Read Sukuma Bible 2015 – Bibilia Ilagano Lya Kale 2015 Ezekia 10 Bible Online

Ezekia 10 - Sukuma Bible 2015 – Bibilia Ilagano Lya Kale 2015 bible

Ezekia 10

¹Nahayūlola nūlībona ī ligūlū a higūlya ya mitwe ya Makelubi, ū kwigūlya yalyo shalīho shiikolanījo sh'isumbī lya būtemi lya mawe ga safilo.

²Ū SEEBA ūng'wīla ū munhū ūyo walī azwalile shizwalo sha kitaani, “Jaga ū mu madandali ū mu sīlīlī ya Makelubi, ūkagookaje makala ga moto a makono gako kūfuma ū mu Makelubi, ūkagamiizūle ū mu nzengo.” Ūja mo ng'hana nalībona.

³A Makelubi gaalī gīmīīla lwande lwa dakama; ū munhū ng'wenūyo aho waaja moi, ī gwalugwa ya mu gatī yookala ilunde.

⁴Ī likanza lyenīlo ī likūjo lya ng'wa SEEBA lyīnga a ha Makelubi, linunga ng'wigūlya; hūna lyūja ha būshikīlo bo ha nyango go hekalu. Ī hekalu yookala ilunde, nī libīndo lyeela pe kūlw'ikūjo lya ng'wa SEEBA.

⁵Ī lilaka lya mfuutumo gwa manana ga Makelubi lyashikaga kwibīndo lya hanze, lyalī gītī kūhamuka kwa ng'wa Mulungu wa Būdūla ūlū alīlūngalūnga.

⁶Aho wanagīla ū munhū ūyo walī azwalile shizwalo sha kitaani, “Solaga moto kūfuma ū mu madandali ayo gakūpilimaga, kūfuma ū mu Makelubi,” ū munhū ng'wenūyo akaja mo ūūkīmīīla hihī n'idandali līmò.

⁷Hūna līmò lya Makelubi lyūgoloola nkono ū kū moto ūyo gwalī ū mu go. Lyūgwahula ū moto lyūntūūlīla mu makono ū munhū ūyo walī na shizwalo sha kitaani. Wahayūgwanukūla ūfuma hanze.

⁸(Ū mu mangwa ja manana ga Makelubi, gabonekanaga ga kūbiza gītī makono ga banhū.)

⁹Aho nalola nūbona galīho madandali anè gihelile na a Makelubi, būlī Ikelubi n'idandali līmò. A madandali genayo gaang'wekaga gītī kilisolito.

¹⁰Ū mu kūbonekana a gose būnè wago gaalī giyikolile; būlī lyene lya gītī idandali mu gatī y'idandali līngī.

¹¹Ūlū galīselema gajaga būlī kwene ū mu mhandī inè ūko galolelile a Makelubi. A madandali gaalī gatagalūkaga ūlū galīja ipandī lyose lyose a Makelubi, ūko gūūlolela ū ntwe. Gaalī gatagalūkaga ūlū galīja.

¹²Ī mibīlī yaago yalī ījimile miso pye a hose, kū ngongo, mu makono, na a manana; pye na a madandali gago.

¹³Nigwa a madandali galīhayiwa, “Madandali mapilimūki.”

¹⁴A Makelubi a gose būlī lyene lyalī na būshū būnè: Būshū būmò walī w'ikelubi, ū bo kabīlī būshū bo munhū, ū bo kadatū būshū bo shimba, ū būshū bo kanè bo ng'hoonà.

¹⁵A Makelubi genayo gūbūūka igūlya gīnga a hasī. A genaya hū shaalī ī shiseeng'wa shipanga īsho naalī nashibona kū Mongo gwa Kebali.

¹⁶A Makelubi aho gaselema, na a madandali gūselema ūmo gaalī gihelelile nago, na haho a Makelubi gaagoloola a manana gago gīkī galale gajile, a madandali gatīngile aho gaalī.

¹⁷A Makelubi ūlū gīmīīla galembeela, na a madandali gīmīīlaga galembeela; a Makelubi ūlū gabūūka ng'wigūlya, na a madandali gaabūūkaga hamò nago; nguno ū moyo gwa shiseeng'wa shipanga gwalī ū mu madandali.

¹⁸Ī likūjo lya ng'wa SEEBA lyīnga a ha būshikīlo bo ha nyango go hekalu, lyūja lyūkalembeela higūlya ya Makelubi.

¹⁹A Makelubi gūgoloola manana gago gūjūūdūka a hasī nalolile, gūlala gajile, na a madandali galī hamò nago; gūūkalembeela ha wingīlīlo wa mita gwa kīya gwa numba ya ng'wa SEEBA; nī likūjo lya ng'wa Mulungu wa Isilaeli lyalī a higūlya yago.

²⁰Ī shenīshi h'ī seeng'wa īsho naalī nashibona ha sīlīlī ya ng'wa Mulungu wa Isilaeli kū Mongo gwa Kebali; nakadeeba gīkī gaalī Makelubi.

²¹Būlī shene shalī na būshū būnè na manana anè, hama ū mu mangwa ja manana gasho gaalīmo ga kūbiza gītī makono ga munhū.

²²Ī suso ja būshū washo jabonekanaga gīt'ūmo naalī naabonela kū Mongo gwa Kebali. Būlī shene ūlū shilīsegeja shajaga kū būtongi dūhū.