Read Sukuma Bible 2015 – Bibilia Ilagano Lya Kale 2015 Ng'hūngū 5 Bible Online

Ng'hūngū 5 - Sukuma Bible 2015 – Bibilia Ilagano Lya Kale 2015 bible

Ng'hūngū 5

¹Ee SEEBA, yizūkagwe ī mihayo īyo yatūpandīkile; tūlolage, ūgabone a magooke gise.

²Ū wingīji wise baagabīlilwe banhū bangī, ī numba jise jadimilwe na bageni.

³Twabizile bapīna, tūtī na basīswe; a baninise baalekilwe gītī bachīlwa.

⁴A minzī ga kūng'wa tūlīyūūgūla; nī ng'hwi ja kūpemba tūlījipandīka bo hela.

⁵A batūmamya bise bakūtūkiling'himyaga na milīmo midito no; nūūlū twanogaga ndūhū ū kwifuula.

⁶Twambile makono Misili na Ashuli, gīkī twinhwe shilīwa sha kūtwigela.

⁷A bakūlūgenji bise abo bīīta shibi batīho ī haha, alīyo ū nsango gwabo tūlīkoya nago bise.

⁸Ī haha basese h'abo batūsugile, atīho munhū wa kūtwīnja ū mu makono gabo.

⁹Tūlīyūbīta mu kwihīga kūtaale hū twapandīka ī shilīwa, nguno banyoli bakūtwibandīīlaga ū mu masaka.

¹⁰Ī likoba lya mibīlī yise līlīyūseba no gītī liiko, nguno ya būdito bo nzala.

¹¹A bakīma bakwītīlagwa yabūbi ū mu Sayuni, na a banhya ū mu mizengo ya Yuda.

¹²A basugi balīyūtungwa a makono banungeejiwa; a banamhala batinhagwa ī likūjo.

¹³A basūmba bakūkoyaga na nīmo gwa kūsha būsu ha mawe; a bayanda bakūdandaligūkaga na miligo ya ng'hwi ha mabega.

¹⁴A banamhala boyile ū kwigasha a ha mita gwa nzengo, a badinha nabo boyile ū kūtūla Ī ng'oma jabo.

¹⁵Ū būyegi boshilile ū mu ng'holò jise; ī mbina jise jagalūkile kūbiza ng'hūngū.

¹⁶Ī shingilima īyo twalī nayo yajimīīlile; twagwīlilwe mayanga kūlwa shibi shise.

¹⁷Kūlwa yenīyī ī ng'holò jise jikūsaatagwa no; a miso gise gaabbopomile kūlwa yose īyī,

¹⁸nguno ū lūgūlū lwa Sayuni lwalekilwe dalali; nyamhawa dūhū h'ījo jikwibisanyaga moi.

¹⁹Ū bebe Ee SEEBA, ūlī nsugi wa welelo na welelo, ī lisumbī lyako lya būtemi līlī lya kūshinga shibyalīlwe na shibyalīlwe.

²⁰Nibūlī ūtwībe ilalī gīko? Nibūlī ūlītūlekanīja ikanza ilīhu gīko?

²¹Ee SEEBA, tūshoshage kūlī bebe tūkūkūshokela; tūshokeje ū wiza bo mu shikū jise ī ja kale.

²²Numho hamo ūbize watūlema gete, hamo watūpelanīla kūkīlanīja!