhaya SEEBA, “nakūshinha nsango ī shiikolile sha Babuloni; hūna hose pye ū mu sī yenīyo kūkūbiza kūgang'hīla, nguno ya banhū abo balabūkile.

⁵³Ī Babuloni nūūlū īlinhe kwigūlya no kūshisha kū malunde, hūna yibeegeja na ngītīli ya ndugu kūlwa kwīpīndīlīja ī ng'hambī yayo ū kwigūlya kwenūko, nakwītūmīla bakenaagūji bīdūmīle,” alīhaya SEEBA.

⁵⁴“Ilaka lya kūlīla līlīfuma Babuloni, yogè kūlwa būkenaagūji būtaale Īlīngīīla kū sī ya Bakalidayo.

⁵⁵Ū SEEBA akwīkenaagūla ī Babuloni; akwīhuumūja ī yogè yamo ī nhaale. Mahuuli ga banishi gakūfuutuma gītī minzī mingī; ī yogè ya malaka gabo īkūsegenela kūle.

⁵⁶Nyagaja akwīyūbūkīla ī Babuloni; a bashilikale baamo bakūding'wa; ū būta wabo būkūbīnzagūlwa. Nguno ū Seeba alī Mulungu maji wa shiilī; akūmala shiilī mu būshikaanu bose.

⁵⁷A batongeeji baamo na a banhū ba masala, nakūbang'wisha shikoji baleewe; a basugi baamo, a batongeeji, na a bashilikale; bose pye bakūlaala ilalī, ndūhū kūbūūka hangī,” alīhaya ū Ntemi, ūyo lina lyakwe alī SEEBA wa mabità.

⁵⁸Ū SEEBA wa mabità alīhaya gīkī, “Ī ndugu ya Babuloni īkūsambaajiwa h'ūmo īgalīhīle; nī mibita yamo īkūkūbīkwa moto hamò na būlīhu wayo. A banhū bakūnogelaga madūhū, ī milīmo ya banhū ba mahanga Īlī shipembo sha mu moto dūhū.”

⁵⁹Ū mhayo ūyū Yelemia akang'winha Selaya ng'witūnja o ng'wa Nelia ng'wana Maaseya, ūyo walī ntūmami ntaale wa hikūlū. Lyalī ikanaza īlo akaja Babuloni hamò na Sedekia ntemi wa Yuda mu ng'waka gwa kanè go būtemi wakwe.

⁶⁰Ū Yelemia walī wīyandīka mu shitabo pyī ī mihayo ya mayanga ayo gaalī gizile kwīgwīīla ī Babuloni; pyī īyo yalī yamala kwandīkwa kūlwa Babuloni.

⁶¹Akang'wīla ū Selaya, “Ūlū ūlashike ī Babuloni ūkūbasomela pyī ī mihayo yenīyī n'ilaka lya higūlya.

⁶²Ūlū ūlīmalīja hayaga gīkī, ‘Ee SEEBA, bebe ng'wenekīlī wahaya ūkūlīkenaagūla ī lipandī lyenīlī, atizikala mo munhū nūūlū ndimu, lībize buyīkī ilalī.’

⁶³Hanuma ūlū ūshikalīcha ū kūshisoma ī shitabo shenīshi, shitungīlījage iwe, ūshiluute mu mongo gwa Fulati.

⁶⁴Hūna ūkūhaya gīkī, ‘Nī Babuloni īkūlibīla gīkī, ītūbūūka hangī kūlwa nguno ya būkenaagūji būtaale ūbo nakwīyenhela. A banhū ba ng'wene nabo bakūgwishiwa.’” Ī mihayo yang'wa Yelemia yashilīla henaha.