Read Sukuma Bible 2015 – Bibilia Ilagano Lya Kale 2015 Yelemia 52 Bible Online

Yelemia 52 - Sukuma Bible 2015 – Bibilia Ilagano Lya Kale 2015 bible

Yelemia 52

¹Ū Sedekia walī na myaka makūmi abīlī na gūmò aho alandya kūbiza ntemi; ūsuga ū mu Yelusalemu ikanza lya myaka ikūmi na gūmò. Ū nina ī lina lyakwe witanagwa Hamutali, nshīke o ng'wa Yelemia, muna Libuna.

²Akīīta yabūbi ū kū būtongi bo ng'wa SEEBA, gīt'ūmo walī wītīla ū Yehoyakimu.

³Pyī ī yenīyī īkabizīīla a bikaji ba Yelusalemu nī Yuda kūlwa nguno ya būpelanu bo ng'wa SEEBA; ī ng'halīlo yaho akabīnja ū kū būtongi bokwe. Ū Sedekia akangomela ū ntemi wa Babuloni,

⁴Hūna ū mu ng'waka gwa kenda gwa būsugi bokwe ū Sedekia, mu lūshikū lw'ikūmi ng'weji gw'ikūmi, ū ntemi Nabukadineza wa Babuloni wiza nī libita lya bashilikale bakwe pyī ī lyose; ūshika ūkoma ng'hambī hanze ya nzengo gwa Yelusalemu, būgūgobanīla kūgūdumīla.

⁵Ū nzengo gwenūyo gūkikala gūgobanīlilwe banishi gīko kūshisha ng'waka gw'ikūmi na gūmò gwa būsugi bo Ntemi Sedekia.

⁶Kūshika mu lūshikū lwa kenda mu ng'weji gwa kanè, ī nzala yūsangwa yasaayile no ū mu nzengo, ī shilīwa sha kūlya shashilile gete ū mu banhū.

⁷Yūchibūlwa ipūndū ī ndugu īyo yalī īgūpīndije ū nzengo; pyī ī libità lya bashilikale ba būlūgū lyūfuma ū mu nzengo būjikū lyūpeela; būbītīla ha mita gwalī ha gatī ya ndugu ibīlī hihī na ngūnda gwa ntemi; būtūngīīla kū mbūga ya Alaba, nūūlū īkī a Bakalidayo baalī bagūpīndije ū nzengo pyī ū gose.

⁸Alīyo a bashilikale b'ibità lya Bakalidayo bakankūūbīja ū ntemi Sedekia, būkampandīkīla kū mbūga ya Yeliko; a bashilikale bakwe baalī baneka būsambaala;

⁹ūding'wa ū wei. Būntwala kūlī nteki wa Babuloni, Ī likanza lyenīlo walī Libuna mu sī ya Hamasi; ūnamula kwinhwa nsango.

¹⁰Ū ntemi wa Babuloni ūbabūlagīla Libuna henaho a bitūnja ba ntemi Sedekia, nang'hwe iiloleelile; na a basugi ba Yuda ūbabūlaga pye a bose.

¹¹Hanuma ya henaho ūgakobola a miso ga ntemi Sedekia, hūna ūntunga nhendele ja chūma sha shaba, ūntwala Babuloni; ūūkamponya mu jeela, wikala ng'wenūmo kūshisha lūshikū lwa kūcha kwakwe.

¹²Mu ng'waka gw'ikūmi na kenda gwa būsugi bo ng'wa Nebukadineza ntemi wa Babuloni, Nebuzaladani ūyo walī ntaale wa balang'hani ba ntemi, na ntūmami wa ha sīlīlī ya ntemi wa Babuloni, akingīla ī Yelusalemu mu lūshikū lw'ikūmi ng'weji gwa katanò.

¹³Ūshika wītiima moto ī hekalu ya ng'wa SEEBA, nī likūlū, nī numba ja Yelusalemu pyī ī jose; pyī ī numba ī nhengeke ūjitiima moto.

¹⁴Na hangī a bashilikale ba Bakalidayo abo walī nabo ū ntaale wa balang'hani ba ntemi būjiikīja hasī, pyī ī ndugu ja ngītīli īyo yalī īgūpīndije ū nzengo gwa Yelusalemu.

¹⁵Ū Nebuzaladani ū ntaale wa balang'hani ba ntemi, ūbasola a banhū abo baalī bakuneese ba bakuunese, na a babo baalī basaagīīla ū mu nzengo, hamò na bakoolī abo baalī baalekeelwa; ūūkababītīla na a babo baalī baaja boi benekīlī ū kūlī ntemi wa Babuloni, ūbasaamya kūbatwala mu būding'wa.

¹⁶Alīyo ū Nebuzaladani akabaleka a bakuunese ba bakuunese abo bakasaagīīla ū mu sī, babize batūmami ba mu migūnda ya mizabibu, nū mu a malaale a gangī.

¹⁷A Bakalidayo būshibelagūla ī shikolo sha shaba īsho shalī ū mu hekalu ya ng'wa SEEBA; gītī, ng'hīngī ja shaba, makīndīkīlo,[56] na shiseme sha kūtūūlīla minzī;[57] ī shaba pyī ī yose būbūūcha būjana Babuloni.

¹⁸Bakajaana na shikolo gītī, mafulīla, makolelo, majimījo ga tala, mabbakuli ga kūseeseebela, nzweso, nī shiseme sha shaba pyī īsho shatūmamīlagwa mu myatīla ya kalamīje ka mu hekalu.

¹⁹Ū ntaale wa balang'hani ba ntemi akasola na masahani, nzweso ja kūzuukīlīgīja būbbani, mabbakuli ga kūseeseebelela, mafulīla, makīndīkīlo ga talà, nzweso, na a mabbakuli a gangī; pyī ī shiseme īsho shaalī sha zahabu na feza ūshijana.

²⁰Ī shaba yalī ningī no īyo bakīnja a ha ng'hīngī īj'ibīlī, na a ha shiseme sha kūtūūlīla minzī hamò nī nzagamba[58] ikūmi n'ibīlī ījo jalī jishibūkije ī shiseme shenīsho, nī ya kūfuma a ha makīndīkīlo; yalī shilambu ū kūbūmana ū būdito wayo. Ī shikolo shenīsho Solomoni walī washibeeja kūlwa nguno ya hekalu ya ng'wa SEEBA.

²¹Būlī ng'hīngī yalī na būlīhu bo fuuti makūmi abīlī na mpungatī, ū kwīpīndīlīja ū mu wibilingu wayo yalī na fuuti ikūmi n'inaane, yalī na mbeho a ha gatī, ī ndugu yaho yalī na būgīnu bo kūlenganīla na shiganza sha munhū.

²²Būlī yene yalī n'ikundīkījo lya shaba a higūlya, lya būlīhu bo fuuti inè na nusu; hūna lyūtūūlīlwa kalweyo ka būlenji, na makomamanga ga shaba gūpīndīlījiwa. Ī ng'hīngī jose būbīlī wajo jalī na būlenji bo mbika īmò.

²³Ū mu kabazu gaalīmo makomamanga makūmi kenda na atandatū; ī lisaabu lya makomamanga gose pye ayo gaalī a higūlya ya kalweyo gaal'igana.

²⁴Ū ntaale wa balang'hani ba ntemi akajūmponya mu jeela ū Selaya ūyo walī ntaale wa bagabīji, nū Sefania ūyo walī ngabīji wa kabīlī ū mu būtaale; na balang'hani badatū ba milyango.

²⁵Ū mu banhū abo baalīmo ū mu nzengo akansola ū ntaale wa bashilikale ba būlūgū, na banhū mpungatī abo baalī bagunanhi ba ntemi mu mihayo ya būsugi. Na kalaani ntaale ūnjaana, ūyo nīmo gwakwe gwalī kūbahelela milīmo yabo a banhū ū mu sī, akanjaana hamò na banhū bakwe makūmi adatū, abo bakasangīlwa ū mu nzengo.

²⁶Ū Nebuzaladani ū ntaale wa balang'hani akabatwala kūlī ntemi wa Babuloni pye a banhū benaba, walī Libuna.

²⁷Ū ntemi ūlagīja būbūlagīlwa Libuna kwenūko, mu sī ya Hamasi. A banhū ba Yuda būbiza bīnjiwa ū mu sī yabo, būtwalwa mu būsaamiwa.

²⁸Ī lisaabu lya banhū abo ntemi Nebukadineza akabasaamya ūbatwalwa mu būding'wa lyalī īlī: Ū mu ng'waka gwa mpungatī akabasaamya Bayudaya shihūmbī shidatū na makūmi abīlī na badatū.

²⁹Ū mu ng'waka gw'ikūmi n'īnaane gwa būsugi bo ng'wa Nebukadineza, kūfuma Yelusalemu baalī banhū magana anaane na makūmi adatū na babīlī.

³⁰Ū mu ng'waka gwakwe gwa makūmi abīlī n'idatū, ū Nebuzaladani ū ntaale wa balang'hani ba ntemi akabasaamya Bayudaya maagana mpungatī na makūmi anè na batanò, ūbatwala mu būding'wa. A banhū a bose abo bakasaamiwa baalī shihūmbī shinè na magana atandatū.

³¹Ū ntemi wa Yuda ū Yehoyachini aho washisha myaka makūmi adatū na mpungatī alī mu būtungwa, Evi-melodaki ūbiza ntemi wa Babuloni. Mu lūshikū lwa makūmi abīlī n'itanò ng'weji gw'ikūmi n'ībīlī, ū ntemi ng'wenūyo ūntaligūlīla ū Yehoyachini ū ntemi wa Yuda, ūng'wīnja ū mu jeela ūng'winha wiyaabī.

³²Ūyūlūngalūnga nang'hwe nhambū jawiza; ūngūngūhya, nī lisumbī lya kwigaasīja ūng'winha ly'ikūjo kūtinda a batemi a bangī abo baalī baatungwa Babuloni hamò nang'hwe.

³³Kūfuma ikanza lyenīlo ū Yehoyachini ūlekana nasho ī shizwalo sha nyatungwa; nīyo ī shilīwa ūyūlīīla ha meza ya ntemi būlī lūshikū pyī ī shikū ja būpanga bokwe ūbo būkasaaga.

³⁴Ū ntemi wa Babuloni ūlagīja gīkī ū Yehoyachini ayūpandīka shiigunaanīlo būlī lūshikū, ū mu shikū jose ja būlamu bokwe, kūshisha lūshikū lwa kūcha kwakwe.