Read Sukuma Bible 2015 – Bibilia Ilagano Lya Kale 2015 Yelemia 9 Bible Online

Yelemia 9 - Sukuma Bible 2015 – Bibilia Ilagano Lya Kale 2015 bible

Yelemia 9

¹Ū ntwe gwane ūyū, gīt'ūlū ni gwagalūka kūbiza lwinzī, na a miso gane gūbiza nzwīlo ja shisoji! Ni naalīla līīmi na būjikū, nakūbalīlaga a banhū bane, abo baabūlagilwe.

²Ūlū ni nalī na ng'hambī kū matogolo ya kwifuulīla bashimīzi, ni naaja kwenūko nūbīngīla a banhū bane nūbasegenela; nguno pye a bose bashihani, ibità lya bahūnga.

³“Ī ndīmi jabo bajileegile, jilī gītī būta būmalīīlile kūlasa; ū mu sī būtīho ū būtindi kūlwa kūshimīzīla mu ng'hana. Bakongejaga kūja kū būtongi mu shibi higūlya ya shibi; bataniitegelegije ū nene,” alīhaya SEEBA.

⁴“Bilang'hanagi a banwani biching'wi, na a badūgū bing'we yaya ū kūbasanya. Nguno būlī ndūgū ng'wijomboki; na būlī nwani nsīīgani.

⁵Būlīho wilemba lembi ha gatī ya nwani na nwani, atīho ū ntūngīlīja mu kayombele. Ī ndīmi jabo baajilanga kūlomaloma, bīīti ba shibi kūshisha kūseedeeka.

⁶Ūkīngilwe[23] būlomolomo kose kose; kūlwa kwilembagūla kwabo balemile ū kūniitegeleja ū nene,” alīhaya SEEBA.

⁷Alilūūlū, ū SEEBA wa mabità alīhaya gīkī, “Ū nene nakubabītya mu moto kūlwa kūbīngīja ū būsoso; nguno numho mhayo kī gūngī ūyo nadūgije kūbīītīla a banhū bane?

⁸Ī ndīmi jabo jibange gītī masonga ga būsūngū, jikafunyaga mihayo ya būlomolomo. Būlī ng'wene ūlū akūhooyaga na ng'wiye akayombaga mihayo ya mhola a ha nomo, alīyo ū mu ng'holò akadosaga ntego gwa kūngwisha.

⁹A benaba naleke kūbinha nsango kūlwa mihayo yenīyī?” Alīhaya SEEBA. “Naleke kwimalīla shiilī kwihanga lya mbika īyī?”

¹⁰Nakūtūla ng'hūngū najilīle ī ngūlū, na a matogolo ga madīīmīlo nakūgalīīla. Nguno ī haha ndūhū mo bikaji, ndūhū nūūlū wa kūbīta mo. Nī ng'ombe joyile ū kwigwiwa jilīkumba. Ī noni ja kūlala najo jasaamile, nī ndimu jitīho japeelile.

¹¹“Ī Yelusalemu nakwīyīta lībize itūūgo lya makambagūkīle, būtūūgījo bo jidīvī; nī mizengo ya mu Yuda nakwīyīta ībize buyīkī; atizilonga wa kwikala moi.”

¹²Alīho munhū kī wa masala, ūyo adūgije kwīyitegeleja ī mihayo yenīyī? Nani ūyo alangilwe na SEEBA gīkī igeleelwe kwīsomboola? Nibūlī ī sī yakenaagūkile yeela pe lyūbiza itogolo lītī na shose shose, nose atīho nūūlū ūmò wa kūbīta mo?

¹³Ū SEEBA alīhaya, “Īlī kūlwa nguno ya kūshileka ī shilagīlo shane īsho naabatūūlīla, nī lilaka lyane balemile ū kūliigwa, pyī nūūlū ū kūshimīza mu kūlīlondeela yaya.

¹⁴A ha ng'wanya gwaho bakūlondeelaga būgang'hanazu bo ng'holò jabo dūhū; bakūgalondeelaga ma Baalī, ūmo baalangīlwa na babyaji babo.”

¹⁵Alilūūlū, ū SEEBA wa mabità, ū Mulungu wa Isilaeli alīhaya, “Managi gīkī, a banhū benaba nakūbalisha shilīwa shilūlū, na nakūbang'wisha minzī gasangije būsūngū wa kūbūlaga.

¹⁶Nakūbasambaaja mu mahanga ayo batagamanile a boyi, na a bakūlūgenji babo baalī batagamanile. Hama nakūbakūūbīlīja ko na līlūshū kūshisha nabayagaje.”

¹⁷Ū SEEBA wa mabità alīhaya gīkī, “Alilūūlū ī haha ideedeng'hanyagi! Koobagi bamani ba kūlīla; lagījagi bakīma bize, a bakoolī baago ū mhayo gwenūyo.

¹⁸Ni bizage wangū batūle ng'hūngū ya kūtūlīla a bise, kūshisha a miso gise gahūūme shisoji; Ī ngohe jise jilobe minzī.

¹⁹Ilaka lya kūlīla ng'hūngū līligwiwa kūfuma Sayuni: ‘Īī twashila būlī! Twagwīlwa makoye mataale! Twayīleka ī sī yise, nguno ī haha ī numba jise jilī misaka yike!’”

²⁰Bing'we bakīma, gwigwagi ū mhayo go ng'wa SEEBA! Tegagi a matū ging'we giigwe Ī mihayo ya kūfuma mu nomo gwakwe. Balangagi a bashīke bing'we kūlīla ng'hūngū; nīyo būlī ng'wene anange ng'wiye lyīmbo lya ng'hūngū.

²¹Nguno ū lūfu lwingīlile kūbītīla mu mūdilisha gise, lwihoolelile ū mu kaya jise; lwabamalile a baana ū mu mayīla, na a basūmba ū mu gwalugwa ja mu mizengo.

²²Alilūūlū, yombaga gīkī, Ū SEEBA līhaya, “Ī mibimba ya banhū īkwilaalīla ū mu matogolo gītī maashi; gītī maswa ga muchele galīpuugwa na ngesi wagaleka kū numa, atīho ū wa kūgabilinga.”

²³Ū SEEBA alīhaya gīkī, “Ū wa masala atizikumīlīja kūlwa nguno ya masala gakwe; nūūlū ū wa nguzu atizikumīlīja kūlwa nguno ya nguzu jakwe; nūūlū ū nsabi atizikumilīja kūlwa nguno ya būsabi bokwe.

²⁴Alīyo ū wa kwikumilīja ni ikumīlījage mu mhayo ūyū gīkī, aniitegelegije nene, na animanile gīkī nalī SEEBA; hū nene nakīītaga mihayo mu kūchīla shigongo, būdeeba na būtūngīlīja ū mu sī. Nguno ī yenīyī īniyegije,” alīhaya SEEBA.

²⁵Ū SEEBA alīhaya, “Jikūshika ī shikū ja kūbagwisīja nsango pye abo basaalilwe ikoba lya mīlī dūhū.

²⁶A bana Misili, Yuda, Edomu, Amoni, Moabu; na a bikaji ba kū sī ja kūle, kū nhogolo;[24] nguno pye a banhū ba mahanga genaya ū mu ng'hana batasaalilwe; na a ba numba ya Isilaeli a bose batasaalilwe ū mu ng'holò jabo.”