Read Sukuma Bible 2015 – Bibilia Ilagano Lya Kale 2015 Ezekia 13 Bible Online

Ezekia 13 - Sukuma Bible 2015 – Bibilia Ilagano Lya Kale 2015 bible

Ezekia 13

¹Gūnizīīla hangī ū mhayo go ng'wa Seeba,

²Ng'wana wa munhū, bahangīlage a bahangi ba Isilaeli abo bakūhangaga. Bawīlage abo bakūhangaga kūfuma mu maganiko gabo dūhū; būhaya, Gwigwagi ū mhayo go ng'wa SEEBA!

³Alilūūlū ū Seeba MULUNGU alīhaya, Balī mu kwihīga a bahangi a bachilū chilū, abo bakalondeelaga myoyo yabo dūhū alīyo ndūhū īsho bakabonaga!

⁴Ee Isilaeli, a bahangi bako babange gītī nyamhawa mu misaka.

⁵Mutaalī ū kwīyeleela ī ndugu na kwīchiba ūmo īkambagūkile īdaame, ī numba ya Isilaeli īlabize na būdūla bo kūwīmīla ū būlūgū ū mu lūshikū lwa ng'wa SEEBA.

⁶Ī shakoolechiwa shabo sha nyalomolomo, nū būchūja wabo wa kūlembagūla banhū. Nūūlū atabatūmile ū SEEBA bakahayaga, “Ū SEEBA alīhaya gīkī na gīkī,” kūnū balisagīlwa ū mhayo gwabo gūkūshikīīla.

⁷A bing'we mutabonaga shakoolechiwa sha nyalomolomo na kūfunya būchūja bo kūlembagūla ūlū ng'wayūhaya, “Ū SEEBA alīhaya gīkī na gīkī alīyo natayombile?”

⁸Alilūūlū, ū Seeba MULUNGU alīhaya gīkī, Kūlwa mihayo ying'we ya nyalomolomo na shakoolechiwa sha kūlembagūla, nalī na wilwisha ning'we; alīhaya Seeba MULUNGU.

⁹Ū nkono gwane gūkwilwisha nabo a bahangi abo bakabonaga shakoolechiwa sha kūlembagūla na kūfunya būchūja bo nyalomolomo. Batūbiza mo ū mahooya ga banhū bane, nū mu kwihela kwa banhū ba numba ya Isilaeli batandīkwa mo, nūūlū gūgūlū gwabo gūtūkuumya ū mu sī ya Isilaeli. Hūna mukūdeeba gīkī ū nene nalī Seeba MULUNGU.

¹⁰“Nguno bakabajimīījaga a banhū bane bakūmanagūhaya, ‘Mhola, nūūlū aho ītīho ī mhola; nūūlū yūzengwa ndugu īlelengetile bakībilaga swakala

¹¹Alilūūlū, bawīlage abo bakwībilaga swakala, gīkī īkūgwa! Nguno īkwiza mbula nhaale ya malambo, ya mawe na nyaga ntaale gūkūhembaga.

¹²Ī ndugu ūlū yūgwa batūbūūja a banhū, ‘Hama yaja he lūūlū ī swakala īyo ng'walī ng'wībilile?’”

¹³Hūna lūūlū ū Seeba MULUNGU alīhaya gīkī, Nakūlekela nyaga ntaale kūlwa būpelanu bone, mu būdaki bone nakwenha mbula ya mawe, īkūtūla mbula nhaale ya malambo īleke būkenaagūji būtaale.

¹⁴Ī ndugu īyo ng'wībilile swakala nakwīgwisha hasī īsambaale gete, ū nsingi gwayo gūkūpalūlwa. Ūlū yūgwa mukūshilīla mo na a bing'we; hūna mukūdeeba gīkī ū nene nalī SEEBA.

¹⁵H'ūmo nakūbūmalīla ū būpelanu bone ū kū ndugu, nū kū banhū abo bakwībilaga swakala. Hanuma nakūmuwīla gīkī, “Ī ndugu ītīho ī haha, na a babiji bayo ba swakala batīho,

¹⁶a bahangi ba Isilaeli abo bakwīhangīlaga ī Yelusalemu kūnū būbona na shakoolechiwa sha mhola kūlwa nzengo gwenūyo nūūlū aho ītīho mhola; alīhaya Seeba MULUNGU.”

¹⁷Hūna lūūlū ng'wana wa munhū, bahangīlage a bashīke ba banhū bako, abo bakahangaga kūfuma mu maganiko gabo dūhū;

¹⁸ūbawīle gīkī, “Ū Seeba MULUNGU alīhaya, Balī mu kwihīga a bakīma abo bakabungaga mhīgī mu tūbogooshi[11] bayūjitunga kū makono; na kūbeeja shitambaala sha būlī mbika sha kwifīkīja kū mitwe, gīkī bayūbakenaagūla[12] a banhū bane. A bing'we mukwikala mukūkenaagūlaga[13] būpanga wa banhū bane dūhū alīyo ū wing'we wikale mhola?

¹⁹Mukwenhelejaga nayūsondagūlwa mu banhū bane kūlwa kwanukūla tūbūsīga twa mheela mu lūpī, na tūlūgūkūlū twa ngatī. Mukūbalembagūlaga abo bakadegelekaga ya būlomolomo, ng'wayūbabūlaga abo batigeleelilwe kūcha, ng'wabaleka abo batigeleelilwe kwikala mhola.

²⁰“Alilūūlū ū Seeba MULUNGU alīhaya gīkī, Natatūtogilwe ū tūbogooshi twing'we twa mhīgī, ūto mukabagwasījaga banhū gītī noni. Nakūtūhulumūla nang'wīngīje ū kū makono ging'we, nabataligūle a banhū abo mukūbagwashaga gītī noni.

²¹Nī shitambaala shing'we nakūmutandagūja nabīnje a banhū bane ū mu makono ging'we. Bīnge ū mu būsese bo kwikala ha sīlīlī ya būdūla wing'we hangī. Hūna mukūdeeba gīkī ū nene nalī SEEBA.

²²A bing'we mukūbagwishaga ng'holò a batūngīlīja kūlwa būlomolomo wing'we, nūūlū aho nataalī kūbenhela ya kūbapīnīhaja. A babūbi mukūbinhaga lūgiili giili, baalemeelwa ū kūgalūka bīnge ū mu nzīla jabo ī jabūbi gīkī bipīje ū būpanga wabo.

²³Alilūūlū, mutikala mukūbonaga shakoolechiwa sha kūlembagūla na kūfunya būchūja bo nyalomolomo. Nakūbīnja ū makono ging'we a banhū bane, hū mudeebe gīkī ū nene nalī SEEBA.”