Read Sukuma Bible 2015 – Bibilia Ilagano Lya Kale 2015 Ezekia 1 Bible Online

Ezekia 1 - Sukuma Bible 2015 – Bibilia Ilagano Lya Kale 2015 bible

Ezekia 1

¹Mu lūshikū lwa katanò ng'weji gwa kanè, ng'waka gwa[1] makūmi adatū, naalī kū Mongo gwa Kebali hamò na basaamiwa.[2] Ī ligūlū lyūkundūka nūbona koolekegeje ka ng'wa Mulungu.

²Ū lūshikū lwa katanò ū mu ng'weji gwenūyo, gwalī ng'waka gwa katanò kwīngīīla ikanza lya kūsaamiwa kwa ntemi Yehoyakini;

³mhayo go ng'wa SEEBA gūkang'wizīīla ngabīji Ezekia ng'witūnja o ng'wa Buzi,[3] walī kū Mongo gwa Kebali mu sī ya Bakalidayo. Ū nkono go ng'wa SEEBA gwalī hamò nang'hwe ū kwenūko.

⁴Aho nalola, nūbona nyaga gwa widose gūliza kūfumīīla mu sukuma, n'ilunde itaale līpīndiwe būpe būng'weku no no no, na moto gūkūligimaga bo kūlabya wangū wangū. A ha gatī ya moto habonekanaga gītī chūma shiteemagīzu;

⁵Ū mu moto shalīmo shabonekanaga gītī shiseeng'wa shipanga shinè; ī suso yasho yabonekanaga ya munhū.

⁶Kwike būlī shene shalī na būshū būnè na manana anè.

⁷A magūlū gasho gaalī magololoku, ī mhambala jasho jalī gītī chūūga sha ndama, na jateemagīlaga gītī chūma shape shiguusilwe shūng'weka.

⁸Ū mu mangwa ya manana ayo galī kū mhandī jose inè būlī hene gwalīho nkono gwa munhū. Ī shiseeng'wa shose būnè washo shalī na būshū na manana;

⁹a manana gasho gaalī gikuumije. Būlī shene ūlū shilīselema shajaga kū būtongi dūhū, shalī shitagalūkaga.

¹⁰Ū kūbonekana kwa suso ya shiseeng'wa shenīsho kwalī gīkī, būlī shene shalī na suso ya būshū bo munhū, ū kū nkono gwa būlyo būlī shene shalī na suso ya būshū bo shimba, ū kū nkono gwa lūmoso būshū bo nzagamba, hama būlī shene shalī būshū bo ng'hoonà.

¹¹H'ūmò walī ū būshū washo. A manana gasho gaalī gaalile hūna gūgololoka kūj'igūlya, būlī shene manana abīlī; inana līmò liikuumije n'inana lichalyo ū kū shiseeng'wa īsho shalī bbihī nasho; manana abīlī gūūgūkumba ū mīlī.

¹²Būlī shene ūlū shilīselema shajaga kū būtongi dūhū; ūko gūja ū moyo shajaga kwenūko; shalī shitagalūkaga ūlū shilīselema.

¹³Ī shiseeng'wa shenīsho shabonekanaga gītī makala ga moto gakangaalile, nūūlū gītī chenge shikūligimaga; moto ng'weku gwilibanhyaga ūko na ūko ū mu shiseeng'wa shenīsho, na ndabi jafumaga mo jikūlabyaga.

¹⁴Ī shiseeng'wa shipanga shenīsho shaselemaga ūko na ūko wangū no gītī lūlabi.

¹⁵Aho naashilola chiza ī shiseeng'wa shipanga, nūbona būlī shene shilī n'idandali a hasī lihelile nasho.[4]

¹⁶A madandali genayo ūmò gabonekanīlaga nū mumo gaalī gabeegegije gaalī gīkī, gang'wekaga gītī kilisolito, a gose būnè wago gaalī gikolile. Būlī lyene lyabonekanaga gītī lībeejiwe mu mbika y'idandali mu gatī y'idandali.

¹⁷Ūlū galīselema gajaga būlī kwene ū mu mhandī inè, ūko shalī shilolelile ī shiseeng'wa; a madandali gaalī gatagalūkaga ūlū shilīja ī shiseeng'wa.

¹⁸Ī lingi ja madandali genayo jalī ngūngūhu no, hangī ja magaka; nīyo pyī ī lingi būnè wajo jalī jokalile miso py'a hose.

¹⁹Ī shiseengw'a shipanga ūlū shaselema, na a madandali ayo gihelile nasho gaaselemaga hamò nasho; nūūlū shabūūka higūlya ya sī ī shiseeng'wa shipanga, na a madandali gabūūkaga a hasī.

²⁰Hose hose ūko gūūīlīla ū moyo, nasho shajaga, na a madandali gaabūūkaga hamò nasho; nguno ū moyo gwa shiseeng'wa shipanga gwal'ū mu madandali.

²¹Ī shiseeng'wa ūlū shaselema, na a goi gaselemaga, ī shiseeng'wa ūlū shīmīīla shalembeela, na a goi gīmīīlaga gaalembeela, nūūlū shabūūka higūlya ya sī ī shiseeng'wa, na a madandali gabūūkaga a hasī; nguno ū moyo gwa shiseeng'wa shipanga gwal'ū mu madandali.

²²A higūlya ya mitwe ya shiseeng'wa shipanga lyalīho lya kūbiza gīt'igūlū lyambile; iteemagīzu gītī ilole, hangī lya kogohya no.

²³A ha sīlīlī y'igūlū ī shiseeng'wa shalī shigoloolile manana gilolela būlī lyene na lichalyo; na būlī shene shalī shiikumbile ū mīlī gwasho na manana abīlī.

²⁴Ūlū shilīja naagwigwaaga ū mfuutumo gwa manana gasho, gītī numī gwa minzī mingī gakūhūūmaga, gītī kūhamuka kwakwe ū Wabūdūla; gītī yoge y'ibità itaale. Aho shīmīīla shūlembeela, shūgiicha a manana gasho.

²⁵Aho shīmīīlile na a manana gasho gikile, lilonga ilaka kūfuma a higūlya y'igūlū īlo lyalī ū kwigūlya ya mitwe yasho.

²⁶A higūlya y'igūlū ū kwigūlya ya mitwe yasho, lyabonekanaga ho lya kūbiza gīt'isumbī lya būtemi lya mawe ga safilo; a h'isumbī lya būtemi gwalīho gītī mīlī gwa suso ya munhū.

²⁷Ū kwandīja aho yalī gītī ha nkīmbīlī gwakwe kūja igūlya, nūmona abange gītī chūma shiteemagaīzu shokalile moto ū mu gatī, ū kwandīja a henaho kwika sīlīlī wabonekanaga gītī moto; walī apīndiwe būpe būng'weku no.

²⁸Ū būng'weku wa būpe ūbo walī būmpīndije walī gītī w'ita lya baashi īlo līkabonekanaga mu malunde ng'wikanza lya mbula. H'ūmo shabonekanīlaga ī shiikolanījo sh'ikūjo lya ng'wa SEEBA. Aho nashibona nūgwa hasī nabundaalile, kwimanīla nigwa ilaka lya munhū akūyombaga.