Read Sukuma Bible 2015 – Bibilia Ilagano Lya Kale 2015 Ezekia 11 Bible Online

Ezekia 11 - Sukuma Bible 2015 – Bibilia Ilagano Lya Kale 2015 bible

Ezekia 11

¹Ū Moyo ūnibūūcha ūnitwala kū mita gwa numba ya ng'wa SEEBA, ūyo gūlolelile kīya. A ha wingīlīlo bo kūja a ha mita baalīho banhū makūmi abīlī na batanò, nūmona moi na Yazania ng'witūnja o ng'wa Azuli, na Pelatia ng'witūnja o ng'wa Benaya, abo baalī basugi ba banhū.

²Ū Seeba ūniwīla, “Ng'wana wa munhū, a banhū benaba hū bene abo bakabeejaga long'we jabūbi na kūfunya būganikīji bo nyakenaagūji ū mu nzengo gwenūyū.

³Bakahayaga, ‘Ī gīsī ī likanza lya kūzenga numba lītaalī dūhū ū kūshika? Ū nzengo gwenūyū gwene isabiga, a bise tūlī nyama jikūzugagwa.’

⁴Alilūūlū bahangīlage, bebe ng'wana wa munhū bahangīlage.”

⁵Hūna ū Moyo o ng'wa SEEBA ūnizīīla ūniwīla alīhaya, “Ū SEEBA alīhaya gīkī, H'ūmo mukūhayīlaga a bing'we banhū ba numba ya Isilaeli; alīyo ū nene namanile īyo īkwibisanyaga ū mu maganiko ging'we.

⁶A banhū abo ng'wababūlaga ū mu nzengo gwenūyū bingī no, a mapanda gaamo ng'wagookaja mibimba.

⁷Alilūūlū, ū Seeba MULUNGU alīhaya gīkī, Ī mibimba īyo ng'wīponangīja moi h'ī nyama, hama ū nzengo gwenūyū h'ī lisabiga, alīyo a bing'we nakūmupeeja ng'wīnge moi.

⁸Ū būlūgū mubogohile, alīyo ū nene hū nakūng'wenhela ū būlūgū; alīhaya Seeba MULUNGU.

⁹Nakūmufunya ū mu nzengo gwenūyo namutūūle mu makono ga banhū ba kūle, namugwisīje nsango.

¹⁰Mukūmalwa būlūgū nakūmutwala kū mbīmbī ja sī ya Isilaeli nakamulamulīle nsango kwenūko. Hūna mukūdeeba gīkī ū nene nalī SEEBA.

¹¹Ū nzengo gwenūyū gūtūbiza isabiga ū kū bing'we, nūūlū a bing'we mutūbiza nyama ū mu gatī yaago; nakūmutwala kū mbīmbī ja sī ya Isilaeli nakamulamulīle nsango kwenūko.

¹²A henaho hū mukūdeeba gīkī ū nene nalī SEEBA; nguno mulemile ū kūgalondeela a malange gane, nūūlū kūdima shilagīlo shane; alīyo mukūlondeelaga nhūngwa ja mahanga ayo gamupīndije hose hose.”

¹³Aho nalīfunya būhangi ūcha ū Pelatia ng'wana Benaya. Hūna nūgwa hasī nabundaalile, nūlīla n'ilaka lya higūlya, “Ee Seeba MULUNGU! Ūkūbūmala pye gete ū būshiigo wa Baisilaeli?”

¹⁴Ū mhayo go ng'wa Seeba gūnizīīla,

¹⁵“Ng'wana wa munhū, a baana bang'wing'we, a badūgū bako, na ba mininga gamò nang'ho, a ba numba ya Isilaeli, hū bene abo banhū ba Yelusalemu bakūbahayaga gīkī, ‘A benabo balī kūle no nū SEEBA; ī sī īyī yene twinhilwe bise, ībize yise benekīlī.’”

¹⁶Alilūūlū bawīlage, “Ū Seeba MULUNGU alīhaya gīkī, ‘A benabo nūūlū īkī naabatwala kū mahanga ga kūle, nūbabbalasanya mu masī, nahene ū ng'wikanza ī liguhī īlī nalī būpeelelo wabo ū kū sī ījo baaja.’

¹⁷Hūna lūūlū ū Seeba MULUNGU alīhaya gīkī, ‘Nakūmubilinga kūfuma ū kū mahanga, nang'wīnje ū kū sī ījo ng'wasambaalīla, nang'winhe hangī ī sī ya Isilaeli.’

¹⁸Ūlū būshoka bakūshīnja mo pyī ī shigīmbo sha malofu nī shiikolile sha kūlamiwa ī sh'ipelanya.

¹⁹Hanuma nakūbinha ng'holò ya būmò, nūbatūūlīla na moyo mpya; nakūbīngīja ī ng'holò ī ndaamu gīt'iwe, nabinhe ng'holò ya nofu.

²⁰Bakūdūla kūgalondeela a malange gane, nī shilagīlo shane kūshidima mu kwilang'hana. Bakūbiza banhū bane, nū nene nūbiza Mulungu wabo.

²¹Alīyo abo ng'holò jabo jidaamīīlile mashigīmbo gabo ga malofu na mashiikolile g'ipelanya ga kūlamiwa, nakūbagwisīja nsango kūlwa shītīle shabo; alīhaya Seeba MULUNGU.”

²²Hūna a Makelubi gūūgoloola a manana gago na a madandali gaalī galī hamò nago; ī likūjo lya ng'wa Mulungu wa Isilaeli nalyo lyalī a higūlya yaago.

²³Ī likūjo lya ng'wa SEEBA lyūgwīngīla ū nzengo, lyūkinunga kū lūgūlū, kīya ya nzengo, lyūkalembeela kwenūko.

²⁴Ū Moyo ūnibūūcha higūlya mu koolekegeje ka ng'wa Moyo o ng'wa Mulungu, ūnitwala kū basaamiwa abo baalī Babuloni. Hūna ī shakoolechiwa īsho naalī naashibona shūnīngīla.

²⁵A basaamiwa nūbawīla pyī īyo SEEBA walī wanolekeja.